1 Rocotu khiah zai hmuahhmuah naitu tu i napui ai a naupang laitak in hnenum thawn zaikhai dangdun lo i. 2 Ikhalselai a paa ai tuatciahnak a cuu khim hlan hmuah cia fa khiah a saza le a uktute kuthnia ah um hlen i. 3 Ciabangin kinte khai kin naupang lai in laivum thilrite kuthnia ah thawngtla in um i sing. 4 Ikhalselai a cuu khim fanginm a Fapa khiah nupang songin le Thukham songin te ruai i. 5 Cia khiah Thukham songai umte luangtlan tuhin le kinte in fate bangin cawmhnak ngah thaihnak tuhin ciatih bangin a Fapa te ruai i. 6 Ningte khiah Pathian fate ning i manin Pathian in a Fapa Ciang Rauhla khiah kin thin songah hleng ruai ai ciamanin “Abba, i Pa,” ti in ko i sing. 7 Ciamanin ningte khiah hnenum i nawn lo ai fate i hang i si. Cia a fate ileisikhaw Khrih songin Pathian rocotute i si.
8 Ikhalselai Pathian khiah ning ling awng lo fangin Pathian i lo thilte hnenum cang awng i si. 9 Ikhalselai tuntu ningte in Pathian ling zo manin, ihlahle Pathian sawnin ning ling zo manin a kontihai thanailo zaitlaklo thilte hlun leh i si? Zaimanin ciate kuthnia ah hnenum cang leh thio i si? 10 Nikhua le hla le a cuu le kumte khiah ul hnelhno i si. 11 Ning lakah i naperhnak khiah a lovang cang te i nim? ti in thin i lau de i. 12 Ulenaute, kaimah khiah ningte bang ing. Ciabangin ningte khai kaimah bang i tuu-ih. Ningte in i ur ruai lo i si. 13 Ikhalselai ruang pumpui urhnak thawn kawspal thupha khiah a hmasaber taza ning haw awng khiah ling i si. 14 I urhnak manin ningte in nau khai i tat lo ai hua khai i hua lo i si. Ikhalseliai Pathian vancung mi bangin le Khrih Zisu amah rori bangin i ruat awng i si. 15 Ning relhnak ning anghnak tu a konah i hang? Ziangmanti fangin thill selai ning mit rin khai tuh lio ai i pe tum i si ti khiah tetti khan ing. 16 Thuhman ning rel manin ning raal i cang i awm? 17 Amahte in ning rual rem cang tuhin zuam ngai i. Inapui ai ning phathnak tuhin i lo i. Amahte nuamhnak tu ningte khiah kin thawnin ning kaang ruai nuam i. Ciafangin ningte in amahte cain zuam ning daih i. 18 Phathnak lamah zuam tuh khiah a pha i. Cen kaimah um fang ian in i lo in i um lo fangin khai zuam pha tio i. 19 I fate, Khrih khiah ning songah a po hlanlo, naukai bangin um leh thio ing. 20 Ikhalselai tunin zaitluk in ning hnenah um in i ponka thleng i nuam napui i. Ziangmanti fangin ningte lakah ngaihsun i ur i.
21 Thukham songah um nuamtute, i rel tu cuk ih. Thukham za lo i sim? 22 Ziangmanti fangin hetih in ngan zo i: Abraham in fapa panih nai i. Pakhat khiah a hnenum nuu songin tehnak fapa i. A khatta tu a luatnuu songai tehnak fapa i. 23 Ikhalselai hnenum nuu ai fapa khiah minung danai tehnak i. Ikhalselai a luatnuu songai tehnak tu a kamhnak thu bangai tehnak i. 24 Ciate khiah santehhnak i. Ziangmanti fangin Thukamhnak panih um i. Pakhat tu Sinai ai hlenghnak Thukham i ai mi hnenum cangruai tu i. A hming khiah Hakar i. 25 Hakar tihnak khiah Arabia ponin Sinai i ai Jerusalem thu ngai i. Tunin cia Jerusalem khiah a fate thawn mite sal cang i. 26 Ikhalselai vancung ai Jerusalem tu aisu in khai uk lo i. Cia Jerusalem khiah kin veksen ai kin nuu i. 27 Ziangmanti fangin, “Nang fatongnuu, ang tu. Naukai anh lotu nuu aw cawm thawn au tu. Ziangmanti fangin fatongnuu in pa nai nupui tahin fate tamsawn nai i.” ti in ngan zo i. 28 Ulenaute, Aizek bangin kinte khai thukamhnak fate i sing. 29 Ikhalselai minung danai tehnak pa in Ciang Rauhla ai tehnak pa khiah siatsuah bangin tunin khai i ve i. 30 Ikhalselai Lai Cianghlim in kontihin rel pa? “Misal nuu le a fapa khiah hnawt tu teu. Ziangmanti fangin misal nuu fapa in a luatnupui fapa thawn roco khat tuh lo i.” ti in rel i. 31 Ciamanin ulenaute, kinte khiah misal nuu fate i lo ai a luatmi nuu fate i sing.