1 Ning nung tuhin le ning zaai tuhin le BAWIPA in ning paate hnenah khamhnak ram khiah ning ping thillhnak tuhin tunnia ai ning ruaihnak thukham khiah a veksenin hlun tuhin ralring tuu-ih. 2 Cen BAWIPA ning Pathian in ning thin ning niam ruai tuhin le ning cu tuhin le ning thin songah ziang um i ti ning ling sah tuhin le a thukham khiah hlun le hlun tuh lo ning ling tuhin nelrawn songah he kum sawmli song ning fehpui i. 3 Ciamanin thin ning niam ruai ai ri ning kaam ruai ai ning paate le ningte in khai ling awng lohnak manna thawn ning cawm ai minungte in rong lek in nung tuh lo ai BAWIPA ka songai suakhnak pon thawn nung tuh i ti ning ling ruai i. 4 He kum sawmli songah ning thilthuam khai her lo ai ning ke khai phaw lo i. 5 Ciamanin a paa in a fa khiah tiam bangin BAWIPA ning Pathian in khai ning tiam i ti khiah ning thin songin ling tuu-ih. 6 Ciamanin BAWIPA ning Pathian thukham khiah hlun in a lampui ah vakin amah khiah kih tuh i si. 7 Ziangmanti fangin BAWIPA ning Pathian in lai ram pha ah ning kawih i. Cia ram ah rawnti le cirhti khiah mual le rawnin luang i. 8 Cia ramah sangvut le kawlkawn le capitti le thei le taleti le thau le khoitilu khai um i. 9 Cia ramah ei tuh rong ning sam tuh lo i. Zai khai ning sam tuh lo i. Cia ramah lungto te khiah thir i. A tlang songin darte khuar tuh i si. 10 Ei in rong ning kham fangin ram pha ning pe manin BAWIPA ning Pathian khiah hmuifu bur tuh i si.
11 BAWIPA ning Pathian khiah hai in a thukham le a thukhanhnakte le a dan upadite khiah hlun lo in um tuh khiah ralring tuu-ih. 12 Cialofang in ei in rong ning kham fangin le inn mawi ngaingai khiah sa in cia songah ning um fangin le 13 ning kawlpaw le ning tuute khiah zaai in ning ngun le ning suite khai zaai in ning naihhnak hmuah khiah zaai fangin 14 ning thin khiah puar in sal le cengfa inn Izip ramai ning suah tu le 15 khia a kau ngai le harsahnak le rul le momsir umhmun le ti um lo hmun ram ro nelrawn songah kong ning hoi ai lungto songin ti ning pe tu; 16 cen ning te in a pha khiah bawn tuhin thin ning niam ruai tuhin le ning cu tuhin ning paate ai ling awng lohnak manna thawn nelrawn songah ning cawmtu BAWIPA ning Pathian hai in, 17 ning thin songin, ‘I kut le i tha in milian i cang i.’ti in ruat tuh lo in ralring tuu-ih. 18 Ciafangin BAWIPA ning Pathian khiah hih tuu-ih. Ziangmanti fangin milian cang thillhnak tuhai power ning pe tu khiah Pathian amah i. Tunnia ai bangin ning paa te hnenah a khamhnak thukham khiah khim ruai tuhin ning pe i. 19 Ciafangin ningte in BAWIPA ning Pathian khiah hai in pathian dangte khiah hlun in amahte na khiah per sah in amahte khiah bia leisikhaw, ning rall tuh rori i ti in tunnia ah tetti ning khan ing. 20 Ningmah in BAWIPA ning Pathian aw khiah ngai ning nuam lo manin ning hlan ai mite khiah BAWIPA in hnawmcan bangin ning khai ning rall tuh sek i.