1 Ziangmanti fangin ningte ca le Laodicea ai umtute ca le i hmai i hmu awng lotute in 2 Thinnuamhnak le pakhat le pakhat itdun in Khrih khiah Pathian thuthup i ti khiah a ciangniu in ling manin amahte nun ohnak khiah a hliahngai in ling tuhin ning ca ah zaitluk in thin rimsu in um ing ti khiah ning te in i ling sah i daih i. 3 Cia Khrih songah fimhnak le linghnak hlawnthil a veksenin um i. 4 Midangte in pon thiamngai thawn ning zawl lohnak tuhin he khiah ning rel ing. 5 Ziangmanti fangin taksa pum thawn ning hnenah um napui lo ai a kungniu ai ning nundan le Khrih ning sangkhohnak khiah i rauhla thawn ang kong in ning hmu sah ing. 6 Khrih Zisu Bawipa ning nai zo i bangin amah thawn vak khat tuu-ih. 7 Ning cuk zo bangin amah songah hnuk nai in sa tuu-ih. Ning sanghnak khiah kho ruai in anhnak thawn a dim in um tuu-ih. 8 Khrih thu bangin i lo ai minung le laivum dan le minungte fimhnak le zawlhnak in ning hnawm ruai lo tuhin ralring tuu-ih. 9 Ziangmanti fangin Khrih pum songah Pathian khiah a dimin um i. 10 Ningte khiah amah songah ning khim liang i. Amah khiah uktu le power hmuahhmuahte lu i. 11 Cen Khrih songah kut thawn cem lohnak vunpar cemhnak ngah i si. Cia Khrih ai vunpar cemhnak in ning pumpui khiah taksa sualhnak thawn ning hawk sah lio i. 12 Ti ning nim fangin amah thawn ning phumkhat ai amah tho ruaitu Pathian huthawm khiah ning sang manin amah thawn tholeh i si. 13 Ningte khiah ning sualhnak le ning taksa vunpar cem lo manin ning thi awng ai ning sualhnak hmuahhmuah ning hlat sah ai amah thawn ning nung ruai leh i. 14 Kin raal le kin huatu thukham lainganhnak khiah amah in phiat sio ai kin hnenin lang le thinglamteh vumah khen sek i. 15 Amah in uktute le power te khiah neh sio ai amahte khiah Pathian songin nehsio khiah mi tamngai in hmu thai in mite hmaiah piah i. 16 Ciamanin ning rong le ning ding hnak le ni uldan le hla thar le sabbath nia vumah aisu in khai sual ning si ma seh. 17 Hete khiah a hleng tuh lai a hlaate i. A pumpuitu Khrih hnenah um i. 18 Cen amahte veve khiah thinniam tuah khel ai vancungmite khiah bia khel ai ngaihsunurkul hmuhnak nai ing ti in a taksa thinlung ruathnak thawn hngaltute in ning lehsawng khiah ning zawl ma seh. 19 He mite pawl in a Lu khiah zainam lo i. Ikhalselai a Lu in ruangpumpui khiah ruh le thari thawn pehdun ai khang ruai i. Cia khanghnak khiah Pathian hnenin hleng i.
20 Ciamanin laivum dan songin Khrih thawn thi khat leisikhaw, zaimanin laivum ah nung lai bang in laivum dan ai khamhnak, 21 “‘Tok mah, cang mah, dai mah” ti ai 22 Minungte thukham le cukhnak khiah hlun i lai i si. (Ziangmanti fangin ciate khiah hmang ben fangin bo thai pawl i). 23 Laivum dan ai biatute le thinniam tuah kheltute le mahte veve ruang pumpui rim hnelhno tute khiah fimhnak naite bang inapui ai taksa pum ca ah zaikhai hnempui lo i.