1 Ciafangin Bawipa in i rel bangin kin khai let ai Tipui San lam Lampui in nelrawn songah feh ai Seir Mual khiah ni tampui hel i sing. 2 Ciafangin Bawipa in i hnenah, 3 ‘He mual khiah a rai ngai hel zo i si. Saklam ah feh tuu-ih. 4 Mite hnenah, ‘Seir ai umtute Esau tesin fate ning unaute ram khiah tan tuh i hang i si. Amahte in ning kih tuh i. Ciamanin a kungniu in ningmah veve sik tuu-ih. 5 Amahte khiah hnaihnok mah ih. Ziangmanti fangin amahte ram khiah ke khat bang khai ning pe tuh lo ing. Ziangmanti fang in Seir Mual khiah Esau ai co tuhin pe zo ing. 6 Ning ei tuh rong khiah amahte hnenah tangka thawn lai tuu-ih. Ning ding tuh ti khiah amahte hnenah tangka thawn lai tuu-ih. 7 Ziangmanti fang in Bawipa ning Pathian in ning kut ai perhnak hmuahhmuah song ah hmuifu ning bur zo i. He nelrawn pui songai ning vakhnak khiah ning ling i Bawipa khiah ning thawn in he kum sawmli um zo i. Zaikhai ning sam awng lo i.”ti in rel tu.’ti in i rel i.
8 Seir ai umtu Esau tesin fate kin unaute khiah kin khel ben ai zawllai hmun lam le Elath le Ezion Keber khiah khel ben fangin ciata in let ai Moab nelrawn lampui in khel i sing. 9 Ciafangin Bawipa in i hnenah, ‘Moab te khiah hnaihnok mah ih. Cen tawng khai tawng mah ih. Ziangmanti fangin amahte ram khiah ping tuhin ning pe tuh lo ing. Ziangmanti fangin Ar khiah Lot tesin fate ai ping tuhin pe zo ing.” ti in i rel i.” ti in rel i. 10 (Ciata ah Emim mite khiah lo um awng i. Cia mite khiah Anakim te bangin lian ai a tamngai um awng i. 11 Amahte khiah Anakim te bangin tlami inapui ai Moab te in Emim ti in ko i. 12 Hor te khiah Seir ah um awng napui ai Esau tesin fate in hnawt berh ai amahte khiah hnawmcan berh le Israel mite in Bawipa ai pehnak ram khiah khuato bangin anite khai cia ram ah khuato ve i.) 13 Ciafang in Bawipa in, ‘Tho tu i lai Zered Rawn zawllai khiah tan tuu-ih.’ti in kin ti i. Ciamanin kin khai Zered Rawn zawllai khiah tan i sing. 14 Kadesh Barnea in Zered Rawn zawllai kin tan tian khiah kum sawmthum le kum riat kin rai i. Cia kum sawmthum le kum riat songah Bawipa in amahte hnenah thukham bangin Isarel camp song ai raalkapte hmuahhmuah khiah thi sio i. 15 Ziangmanti fangin Bawipa kut in amahte khiah tawng ai amahte khiah a vek in bo hlan lo amahte khiah hnawmcan i.
16 Raalkapte khiah a veksenin Israel mite songin thi fangin 17 Bawipa in i hnenah, 18 ‘Tunnia ah Moab te ramri Ar tan tuh i si. 19 Ammon mite hnenah na nong fangin amahte khiah hnaihnok mah. Ziangmanti fangin amahte ram khiah ping tuhin na pe tuh lo ing. Ziangmanti fangin cia ram khiah Lot tesin fate ai ping tuhin pe zo ing.’ti in i rel i. 20 (Cia ram khiah tlami te ram ti in ko awng i. Cia ramah tlamite um awng i. Ikhalselai Ammon mite in Zamzummim ti in ko i. 21 Amahte khiah Anakim te bangin lian ai a sang khai sang ai a tam khai tamngai um awng i. Ikhalselai amahte khiah amahte hlanah hnawmcan sek ai amahte in cia ram khiah ping sah ai amahte umhmunah um sah i. 22 Esau tesin fate hleng hlanah Bawipa in Seir ai umtu Esau tesin fate ca in Hor mite khiah hnawncan bangin Bawipa in Zamzummim te khai bawn ve i.Anite in amahte khiah hnawt ai amahte umhmunah tunnia tian in um i. 23 Cen Gaza tianai umtu Avim te khai Kaphtor ai umtu Kaphtor mite in hnawmcan ai amahte umhmunah um i.)
24 Tho tu i lai fehin Arnon Run khiah tan tuu-ih. Sik tuu-ih. Heshbon kumpibawi Amor mi Sihon le a ram khiah ning kut ah ning pe zo ing. A ram khiah long pan tu i lai amah khiah tawng tuu-ih. 25 Vanhang hnia hmuahhmuah ai mi phun hmuahhmuah vumah ning kih le ning lau tuhin dah tuh ing. Ning thu khiah ning za sah tuhai, amahte khiah ningmah manin thing tuh biakbo ai thincawl in um tuh i.
26 Ciafangin Kedemoth nelrawn in Heshbon kumpibawi Sihon hnenah nalaang te khiah remhnak thu thawn hlat ai, 27 ‘Na ram songin i khel siang tu; Lampui vum lekin vak tuh rori i ing. Kiahhan lam le kekeh lamah feh tuh lo i ing. 28 Ei tuhin rong le ding tuhin ti khiah tangka thawn lai tuhin i zuarh tu. Ke thawn i khel siang tu. 29 Seir ai umtu Esau tesin fate le Ar ai umtu Moab mite in i siang bangin Bawipa kin Pathian ai kin pehnak ramah Jordan i tan hlan lo i khel siang tu.’ ti in kuat ing. 30 Ikhalselai Heshbon kumpibawi Sihon in kin khel siang lo i. Ziangmanti fangin Bawipa ning Pathian in tunnia ai bangin amah khiah ning kut ah ning ap nuam in a thin khiah ruh ruai ai cimphur in um ruai i. 31 Ciafangin Bawipa in i hnenah, ‘Sik tu. Sihon le a ram khiah na pe pan i hang ing. A ram khiah co tuhin ping pan tu hang.’t i in i rel i. 32 Ciafangin Sihon le a minungte in kin tawng tuhin Jahaz ah feh i. 33 Ciafangin Bawipa kin Pathian in amah khiah kin kut songah kin ap manin amah le a fate le a minungte khiah neh i sing.
34 Ciateng in amahte khuate khiah lang sah sio ai pasal, nupang le naupang te khiah khua cang ah a veksenin rek sio ai pakhat bang khai taang lo i. 35 Kinmah ping tuhin amahte suum le a khuate lek lang sah i sing. 36 Arnon Run hiang ai Aroer in le rawn lakai khua songin Kilead tian in kin neh ben lohnak khua um bul lo i. Bawipa kin Pathian in a veksenin kin hnenah kin kawih sah sio i. 37 Ammon mite ram hiang le Jabbok Run le mual lakai khuate hiang le Bawipa ai kin kawi sianglo hmun ram lekah kawi lo i si.