1 Pathian hmai ah le a nung le a thite thukhantu tuh Khrih Zisu hmai ah le amah hlenghnak le a ukhnak thu manin he thu na pe ing. 2 Tazahaw tu tio. A cu le a cu lo ti lo in ralringnin um tu. Thinsau le thuhman thawn tiam in hau in thuso ‘tu. 3 Ziangmanti fangin minungte in thuhman khiah ngai zuam tuh lo ai amahte za hiamhnak le amahte daihhnak bangai cuktu sazate sawn ngai nuam hnak cu hleng tuh i. 4 Thuhman khiah ngai awl tuhai puahcophnak thuanthu sawn ngai tuh i. 5 Ikhalselai nang ngawn a catlo in a kho in um tu. Anharhnak khiah tuar tu. Pathian thu khiah khualsi in cuk tu. Na natuan khiah a khimniu in per tu. 6 Ziangmanti fangin i pumpui khiah a hlu in hmang tuh in a cialep i hang ing. I fehhnak cu khiah hleng i hang. 7 A pha ngai in raal tawng zo ing. Dawphnak puai ah dawp ben zo i hang ing. Sanghnak khiah hlun zo liang ing. 8 Ciamanin tunhnua cia niakhua ah dikcang thukhantu bawipa in dikcanghnak sui lukhuk khiah kai cai in dah zo i hang. Kai ca lek i lo ai amah hlengleh hnak it tu hmuah khai pe tuh ve i.
9 I hnenah a rang in hleng thill thai in zuam tu. 10 Ziangmanti fangin Demas in he laivum khiah it sawn manin i zaam ai Thesalonika ah feh teu i. Khrescens khai Klatia ah feh zo i. Titus khai Dalmatia ah feh i. 11 I hnenah Luke lek um i. Mark khai lang tulai nangmah thawn i hnenah kawih tu. Ziangmanti fangin amah khiah i naper tuhin hnempui ngai i. 12 Taikhicus khiah Efesa ah hlat zo ing. 13 Na kawi fangin Troas ah Kharpus hnen ah ai i hlumhnak kawt angki le caukte le laihnahte berber khiah kawih tu. 14 Pumsupa Alexander in i lakah a pha lo tamngai bawn i. Bawipa in a naperhnak– khiah rul leh tuh i. 15 Nangmah in khai amah khiah ral lo ring tu. Ziangmanti fangin amah in kin tazahawhnak khiah a rohngai in el i. 16 Zung ah i thu rel tuhin i feh hmasaber fangin aisu in khai i bawm lo ai a veksen in i zam sio i. Amahte khiah mawh lo hluk ma selaw!
17 Ikhalselai Zental mi veksenin a thu khiah za thillhnak tuhin Bawipa khiah i haing ah ding ai a thu relhnak tuhin tha i pe i. Ciamanin chintit ka songin luang i suah i. 18 Bawipa in a pha lo hmuahhmuah hmunin luang i suah tuhai van- cung ukhnak ca in i khawi i. Amah hnenah thangphathnak khiah kumzangza in lo um tu seh. Amen.
19 Priska le Akuila le Onesiphawrus innkua khiah hnuk lo sat tu. 20 Erastus khiah Khawrinth khua ah taang hlen i. Trofimus khiah Miletus ah a ur in hlum i ta ing. 21 Khuasik cu khim hlanah hleng tuhin lo zuam tu. Eubulus le Pudens le Linus le Klaudia le unaute veksenin pon na hla i.
Bawipa khiah na rauhila thawn lo um tu seh. Ngaihharhnak khiah nangmah thawn lo um tu seh. Amen.