1 Ciafangin a hnuahlunte khai zaai fangin Krik Judah thusangte in Hebru thusang tute lakah cam liang lo i. Ziangmanti fangin Krik hmaitongte khiah ni siar in rong lamah a phantak in lo zem lo i. 2 Ciafangin hlainihte in a hnuahlunte tamngai khiah ko ai, “Kinte in Pathian thu khiah rel awl in, cabuaithu ai um tuh fai lo i. 3 Ciamanin ulenaute, ningte lakai mi dikcang le Ciang Rauhla le fimhnak thawn ai dimtute ril tu i lai he rong zemtu tuh in haih nga ing. 4 Ikhalselai kintu zomzet in sawngen le Pathian thurel in um tuh i ing.” ti in ti i. 5 Anite relhnak khiah mi a veksenin lungkhim tlaang le sang kho ngai le Ciang Rauhla thawn ai dim tu Stephen, Filip le Prokhorus le Nikanor le Timon le Parmenas le Antioch ai Judah dan hluntu Nikolas khiah ril ai, 6 Apawstalte hmai ah dah ai amahte in sawngen ben fangin amahte vumah amahte kut dah i. 7 Pathian thu khiah khang ai Jerusalem ah hnuahlun tam rauh in khang i. Phungki tamngai in khai sang ve i.
8 Stephen khiah sanghnak le power thawn dim ai mite lakah ngaihsunurkul lian ngaingai bawn i. 9 Ciafangin Miluat Pawl tihnak Sairin mi le Alexandria mi le Cilicia le Asia mi pawl khat khai tho ai Stephen thawn thu el dun i. 10 Ciafangin anite in Stephen fimhnak le Ciang Raula thawnai a thurel hnak khiah neh ben lo i. 11 Ciafangin amahte in a thupniu in mite kawih ai, ciate in, “Stephen in Moses le Pathian zauhsuamhnak pon pong za i ing.” ti in rel i. 12 Ciatih in mite le mi upate le upadi dan cuktu sazate thin so ruai ai, Stephen hnenah kawi le amah khiah pom ai council hmai ah kawih i. 13 Amahte in thudon tettikhan tute khiah kawih ai, ciate in, “He pa in he cianghlim hmun le upadi dan thu lakah ponsia pong tio i. 14 Ziangmanti fangin ‘he Nazareth Zisu in he hmun khiah hnawm ruai tuh ai, Moses ai kin hluphnak dan khai thleng tuh i.’ ti in rel za i ing.” ti in ti i. 15 Council ai to tute in amah khiah sik meng fangin Stephen hmai khiah vancung mite hmel bangin hmu i.