exodus 3

<<  EXODUS 3  >>

Moses le hnuhhing meikang lohnak thu

1Ciafangin Moses khai a nu Zipporah  paa Midian phungki Jethro tuukhal in um le khatlam in a tuute khiah Pathian mual vumah kawih i. 2Ciafangin  BAWIPA  mi khai hnuhhing songah meiko songin  Moses hnenah dak i. Moses in sik fangin cia hnuhhing songah meiko napui ai hnuhhing khiah kang lo khiah hmu i.3Ciamanin Moses, “Ziangmanin hnuhhing khiah kang lo i pa? Sik cuk ngang,” ti in ti i. 4BAWIPA  in Moses kawi hmu fangin hnuhhing songin, “Moses, Moses,” ti in ko i. Moses in, “Heta ah ing.” ti in sawn i. 5Ciafangin Pathian in, “A nongah kawi ma hang. Na kedawl hawk tu.  Ziangmanti fangin na ding hmu laipua khiah a cianghlim i.”ti in rel i. 6Ciazolo ah Pathian in, “Kaimah khiah na  paa Abraham le Aizek le Zakuk te Pathian ing.”ti in rel i.  Ciafangin Moses khai Pathian sik ngam lo in a hmai hup i. 7Ciafangin BAWIPA in, “Izip ram ai ii minungte rimsu harsa tuarhnak hmu ing. A khawngtute manin amahte kaphnak khai  za ing. Amahte lungsiahnak khai ling ing. 8Amahte khiah Izipte kut songin suah tuh ing. Cen amahte khiah cawhnawi le khoiti luang hmun ram pha le ram lian Khanaan mite, Hit mite, Mor mite,Periz mite, Hiv mite le Jebus mite umhmun ah Izip ramin suah tuhin tolh ing. 9Israel mite kaphnak khiah i hnenah hleng zo i. Cen Izip mite in amahte rimhhnak khai  hmu zo ing. 10Ciamanin kawi tu lai Israel mite khiah Izip remin suah tuhin, na hlat tuh ing,”ti in rel ing. 11Ciafangin Moses in Pathian hnenah, “Kai bang mi khiah Pharoah hnenah kawi tuh tu zai bang mi i pa ing?  Cen Israel mite khiah Izip ramin suah tuh tu zai bang mi i pa ing?”ti in sawn i. 12Ciafangin Pathian in, “Kaimah in na feh pui tuh ing. Izip ramin amahte khiah na suah ben fangin he mual vum ah Pathian bia tuh i si. Ciafangin nangmah khiah kaimah hlat hnak i ti lar tuh i.” ti in ti i.

13Ikhalselai Moses in Pathian hnenah, “Israel mite hnenah, ‘Ning pupaate Pathian in i hlat i.’ti in rel fangin anite in, ‘A hming aisu i?” ti in i zawt fangin kontih in rel ngang?” ti in zawt i. 14Ciafangin Pathian in, “Kaimah khiah Kaimah ing. Israel mite hnenah, ‘Kaimah in i hlat i.’ ti in rel tu.” ti in rel i. 15Ciazolo ah Pathian in Moses hnenah, “Israel mite hnenah, ‘Ning     pupaate Pathian, Abraham Pathian, Aizek Pathian le Zakuk Pathian in ning hnenah i hlat i.’ ti in rel tu. Cen he khiah kumzangza i hming i. San hmuahhmuah in ciatih in i hih tuh i. 16Feh tulai Israel mi upate khiah hmunkhat in tai ruai tulai, ‘Ning papuite Pathian, Abraham Pathian, Aizek Pathian le Zakuk Pathian khiah i hnenah dak zo i. Cen ning tlawng zo ai Izip ramai ning vumah bawnhnak khiah hmu zo ing. 17Cen Izip ram rimsu hmun ramin cawhnawi le khoiti luang hmun ram Khanaante le Hit mite le Amor mite le Periz mite le Hiv mite le Jebus mite ram ah ning kawih tuh ing.’ti in rel tu. 18Israel mi upate in na ngai tuh i. Ciafangin nangmah le mi upate kawmin Izip kumpibawi  hnenah kawi tu i lai Izip kumpibawi hnenah, ‘Hebru te Bawipa Pathian in kin tlawng zo i. Ciamanin ni thum tha hla hmun nelrawn songah kin Pathian Bawipa bia tuhin kin hlat tuhin na ngen i ing.’ ti in rel tu. 19Ciafangin Izip kumpibawi in ning feh siang tuh lo ai a power thawn ning kham tuh i. 20Ciafangin amahte lakah i kut thawn ngaihsunurkul bawn tuhai amahte khiah seu tuh ing. Ciaben fangin ning hlat tuh i. 21Cen Izip mite in Israel mite khiah daih ruai tuh ing. Ciamanin ning tlan fangin kut lo lek in tlan tuh lo i si. 22Ikhalselai nupui hmuah in ngun le sui le thilthuamte khiah zawng tuh ai ning fapa le ning fenute silh tuh i si. Ciatih in Izip mite khiah rok tuh i si.” ti in rel i.

<<  EXODUS 3  >>