1 Ciafangin Moses in Israel mite a veksen khiah ko ai, “Aw Israel mite, ning zaak ai ning relhnak thukham le thukhan hnakte khiah ningte in zir in hlun tuhin ngai tuu-ih. 2 Bawipa kin Pathian in Horeb ah kinte thawn thu kin kham i. 3 Bawipa in cia thukham khiah kin paate thawn bawn lo ai tunnia tian a nungtu kin veksen thawn bawn i. 4 Bawipa in ning te thawn hmai le hmai ton in mai songin ning pon i. 5 Bawipa thu khiah ning rel tuhin kaimah khiah Bawipa le ning laklawh ah ding ing. Ziangmanti fangin ningte in cia ma i khiah ning lau ai mual vumah hong lo i si. Amah in,
6 ‘Kaimah khiah Izip ram sal le cengfa inn songai ning suahtu Bawipa ning Pathian ing.
7 Kaimah lo a dang pathian te nai tuh lo i si.
8 Ningmah ai tuhin van vum ai le laihnia ai le laihnia ti song ai thil bang zuk khiah bawn tuh lo i si.
9 Cia zuk te khiah bia tuh lo i si. A na khai per sah tuh lo i si. Ziangmanti fangin Bawipa na Pathian kaimah khiah iksik thai Pathian ing. I huatu a paate sualhnak khiah a fate san san thum le san li tian in tlawng tuh ing. 10 Ikhalselai i it tute le i thukham hluntu mi thawng tampuite hnenah i ngaihhar hnak khiah hmuh ing
11 Bawipa na Pathian hming khiah zauhsuam tuh lo i si. Ziangmanti fangin a hming zauhsuam tu khiah Bawipa in zah tuh lo i.
12 Bawipa ning Pathian ai ning ruai bangin Sabbath nia khiah ul in cianghlim ruai tuu-ih. 13 Ni ruk songah na a veksenin per tuh i si. 14 Ikhalselai ni sarih nia tu na Bawipa na Pathian ai Sabbath nia i. Cia nia ah nangmah le na fapa le na fenu le na hnenum pasal le hnenum nupang le na kawlpaw cang le na lak le na suum le na kawl dawng ham songai um na mikhual aisu bangin khai na per tuh lo i si. Na hnenum pasal le nupangte khai ngangmah bang in com tu ve seh. 15 Izip ramah mi sal mi cengfa i awng ai Bawipa ning Pathian in huthawm lian ngai thawn ning suah khiah hih tuu-ih. Ciamanin Bawipa ning Pathian in Sabbath ning ul ruai i.
16 Nun na sau tuh in le Bawipa na Pathian ai na pehnak ramah nun na nuam tuhin Bawipa na Pathian in ning ruai bangin na paa le na nuu khiah zul tu.
17 Mi rek tuh lo i si.
18 Nu le pa sual bawn tuh lo i si.
19 Ruko tuh lo i si.
20 Na ompui lakah thudon in tettikhan tuh lo i si.
21 Na ompui nu khiah ir tuh lo i si.Na ompui inn le lo le a pasal hnenum le a nupang hnenum le a kawlpaw le a naihnak zai bang thilri khai ot tuh lo i si.’ti in ti i.
22 He thute khiah mual tlaang vumah mai le mairo le khuathimbik songin Bawipa in ning pawlpui veksen hnenah aw cawm ngai in ning rel ai cia khelleh ah zai khai belh lo i. Ciaben fangin lung tlep panih vumah ngan ai cia tlung tlepte khiah i pe i.
23 Ciafangin mualpui khiah mai in kang lakin khuathim songin aw khiah ning za fangin ning hin lakai le ning upate khiah i nong ah kawi i si. 24 Ciafangin ningte in, ‘Bawipa kin Pathian in a thangphathnak le a lianhnak khiah kin hmuh zo ai mai songin a aw khiah zazo i ing. Tunnia ah Pathian in minung thawn pondun ai minung pa khai nung hlen khiah hmu i ing. 25 Ciamanin zaimanin kin thi tuh i? Ziangmanti fangin he maipual pui in kin kang tuh sio i. Kin Bawipa kin Pathian aw khiah za lai le ingkhaw kin thi tuh i. 26 Ziangmanti fangin a nungmi Pathian aw khiah mai song in pong khiah kin bangin za in a nungngio tu aisu um i? 27 A nongah kawi tulai Bawipa kin Pathian relhnak hmuah a veksenin ngai tulai Bawipa kin Pathian ai na relhnak hmuah kin rel tulai hlun tuh i ing.’ ti in i rel i si. 28 Ciafangin i hnenah ning relhnak khiah Bawipa in za ai Bawipa in i hnenah, ‘He mite in na hnenah na relhnak aw khiah zazo ing. Amahte pong bangin hman i. 29 Amahte in cia bang thinlung khiah nai in i kih in a catlo in i thukham khiah hlun sio selai amahte le a fate khiah kumzangza in nunnuam tuh napui ze i. 30 Amahte hnenah kawi tulai, ‘ning buk ah tlung tuu-ih,’ti in rel tu. 31 Ikhalselai nangtu heta i hiang ah ding tulai amahte ping tuhin i pehnak ramah hlun tuhin cuk tuhin i thukham le i dan upadi le i thukhanhnakte khiah na rel tuh ing,’ti in i ti i. 32 Ciamanin Bawipa ning Pathian ai ning ruai hnak bangin hlun tuhin ralring tuu-ih. Kiahhan lam le kekeh lamah lamtler tuh lo i si. 33 Ning ping tuhhnak ram ah nun ning sau tuhin le nunnuam in ning um tuhin Bawipa ning Pathian ai ruaihnak bangin a veksenin hlun tuu-ih.