He Baibal khiah Zanniat ponin a hmasaber lethnak i. Lai Cianghlim Thar tu kum 1997 fangin suah ben zo le Lai Cianghlim Hlun tu kum 2000 fangin ben ai kum 2002 fangin a hlun le a thar khiah ukkhat in suah hmasaber hnak i.
Zanniat Baibal lethnak thuanthu:
Falam ah High School i kaai awng fangin kin Zanniat ponin Baibal let tuh khiah i thin songah um awng zo i. Ciateng in kin khua sanginn ah sa tuhin Mirang pon ai la te khiah kin pon in lo let awng de ing. 1952 fangin kai khai pre-medical kaai tuhin Rangoon ah feh le phun 10 ong ai Intermediate ong ben fangin 2nd MBBS Jr. kaai teng fangin kaimah thu in kin Zanniat Labu khiah a panai panin a tong tian rem awng le Songs and Solos ai solfa thawn kaihdun tuhin bawn ben fangin Burma Baptist Convention headquarter ah kawih le Ameircan missionary pa hnenah punghnik tuhin pe ing. Ciafangin kaimah khiah kum 21 ing le aisu in khai i ling awng lo i. He American missionary pa in aisu i ti khai i ling lo napui i ruaihnak bangin kin Zanniat Labu khiah kin suah sah ai, Laimi labu lakah kin Zanniat Labu khiah solfa thawn suahhnak a hmasaber Labu i. Ciaheh tunin ruat leh fangin ciafangin Pathian ai lo i hmang awng i, ti in ruat ing.
Kum 1957 fangin kai khai USA ah lai zir tuhin scholarship lo ngah ve le, cia Emory University ah i tlawngkaai kongin Lai Cianghlim a Thar let ing. 1961 kum fangin let ben le cia a ben sawng fangin British and Foreign Bible Society te hnenah ca-uk in kin suah sah tuhin zawt fangin zai thu khai i sawn lo i. Thill le thill lo khai i rel lo i. Ciamanin kai khai he tu Pathian ai i let ruai lo i natu ti in ruat le cia i lethnak Lai Cianghlim Thar khai thingkuang songah khawi lio ing.
1996 fangin nau Lucky Cunghlen Lamberth in Kawlram tlawng tuh in i so le a ngom in tu i hiam rih lo i. Ikhalselai ani in i so thliahthlo fangin kai khai hetih in ruat ing. He i lethnak Laicianghlim Thar khiah kaimah in he USA bawnin Kawlram ah tlun thai i na, ti in ruat fangin tha i hiam bik i. Ciamanin kai khai cia Lai Cianghlim Thar khiah a veksenin rem leh le, i rem ben punghnik thai cialep fangin American i rualpui te hnenah bawmhnak ngen ing. Hla khat songin uk 1000 bawn thillhnak tuh le vanzuang ai phurhnak man tian in tham thai a hlu kin pe i. Lai Cianghlim Thar kin tlun fangin Lai Cianghlim Hlun khai let tuh in i so tu um leng lo manin 1997 ai USA kin tlung leh fangin Lai Cianghlim a Hlun khai let pan le kum 2000 fangin ben ai tunin kum 2002 fangin a Thar le a Hlun khiah ukkhat in bawn i ing.
Zaimanin Zanniat pon in Baibal let hnelhno ing ti fangin, a hmasaber ah kin Zanniat te in Baibal khiah siar thill i daih manin i. Kinmah pon rori in siar fang tu Pathian thu khai ling tuh deuh i sing. Ciafangin Pathian ai kin ruaihnak thu le a co tuh ai Pathian in kin bawthnak a hmuifu te khai ling tuh i sing. Panihhnak ah Cauk in khum lo fangin tu kin Zanniat upa te thi sio fangin pon pai tuh lio manin Ca-uk songah khum fang tu kin pon tang tuh ngio manin Zanniat pon in lethnak i..
Heheh a hmasaber Zanniat pon ai lethnak Baibal i le kaimah lek ai lethnak i manin kaimah ai i ling tawp ai lethnak i le a ciang lo khai um tuh i. Cafang kom khelhhnak khai um tuh i. Inapui a samhnak te kin tawk fangin a rem kulhnak te khiah tunhnua ah a thar kin suah leh fangin a ciang thai le a fiang ai ling thill thai in bawn leh nga sing. Cen kin Zanniat pon heh Mirang pon thawn teh fangin kin pon tlawm ze i le Mirang pon khiah a tiantian in kin pon in let thill lohnak um bial i. Thuthimhnak ah Mirang pon in faith, belief, le trust a dikbe dang thah tten napui ai Zanniat pon in tu sanghnak ti lek um i. Ciatih bangin kin pon ai um lohnak Mirang pon tamngai um i.
Cen a thupui ber le i daihhnak ber tu he Baibal a siar zuam tu te vumah hmuifu lo hleng tu selai, a siar menma lo in, a pai rauhla te khiah vancung ramah feh thai tuhin ciate hnenah tettikhan nuamhnak thinlung suak in Pathian ram khiah kau thai am am tuh i daih ber i. Ciabang in khim thai Pathian in hmuifu lo ning bur tu seh. Amen
He Baibal lethnak lakah Pathian a hmuifu lehsawng tamngai i pe i. Mirang lai ling menma in let thill lo i. Pathian in a let thiam hnak hmuifu i pe i. Cen a let zuamhnak tuh, a lethillhnak tuh a tikcu khai i pe i. Cen he USA ah kum 40 zolo um napui ai Zanniat pon hai lo ai i dah tu khai Pathian i. Ciamanin he hmuahhmuah vumah Pathian lakah i ang rauh i. Ciamanin pathian in thangphathnak lo ngah tu seh. Cen U Lamat in a veksen in i siar sah awng ai a tamngai i rem sah manin Pathian lakah i ang ai Lamat khai Pathian in hmuifu lo bur tu seh. Cen he Baibal lethnak le bawnhnak ah a cuu tamngai bo napui ai thinsau ngai in i bawn siang tu i innkua Judy, Than Mawi Nuu lakah khai a tamngai in i ang i.
Forth R. Naisang, B.A., M.D.
Fairview, NC October 30, 2002