1Zakuk le amahte innkua kawmin Izip ramah hleng tute hming khiah hete i:
2Reuben, Simeon, Levi le Judah; 3Issakhar, Zebulun le Benjamin; 4Dan le Naphtali, Kad le Asher; 5Zakuk songai tehnak minung khiah sawm sarih i. 6Ciafangin Joseph le a unaute khiah amah te sanai minungte kawmin thi berh i. 7Ikhalselai Israel mite khiah a rauh ngai in zaai le pung ai cia ram ah a dim lio in um i.
8Ciafangin Izip ramah Joseph ling awng lo tu kumpibawi a thar pakhat suak le 9cia kumpibawi pa in a minungte hnenah, “Sik tuu-ih! Israel mite khiah kin hnak in tam sawn ai kin hnak in thahat sawn i. 10Ciamanin amahte khiah phantak ngai in uk nga sing. Cialo fang in raal suak pang selai anite in kin raalte sawn bawmin kin tawng ngaikhaw kin ramin suak thai pang i.” ti in sawm i. 11Ciamanin amahte khiah thilrit ngai thawn rimh tuhin amahte vumah kuli khawngtute dah i. Pharaoh ca in hlawnthil khawi hmun tuh khuapui pui Pithom le Raamses te sa sah i. 12Amahte khiah rauh hngehnge in rimh fangin a tam amam in khang i. Ciamanin Izip mite khai Israel mite lakah lau ngai i. 13Ciamanin Izip mite in Israel mite khiah a rauh amam in rimh i. 14Amahte khiah ukkhe le bilatmi bawn ruai ai naper phun caangcaang thawn a tuar har bik in rimh ai na per ruai i.
15Ciafangin Izip kumpibawi pa in a nuu songai nau te bawmtu Shiphrah le Puah ti ai ko hnak Hebru si sazamah te hnenah, 16Hebru nupui te in nau te tuhin tauhkheng vumah to fangin pasal in te lekhaw rek tuh lio i si. Nupang in te fang tu nung ruai tuh i si.”ti in thu pe i. 17Ikhalselai hete in Pathian kih manin Izip kumpibawi ai pehnak thu bang in bawn lo ai pasal fate khai rek lo i. 18Ciamanin Izip kumpibawipa in amahte khiah ko ai, “Ziangman pasal fate khiah rek lo i si?” ti in zawt i. 19Amahte in Pharaoh khiah, “Hebru nupangte tu Izip nupuite bang lo i. Anite tu kin hleng man hlanah a rang ngai in nau nai lio de i,” ti in sawn i. 20Ciamanin Pathian in cia si sazamah te khiah bawm ai Israel mite khai zaai amam ai a tam amam in pung i. 21Si sazamahte in Pathian khai kih manin Pathian in amahte khiah inn pe i. 22Ciafang in Pharaoh in a minungte veksen hnenah, “Pasal fa hmuah Nile runti songah lon tuh i si. Fenu fa lek rek tuh lo i si.” ti in thu pe i.