1 Haak phurtu mi hnenumte in a bawite khiah zaizongza ah a zul tlak in ruat tu seh. Cialo fang in Pathian hming le kin cukhnak thu khiah mite in siat mawh ngai. 2 Cen a thusang bawi naitu hnenum te in amahte khiah thusangtu ulenau ti in a bawite khiah nautat ma seh. Ikhalselai amahte in a pha amam in naper sah tu seh. Ziangmanti fangin amahte naperhnak manin hnemhnak co tu cia bawite khiah thusangtute i ai Pathian ai ithnak te i ve i. He thute . khiah tazahaw in lo cuk tu. 3 Cen mi pakhat in thu dang sawn hlunin kin Bawi Zisu Khrih thuhman le cianghlim thu khiah hlun hlahlekhaw 4 Amah khiah mihngal mi i ai zai khai ling lo i. Ciazolo .ah cia pa in thu-eldun le poncuhdun lamah a tluklo in hiam le ciafangin iksikdun, hauhnak le ponsiate le a siava umhlahdunhnak te suak ruai i. 5 Ciafangin miruatsualte le thuhman linglote lakah a catlo in hau ai tawngdunhnak suak i. Amahte in miathnak khiah cianghlim thawn bang in vuah i. Ciabang mite khiah pawl mah. 6 Ikhalselai cianghlim thawn le lungkhim niu ai nung heh miathnak lianpui i. 7 Ziangmanti fang in he laivum ah zaikhai kawih lo i sing. Cen a ngaingai in he laivum in zaikhai tlan thill tuh lo i sing. 8 Rong le thilthuam nai lesingkhaw ciate thawn thinkhim in um nga sing, 9 Ikhalselai milian nuamtute in sualsohnak le thang songah tlok ai voihnak le a pha lo daihhnak suak ruai ai amahte khiah hnawm ruai ai rail ruai i. 10 Ziangmanti fangin tangka daih ze heh a pha lo hmuahhmuah ham i. Ciatih ai tangka ir zete in sanghnak hnenin lamkhelh ai amahte veve thin khiah lungsiahnak thawn dawt ruai i. 11 Ikhalselai nang Pathian minung, hete hnenin tlan tu lai dikcanghnak le cianghlimhnak le sanghnak le ithnak le thinsau hnak le thinniamhnak khiah hnawh tu. 12 Sanghnak ca in a pha ngai in tawng tu. Kumzangza nunhnak hnenah na ko zo ai tetti tamngai hmai ah na rel zohnak kumzangza nunhnak khiah awh tu meng. 13 Zai hmuahhmuah hnenah nunhnak petu Pathian hmai ah le Pontius Pilate hmai ah thupha phuang ai tettikhantu Khrih Zisu hmai ah he thu khiah na pe ing: 14 He thukham khiah kin Bawi Zisu Khrih hleng leh hlanlo a ciangniu in le mawhhluk tuh um lo in lo hlun tu. 15 Amah khiah Pathian in a cu khim fangin hleng ruai leh tuh i. Cia Pathian khiah a Sangber Uktubawi, Kumpibawi hmuah hmuah lakah Bawi ber le bawi hmuahhmuah lakah Bawi ber i ai l 16 Amah lekin kumzangza nunhnak nai ai aisu in khai nong thill lo khuavar songah um i. Amah hnenah zulhnak le huthawm khiah kumzangza in um tu seh. Amen.
17 He laivum ai milian te hnenah amahte in a hngal in um tuh lo in le a rinsantlak lo lianhnak khiah rinsan lo in kinte in ang ngai in hmang tuh ai zaizongza kin pe’tu Pathian sawn rinsan tuhin tiam tu. l 18 Amahte in na pha per tuh le na pha lam ah milian cang tuh le hmunthiam tuh le amahte naihhnak khiah midangte thawn hmangkhat in 19 ciatih bangin hlawnthill lo khawl tu seh. Ciafangin hmailam ca ah a ham khiah a kho in sa tuhai kumzangza nunhnak khiah co ngah tuh i. 20 Aw Timote, na hnenah na aphnak thu khiah kil lo khawl tu. Ponsia le thulovang ponka le fimhnak i ti ai ruat sual ai Pathian thu el tute khiah pawl mah. 21 Ziangmanti fangin mi hrekkhatte in cia fimhnak khiah hlun manin sanghnak thawn khelh sek i hang. Ngaihharhnak khiah na hnenah um tu seh. Amen.