1 Ciafangin amahte in David khiah, “Filistin te in Keilah khiah tawng ai amahte rongcil hmun khiah rok sah i.” ti in rel i. 2 Ciafangin David in Bawipa hnenah, “He Filistin mite khiah taih ngang?” ti in zawt i. Ciafangin Bawipa in David hnenah, “Feh tulai Filistin mite khiah taih tulai Keilah khiah o tu.” ti in sawn i. 3 Ciafang David minungte in amah hnen ah, “Judah ram rinah kin lau i khaw, zaitluk in Filistin te khiah Keilah ah tawng tuhin kin lau tuh am i?” ti in ti i. 4 Ciafangin David in Bawipa khiah zawt leh thio i. Bawipa in, “Tho in Keilah ah zu tu. Ziangmanti fangin Filistin mite khiah na kut ah na ap tuh ing.” ti in sawn i. 5 Ciafangin David khai a minungte kawmin Keilah ah feh ai amahte khiah tawng ai amahte sumhnam khiah lang sah sio i.
6 Ahimelek fapa Abiathar khiah Keilah ah David hnenah tlan fangin, a kut ah ephod thawn lo zu i. 7 Ciafangin Saul khiah David khiah Keilah ah zu i, ti in rel i. Ciamanin Saul in, “Pathian in i kut ah i ap i hang. Ziangmanti fangin David in kawl dawngkham le khuamte nai khua songah lut manin amah veve khiah dawngkham lio i.” ti in ti i. 8 Ciafangin Saul in mi a veksen khiah raaltawng tuhin Keilah ah zu in David le a minungte khiah kulh tuhin kawi ruai i.
9 David in Saul in amah rek nuam khiah ling fangin, phungkipa Abiathar hnenah, “Ephod heta ah kawih tu.” ti in ruai i. 10 Ciafangin David in, “Aw Bawipa Israel Pathian, kaimah na hnenum manin Saul khiah Keilah ah khua hnawmcan tuhin zu tum i, ti in za ing. 11 Keilah mite in Saul kut ah i ap nga im? Na hnenum in za bangin, Saul khiah zu tuh peu im? Aw Bawipa Israel Pathian, na hnenum khiah rel tuhin ninghio na ngen ing.” ti in zawt i. Ciafangin Bawipa in, “Zu tuh i.” ti in sawn i. 12 Ciafangin David in, “Keilah mite in kaimah le i minungte khiah Saul kut songah kin ap nga im?” ti in zawt i. Bawipa in, “Ning ap tuh i.” ti in sawn i. 13 Ciamanin David khai a minung zaruk tha kawmin tho ai Keilah in tlan ai amahte feh thill hmunah feh i. Ciafangin David khiah Keilah in tlan ngah teu i ti in Saul khiah rel manin Saul khai ciata ah feh awl i.
14 Ciafangin David khai a buamhmun nelrawn songah le Ziph tihnak Nelrawn songai mualtlang lakah um i. Saul in ni siar in sii napui ai Pathian in a kutah amah khiah ap lo i. 15 Ciamanin David in Saul in a rek nuam i ti khiah ling i. David khai Ziph tihnak Nelrawn ai tuu songah um i. 16 Ciafangin Saul fapa Jonathan in tuu songah David hnenah kawi ai Pathian hnenah a thin khiah kho ruai i. 17 Jonathan in David hnenah, “Lau mah, ziangmanti fangin i paa Saul kut in na ban tuh lo i. Nangmah khiah Israel kumpibawi cang tuh ai kaimah khiah na sontu i tuh ing. Cia khiah i paa Saul in khai ling i.” ti in rel i. 18 Ciamanin anite khai a panih in Bawipa hmai ah thukham dun i. David khai tuu songah um hlen ai Jonathan khai a inn ah tlung i.
19 Ciafangin Ziph mite khai Kibeah ah Saul hnen ah kawi ai, “David khiah Jeshimon hlanglam ai Hachilah mualtlang lakai tuu songah buanhmun ah relh i lo im? 20 Ciamanin, Aw kumpibawipa, zu tuhin na nuam bangin zu tulai, kin tavuan tu David khiah kumpibawipa kut ah ap tuh i ing.” ti in ti i. 21 Ciafangin Saul in, “Kaimah khiah ning i hio manin, Bawipa in hmuifu ning bur tu seh. 22 Amah khiah a ngai ngai in sii tu i lai, a relh hmun khiah sik tuu-ih. Cen aisu kawmin um i ti khai cul tuu-ih. Ziangmanti fangin amah khiah mizawl thiam ngai i. 23 Ciamanin a relh hmun cang khiah cul tu i lai, a ciang ngai in i hnenah kawi leh tu i lai, ning thawn feh tuh ing. Ciafang in amah khiah cia ramah um lekhaw, Judah mite lakah sii tuh dek ing.” ti in rel i.
24 Ciamanin anite khai tho ai Saul hlanin Ziph ah feh i. Ikhalselai David le a minungte khiah Jeshimon hlanglamai zawllai hmun Moan Nelrawn songah um i. 25 Saul le a minungte in David sii khiah David rel i. Ciamanin ani khai lungpui hnen lamah zu ai Moan Nelrawn songah um i. Saul in za fangin, David khiah Moan Nelrawn songah hnawh i. 26 Ciafangin Saul khai mual nak khat lam in kawi ai David khai a minungte kawmin a nak khatta lamin feh i. Ciamanin David khai Saul hnenin a rang in suak tek i. Ziangmanti fangin, Saul le a minungte in David le a minungte khiah a pom tuhin kulh tlang i.
27 Ikhalselai a hnenum pakhat khiah Saul hnenah kawi ai, “A rang ngai in kawi tu. Ziangmanti fangin Filistin mite in kin ram kin sim sah i.” ti in rel i. 28 Ciamanin Saul in David khiah hnawh awl ai, Filistin mite khiah tawng tuhin feh i. Ciamanin cia hmun khiah Luat ngahhmun Lungto, ti in ko i. 29 Ciafangin David khai ciata in hong ai En Kedi buanhmun ah um i.