Fate, Paate le Hnenum le Bawite tavaun
1 Fate, ning nuu le paate thu ngaai tuu-ih. Ziangmanti fangin cia khiah a hman i. 2 Na paa le na nuu zul tu. Cia khiah lehsawng nai thukham hmasaber i. 3 Ciafangin ningte khiah ning cak tuhai laivumah ning nun ning sau tuh i. 4 Cen ning, paate: Ning fate khiah thinraw tuhin tok hnelhno mah ih. Ikhalselai Bawipa thu khiah zirh in tiam tuu-ih. 5 Hnenumte, laivum ai ning bawite khiah lau kong le thingderdo kong in a thungaai tuu-ih. Ning thinkhat in Khrih thungaai bangin amahte thu khiah ngaai tuu-ih. 6 Mite ang ruai tuhin mite mit hmuh fang ianin per lo in Khrih hnenum bangin Pathian daihhnak khiah ning thinkhat in per tuu-ih. 7 Minung ca ai per lo ai Pathian ca ai per bangin ang kongin per tuu-ih. 8 Aisu hmuah hmuah i tu seh, hnenum i tu seh, bawi i tu seh a pha bawntute khiah Bawipa in hlawhtham tuh i. 9 Cen ning, bawite: Ningte in khai hnenumte hnen ah ciabangin bawm tu ve ih. Amahte khiah hawk hnelhno in hau mah ih. Ziangmanti fangin ning Bawipa khai vancung ah um i ti ling i si. Cia Bawipa in aisu khai hmaisonhnak nai lo i.
Christiante Raalthilthuam
10 Cen a hruakhumhnak ah, ulenaute, Bawipa songah Bawipa thahathnak le Bawipa power thawn thahat in um tuu-ih. 11 Pathian raal thilthuam khiah a veksenin sil tu i lai manah thilthuam khiah a veksenin sil tu i lai manah ngian khiah tawng ben tuh i si. 12 Ziangmanti fangin taksa le thi naite thawn nangtawng dun i lo i sing. Ikhalselai acuzahte le powerte le he laivum khuathim uktu bawite le vanvum ai khuavangte power thawn tawngdun i sing. 13 Ciamanin Pathian raalthilthuam khiah a veksenin lang tu i lai ciafangin a pha lo niakhua ah tawng ben tuhai zai hmuahhmuah neh ben fangin ding ben tuh ngio i si. 14 Ciamanin thuhman khiah ning el ah pen in ding tuu-ih. Ning sohnar khiah dikcang hnak thawn khuk tuu-ih. 15 Ning ke ah remhnak kawspal thupha dawl tuu-ih. 16 Ciaben fangin sanghnak lum keng tu i lai cia lum thawn a phalote maibang conkiang te khiah a veksenin kham ben tuh i si. 17 Ohnak lukhuk khu in Ciang Rauhla vangsau Pathian thu khiah lang tuu-ih. 18 Ciang Rauhla songah siarmawti in sawngen in midang ca khai kun sah tuu-ih. Thinsau ngai in tuar in ralring in umin thusangte veksen ca in ninghio kun sah tuu-ih. 19 Cen kaimah in khai kawspal thupha ngaihsun urkul thuthup khiah ling ruai tuhin pangamngai in rel ngam thill thai in saw i nget tuu-ih. 20 Cia kawspal thupha ca in thirri thawn henhnak nalaang ing. I pong ca bangin pong ngam thai in saw i nget tuu-ih. 21 Ikhalselai i thu le i umdan ning ling thillhnak tuhin ithnak unau le Bawipa tazahaw saza a rinsantlak Taikhikus in a veksenin ning rel tuh sio i. 22 Ningte in kin thu ning ling fangin thin ning nuam thai in amah khiah cia ca in ning hnen ah ning kuat ing. 23 Pa Pathian le Bawi Zisu Khrih hnenin thinnuamhnak le ithnak khiah sanghnak kawm in ulenaute hnenah hleng tu seh. 24 A ngaingai in kin Bawi Zisu Khrih ittute vumah ngaihharhnak um tu seh. Amen.