1 Ciamanin David khai ciata in thawn ai Adullam khukua songah tlan i. A unaute le a paate innkuate in za fangin, anite khai ciata amah hnenah zu i. 2 Mi thin rimsute le batba naite le thinkhim lo te in David ben i. Ciafangin David khai amahte bawi cang i. Amah thawn mi zali tluk um i.
3 Ciata in David khai Moab ramai Mizpah ah feh ai Moab kumpibawipa hnenah, “Pathian in zai i bawt tuh i ti i ling hlan tian i paa le i nuu khiah na hnenah kawi in um siang tuhin na ngen ing.” ti in ti i. 4 Ciafangin amahte khiah Moab kumpibawi hmai ah kawih ai, anite khai kumpibawipa thawn um lakin David tu a buanhmun ah um hlen i.
5 Ciafangin prawfet Kad in David hnenah, “Cia buanhmun ah um mah. Judah ramah tlan tu.” ti in rel i. Ciafangin David khai thawn ai Hereth tuu songah hleng i.
6 David le amah thawn ai umtu mite khiah tawk i ti khiah Saul in za fangin, (ciateng in Saul khiah Ramah songai Kibeah ai thing hnia ah a fei pui khiah a kut ah sin in um ai a hnenumte khiah a hiang cingkim ah ding i) 7 Saul in a hiang ai dingtu a hnenumte hnenah, “Ngai tuu-ih, Benjamin mite. Jesse fapa in ning veksen in lo le capit vuandum ning pe tuh ten im? Cen mi thawngkhat uktu le mi zakhat uktu in ning dah tuh im? 8 Ciamanin ning veksenin i baawm tlang ai i fapa in khai Jesse fapa thawn kawm dun i ti khai i rel lo i sim? Aisu in khai ning i hio lo ai i fapa in i hnenum khiah i tawng tuhin tho ruai ai tunnia ah i bawh i ti khai i rel lo i si.” ti in ti i.
9 Ciafangin Saul hnenumte uktu Edom mi Doek in, “Jesse fapa khiah Ahitub fapa Ahimelek hnenah Nob ah kawi hmu ing. 10 Ahimelek in amah ca in Bawipa khiah zawt sah ai, rong khai pe ai Filistin mi Kawlaiath vangsau khai pe i.” ti in rel i. 11 Ciafangin kumpibawipa in Ahitub fapa phungkipa Ahimelek khiah a paa inn sang ai Nob ai phungkite kawmin ko ai amahte khiah a veksenin kumpibawipa hnenah hleng i. 12 Ciafangin Saul in, “I thu i ngai tu, Ahitub fapa.” ti in ti i. Ciafangin Ahimelek in, “Heta ah um ing, i bawipa.” ti in sawn i. 13 Ciafangin Saul in amah hnenah, “Ziangmanin Jesse fapa thawn i tawng tuhin i baawm i si? Ziangmanin amah khiah rong le vangsau pe ai, tunnia ah amah in i tawng tuhin i bawh tuhin amah ca in Bawipa zawt sah i si?” ti khiah rong le vangsau pe ai, tunnia ah amah in i tawng tuhin i bawh tuhin amah ca in Bawipa zawt sah i si?” ti in zawt i. 14 Ciafangin Ahimelek in kumpibawipa khiah, “Na hnenum veksen lakah na fapa David bangin aisu khiah rinsan tlak um i? Aisu in ani bangin na ruaihnak bangin feh ai na inn songah upat kul um i? 15 Amah ca in Pathian khiah zawt sah ing? zawt sah zel lo ing. Kumpibawipa in a hnenum pa hnenah le i paa innkuate vumah mawh kin hluk ma seh. Ziangmanti fangin na hnenum in he thute khiah a tlawm le a tampui khai ling bul lo ing.” ti in ti i. 16 Ciafangin kumpibawipa in, “Ahimelek, nangmah le na paate innkua in ning veksenin ning thi tuh i.” ti in ti i. 17 Ciafangin a hiang ai dingtu a kiltute hnenah, “Bawipa phungkite khiah rek tu. Ziangmanti fangin, amahte kut in David khiah bawm ai, David tlan fangin ling napui ai i rel lo i.” ti in ti i. Ikhalselai kumpibawi hnenumte in Bawipa phungkite khiah rek nuam lo i. 18 Ciafangin kumpibawipa in Doek hnenah, “Nang in phungkite khiah rek tu.” ti in ruai i. Ciamanin Edom mi Doek in cia nia ah ephod pon siltu phungkite 85 khiah rek i. 19 Cen phungkite umhmun khua Nob khua songai umtu mite pasal, nupang, naupang le nausente le kawlpaw le lak le tute khai vangsau thawn in rek sio i.
20 Ikhalselai Ahitub fapa Ahimelek fapa pakhat Abiathar tihnak khai suak ngah teu ai David hnenah tlan i. 21 Ciafangin Abiathar in David khiah Saul in Bawipa phungkite khiah rek sio i, ti in rel i. 22 Ciafangin David in Abiathar hnenah, “Cia nia ah Doek khiah ciata ah um fangin, Saul rel tuh rori i, ti khiah ling ing. Na paate innkua khiah kaimah manin thi ruai i. 23 I hnenah um tu. Lau mah. I rek tum tu in nangmah khai na rek tum i. Ikhalselai kaimah thawn um lesikhaw, na him tuh i.”ti in rel i.