1 Zisu Khrih hnenum Paul le Timothy hnenin, Filipi khua ai umtu Khrih Zisu songai thusangtute le bishop le pawl upate hnenah, 2 Kin Pa le Bawi Zisu hnenin ngaihharhnak le thinnuam hnak hleng tu seh. 3 Ning hih caang in i Pathian an de ing. 4 Ning ca in saw i ngen caang in anghnak thawn ngen de ing 5 A ngom ai panin tunnia tian kawspal thupha ca ai ning perhnak manin anghnak thawn ngen tio ing. 6 Cen he khiah umm rori ing: Ning lakai na pha a per pantu pa in Zisu Khrih hlengleh nia tianin a ben tianin per tuh i ti khiah umm rauh ing. 7 Hetih bang ai ning ruat tuh khiah a mawi i. Ziangmanti fangin i thin songah ning hih tio ing. Ziangmanti fangin i thawngtlahnak lakah le kawspal thupha ca ai i tawnghnak le i perhnak songah ning veksenin he ngaihharhnak naper lakah i per bawmtute i si. 8 Ziangmanti fangin Pathian khiah i tetti i: Zaitluk tamin Zisu ithnak thawn ning veksenin ning ngaai ing. 9 Cen ning ithnak khiah fimhnak le thukhan thiamhnak thawn a tam amam ai ning nai thai in saw ning ngen sah ing. 10 Ciafangin ningte in a phaber letlo thilte khiah ril thiam tuhai ningte khiah Khrih hlengleh fangin a rinsantlak le mawh nai lo in um tuh i si. 11 Ningte khiah Zisu Khrih ai dikcanghnak thingthai thawn ning dim tuhai ciafangin Pathian hnenah thangphathnak le anhnak cang tuh i si.
12 Ikhalselai ulenaute, ningte in ling i daihhnak khiah zai i ti fangin i vumah hlenghnakte khiah kawspal thupha zaaihnak le khanghnak ah cang so i. 13 Ciamanin Khrih manin i thawngtlahnak khiah kumpibawi inn ai umtute le nuamhmun caang ai mite in ling liang i. 14 Cen Bawipa thusangtu ulenaute khai i thawngtlahnak in raalpha ruai ai lau lo in Pathian thu khiah raalpha ngai in rel amam i. 15 A hrekkhatte in tu Khrih thu khiah iksik kong le engsan kong rin in rel i. Cen a hrekkatte in tu a pha thinlung thawn rel i. 16 A hrekkhatte in Khrih thu khiah thinlung ngaingai in rel lo ai i thawngtlahnak thawn a hlai in thin i cawl ruai tuhin amahte phathnak ca in rel i. 17 Ikhalselai a dangte in tu kaimah khiah kawspal thupha ca ai raaltawngtu i ti ling manin ithnak thawn rel i. 18 Ciailekhaw zai i? A paalkhel in Zisu thu rel ta in khai cen a hmanin rel ta in khai Khrih thu rel i. Ciamanin i ang ai i ang tuh tio i.
19 Ziangmanti fangin he khiah ning sawngenhnak in le Zisu Khrih bawmhnak in i luat ruai tuh i ti ling ing. 20 Zaizai in khai zak i thi ruai tuh lo ai ikhalselai pangam ngai in i thi le i nung in khai Khrih khiah i ruang pumpui in thangphat tuh khiah i zuamhnak le i ummhnak ber i. 21 Ziangmanti fangin kai ca ah i nunhnak khiah Zisu ca ah nung tuh ai i thi lekhaw kai ca ah i miat i. 22 Ikhalselai he taksa pumpui thawn nung hlen lengkhaw na pha tam amam per ngah tuh ing. Cen a konsawn ril tuh khai ling lo ing. 23 Ikhalselai he panih kualakah i taang meng i. Heta in thawnin Khrih thawn um khiah i nuam i. Ziangmanti fangin cia khiah pha sawn i. 24 Ikhalselai ning ca ah i taksa pumpui songah um tuh hlen khiah kul sawn i. 25 Ciamanin he khiah ling ing: Ning khangsohnak le sanghnak thawn ning anghnak ca in a nung in ningte thawn um tuh hlen ing. 26 Ciamanin ning tlawng leh fangin Khrih Zisu songah ning anghnak khiah tam amam in dim tuh i.
27 Ciamanin Khrih kawspal thupha thawn a phutua in lo nung tuu-ih. Ciafangin ning tlawng in ning hmu fangin i tu seh, cen ning hnenah um ta lo in khai ningte khiah thinkhat in a kho ngai ai ding ai thinkhat in kawspal thupha sanghnak lakah zuam tlang i ti ai ning za i nuam i. 28 Ning raalte in ning lau ruai ma seh. Ziangmanti fangin cia kawspal thupha khiah anite ca ah thihhnak hnikhnaihhnak i. Cen ning ca ah tu Pathian hnen ai hlenghnak ning luangtlanhnak i. 29 Ziangmanti fangin Khrih ca in ningte in amah khiah sang tuh lek i lo ai amah ca in rimsuhnak khai tuar tuhin khuan ning pe zo i. 30 Cia rimsu ning tuarhnak khiah i songah ning hmu awnghnak le tunin i songah um i ti ai ning zahnak rimsuhnak bang in tuar ve i hang i si.