1 Bawipa ning Pathian in ning co tuhai ning pehnak amahte ramai umtute khiah ning hnawt sah in ningte in amahte khiah hnawt in amahte khua le amahte innah ning um fangin, 2 Bawipa ning Pathian ai ning pehnak ram songah ningmah ca tuhin khuapui pathum khiah a tumce in dah tuh i si. 3 Ningte in lampui khiah cek tuhai roco tuhai Bawipa ning Pathian ai ning pehnak ram khiah hmun thum in khanin ciata ah mirektu pa khiah tlan tu seh.
4 Mirektu pa khiah nung thai hnak tuhin a thu khiah he bang i: A ompui khiah hua awng napui lo ai a tuum lo in rek ngah pang lekhaw, 5 thuthimhnak in cia pa le a ompui pa khiah hampalak ah thing vong tuhin feh kawmin, cia pa in haihpui thawn thing vong fangin haihpui lu khiah peu teu in a ompui pa khiah khaa in cia pa khiah thi lekhaw, cia pa khiah hete khua pakhat khat ah tlan tu selai nung tu seh. 6 Cialo fangin a hlanah a ompui khiah hua awng lo manin amah khiah rek mawi napui lo in, a phuzul tu pa in a thinraw ze in cia pa khiah hnawhin lam hla ze manin man lio in rek ngah thai i. 7 Ciamanin ning rel ing: ‘Ningmah ca in khua pathum khiah a tumce in dah tuh i si.’ 8 Bawipa ning Pathian in ning paate hnenah kham bangin ning ram khiah kau ruai in ning paate hnenah pe tuhin a kham hnak ram khiah ning pe lekhaw, 9 cen he thukhamte khiah a veksenin hlun in bawn in i ruaihnak bangin Bawipa ning Pathian khiah it in a lampui khiah hlun tio leisikhaw, cen khuapui pathum vumah a dang pathum belh tuu-ih. 10 Cialo fangin co tuhin Bawipa ning Pathian ai ning pehnak ramah mawh nai lo pa thi khiah luang tuhai cia thi vumah ning mawh tuh i. 11 Ikhalselai mi pakhat in a ompui khiah hua in, amah khiah bawh in amah khiah tawng in rek in thi in a rektupa khiah he khuapui pakhat khat ah tlan lekhaw, 12 khua upate in amah khiah cia khua in lang tuhai, a phuzultu pa kutah ap in amah khiah thi tu seh. 13 Amah khiah ninghio tuh lo i si. Ikhalselai nun ning nuam thai in mawh nai lo thi luang ruaihnak mawh khiah Israel ram songin ciatih bangin ciang ruai tuh i si.
14 Bawipa ning Pathian ai ping tuhai ro ning pehnak ning co fangin hlanmi te ai dahhnak ning ompui ramri khiah thawn sah tuh lo i si.
15 Mi pakhat ai sualhnak le mawhhnak khah tetti pakhat lek in khan ma seh. Tetti panih le pathum kaa songin kho ruai tu seh 16 Mi pakhat in thudon pui in mi pakhat khiah mawhhluk lekhaw 17 ciate panih khiah Bawipa hmai ah le ciateng ai phungki le thukhantu tuantu te hmaiah ding kawm tu seh. 18 Thukhantute in a kungniu in a thu zong tu selai cia tettikhantu pa khiah thudon in a unau khiah mawhhluk lekhaw 19 amah in a unau hnenah bawn tum bangin amah vumah bawn tuh i si. Ciatih bangin cia mi sual pa khiah ning hnenin rek tuh lio i si. 20 Ciafangin a taangtu mite in za tuhai lau tuh le cia bang sual khiah ning lakah bawn tuh lo i. 21 Amah khiah ninghio tuh lo i si. Ikhalselai nunhnak khiah nunhnak thawn, mit khiah mit thawn, kaam khiah kaam thawn, kut khiah kut thawn, ke khiah ke thawn rul tuh i si.