1 Levi hin hmuahhmuah song ai phungkite in Israel mite thawn covo le rothil nai tuh lo i. Bawipa hnenah hluhnak le Bawipa covo khiah amahte in co tuh i. 2 Ciamanin amahte in Israel mite lakah rothil nai tuh lo i. Bawipa ai amahte khiah rel bangin Bawipa khiah amahte rothil i. 3 He khiah mi zapui hnenai raithawi ai hluhnak kawlpaw le tuu khiah phungki pa in ping tuh i: sa kodar le a biang le a hu khiah phungki pa pe tuh i. 4 Ning rongthar a hmasa ber le ning capittizu thar le ning thau le ning tuu hmul a hmasaber methnak khiah amah pe tuh i si. 5 Ziangmanti fangin Bawipa ning Pathian in amah le a fate khiah ning hin songin kumzangza Bawipa hmai ah ding in Bawipa hming in na per tuhin ril zo i.
6 Cen Levi mi pakhat khat khiah Israel ai ning um hmun in thawnin Bawipa ai ril hnak hmunah a thin ngaingai in nuam manin kawi lekhaw 7 ciata ai umtu a unaute in Bawipa hmai ah ding bangin ani khai a Bawipa a Pathian hming in per tu ve seh. 8 A rothil zuar ai ngahhnak tangka ai zo lo ah amahte in a camra ten in ei tuh nai tu seh.
9 Bawipa ning Pathian ai ning pehnak ram ah ning hleng fangin cia mi phunte ningdulkul thil khiah zir tuh lo i si. 10 Ning lakah aisu in khai a fapa le a fenu khiah mei songah lon tu um ma seh. Cen mihuai le tlahsan thiam le kut sik thiam le khuavang power hmang te le 11 mi dawi thai tu le mi rauhla thawn pong thiam tu le mi thi te thawn pong thiam tu te khiah ning lakah um ma seh. 12 Ziangmanti fangin he bang bawn tute khiah Bawipa in ningdul i. He ningdulkulte manin amahte khiah Bawipa ning Pathian in ning hlanin hnawt sio i. 13 Bawipa ning Pathian hmaiah mawhhluk tuh um lo in um tuh i si. 14 Ziangmanti fangin ningte ai ning hnawt tuhhnak he miphunte in tlahsantute le hmailam thu rel tute thu khiah ngai sah i. Ikhalselai ningte ca ah Bawipa ning Pathian in cia bang mi ning dah sah lo i.
Moses bang Profet thar
15 Ning unaute songin Bawipa ning Pathian in kaimah bang Profet pakhat suak ruai tuh i. A thu khiah ngai tuh i si. 16 He khiah ningte in Horeb ah ning tai tlang fangin Bawipa ning Pathian hnenah, ‘Bawipa i Pathian aw khiah i za ruai ma hang. Cen he meipual pui khai i hmu ruai ma hang; cialofangin i thi mawh ngai.’ ti ai ning ngenhnak bangin khim i. 17 Ciafangin Bawipa in i hnenah, ‘Amahte relhnak khiah pha i. 18 Amahte unau songin nangmah bang Profet pakhat khiah suak ruai tuh ing. A ka songah i thu khiah dah tuhai i ruaihnak bangin amah in amahte khiah thurel tuh i. 19 Cia Profet in i hming ai relhnak i thu ngai nuam lo tu pa khiah kaimah in thucit tuh ing. 20 Ikhalselai profet pakhat in kai in rel ruai napui lo ai i hming in thu rel lekhaw, cen a dang pathiante hming in thurel lekhaw cia profet khiah thi kul tuh i. 21 Cen ning thin songin, ‘Bawipa ai rel lohnak thu khiah a kontih in thia thiam tuh i sing?’ti in ruat leisikhaw, 22 profet pa in Bawipa hming in thurel in a relhnak bangin khim hlahlekhaw cia thu khiah Bawipa ai rel hnak thu i lo i. Profet pa in amah hlanlam ai relhnak thu i. Amah khiah kih tuh lo i si.