1 Ciateng in Israel ah kumpibawi um lo i. Ciateng in Dan hin te in khuato hmun tuh sii i. Ziangmanti fangin cia nia tian Israel hin te lakai amahte co tuhhnak ro khiah ngah lai lo i. 2 Ciamanin Dan mite in amahte ram Zorah le Eshtaol in raalpha ngai mi panga khiah cia ram cul tuh le sii tuhin amahte innkua songin hlat i. Amahte in cia mite hnenah, “Feh in cia ram khiah sii tuu-ih.”ti in ruai i. Ciamanin anite khai Efraim mualtlaang lam Maikah inn ah hleng ai ciata ah caam i. 3 Maikah inn ah um teng fangin Levi tlangvalniu aw khiah za i. Ciafangin amahte in cia tlangval niu hnenah, “Heta ah aisu in na kawih i? Heta ah zai bawn i si? Heta ah zai nai i si?”ti in zawt i. 4 Ciafangin amah in, “Ciatih le khiatih bangin Maikah in i bawt sah i. Amah in hlawh i tham ai kaimah khiah a phungki cang ing.”ti in sawn i. 5 Ciamanin amahte in amah hnenah, “Kin khualsihnak khiah hnempui tuh le tuh lo BAWIPA hnenah kin zong sah tu.”ti in ruai i. 6 Ciafangin phungki paa in amahte hnenah, “Thin tlong in feh tuu-ih. BAWIPA khiah ning feh hmun lamah ningmah thawn lo um tu seh.”ti in sawn i.
7 Ciamanin cia mi pangate khai suak ai Laish ah feh i. Ciata ah mite khiah hmu ai amahte khiah Sidon mite bangin a muang hiar le a him niu in um khiah hmu i. Amahte khiah zauhsuam tu tuhin uktute khai nai lo i. Cen amahte khiah Sidon mite thawn a hla ngai ah um ai aisu thawn khai peh dun lo i. 8 Ciafangin cia cungthauh te khai amahte unaute umhmun Zorah le Eshtaol ah let leh ai, a unaute in, “Ning thuthanhnak khiah ziang i?” ti in zawt i. 9 Ciamanin amahte in, “Tho in amahte khiah tawng tuhin feh nga sing. Ziangmanti fangin cia ram khiah hmu zo i ing. Ram pha ngai i. Zai bawn lo in to hlen nga i sim? Hnuakfual lo in cia ramah lut in ping tuu-ih. 10 Ning feh fangin ram lian ngai le a muang ai um hiar mite tawk tuh i si. Ziangman ti fangin Pathian in laivumah za khai samhnak um lo ram ning pe zo i.” ti in ti i.
11 Ciafangin Zorah le Eshtaol ai Dan mite zaruk khiah raal thithuam thawn feh i. 12 Ciafangin anite khai Judah ramai Kirjat Jearim ah caam i. (Ciamanin cia hmun khiah tunnia tian in Mahaneh Dan ti in ko i. Cia khiah Kirjat Jearim ziatlam ah i.) 13 Ciata in anite khai Efraim mualtlaangte khiah khel ai Maikah inn ah hleng i.
14 Ciafangin Laish cul tuhin feh tu mi pangate in a unaute hnenah, “He innte songah ephod le inn sang milim le mizuk le milim um i ti khiah ling aw i sim? Ciamanin zai bawn tuh khiah ruat tuu-ih.” ti in ti i. 15 Ciamanin anite khai Levi pa umhmun Maikah inn ah kawi ai Levi pa khiah hnuksat i. 16 Cen Dan mite raal thilthuam vong tu mi zaruk khai kawl dawngkham ah ding tlaang i. 17 Ciafangin ram cul tuhai feh awng tu mi panga te khai inn songah lut ai mizuk le ephod le inn sang milimte le mizukte khiah lang sah i. Cen phungki pa khai raal thilthuam vongtu mi zaruk te kawmin kawl dawngkham ah ding i. 18 He mi pangate in Maikah inn songah lut in mizuk le ephod le inn sang milimte le mizukte lang fang in, phungki pa in amahte hnenah, “Ziang bawn i si?” ti in ti i. 19 Amahte in amah hnenain, “Pong lo niu in um in na kut in na kaa hup tulai, kin thawn kawi in kin paa le king phungki cang tu. Nangmah khiah mi innkua pakhat ca ai phungki per maw, Israel mi hin le innkua ca ai phungki per khiah pha sawn pa? ti in ti i. 20 Ciamanin phungki pa khai lungkhim ai ephod le inn sang milimte le mizukte khiah lang ai amahte hnenah kawi i. 21 Ciafangin anite khai a fate le amahte suumhnam le a thilrite khiah a hmai ah dah ai ciata in feh i.
22 Amahte khiah Maikah inn in a hla thah hleng fangin, Maikah inn hiang ai umtu mite khai hmunkhat in khawm tlaang ai Dan mite khiah man i. 23 Ciafangin amahte in Dan mite khiah ko i. Ciafangin Dan mite khai khelleh lamah her ai Maikah hnenah, “Minung he hmuah thawn kawi tu, zai na poi i pa?” ti in ti i. 24 Ciamanin Maikah in, “I bawnhnak i pathiante i lang sah i si. I phungki khai i lang sah i si. I naihnak zai um i hang? A kontih ai, ‘Zai na poi i?’ ti in i thill i si?” ti in sawn i. 25 Ciafangin Dan mite in amah hnenah, “Kin lakah na aw khiah kin za ruai mah. Cialo fangin mite raw tuh ai nangmah khiah na vit in na innkuate kawmin ning nunhnak pai ruai ngah thai i si!”ti in ti i. 26 Ciafangin Dan mite khai amahte nuam hmunah feh i. Amahte khiah a tamze manin Maikah khai a inn ah tlung leh i.
27 Ciamanin Dan mite khai Maikah bawnhnak thil le a phungki kawmin Laish ai a muang hiar le a himniu ai umtute khua ah hleng i. Cia khua minungte khiah vangsau thawn rek ai a khua khiah mei in tai sah i. 28 Amahte khiah aisu in khai otu um lo i. Ziangmanti fangin cia khua khiah Sidon thawn hla dun ai a dang mi thawn pehdun hnak nai lo i. Cia khiah Beth Rehob ai rawn zawllai songah i. Ciamanin anite in cia khua khiah sa leh ai ciata ah khuato i. 29 Israel songai tetu a paa Dan hming lang in cia khua khiah Dan ti in ko i. Ikhalselai a hlanah cia khua khiah Laish i awng i.
30 Ciafangin Dan mite in mizuk khiah tar ai cia ram khiah ram dang mi in lang hlanlo Manasseh fapa Kershom fapa Jonathan le a fate khiah, Dan mite hnenah phungki tuan i. 31 Ciamanin Maikah ai bawnhnak mizuk khiah amahte ca in tar i. Ciateng in Pathian sanginn tu Shiloh ah um i.