Thaze pa cakruaIhnak
1 Zanlam nazi pathum sawngen cuu fangin, Peter le John khai temple ah kawi kawm i. 2 Ciata ah a nuu songai panin thaze ai te hnak mi pakhat um ai temple ah kawitute hnenin thil ngen tuhin temple ai a Mawi tihnak dawngkham ah nisiar in zau de i. 3 Cia pa in Peter le John temple songah lut tum hmu fangin thil ngen i. 4 Ciafangin Peter khai John thawnin cia pa khiah sik meng ai, “Kin sik tu.” ti in ti i. 5 Cia pa in khai anite hnenin thil ngah tuh vuah in amahte khiah sik i. 6 Ciafangin Peter in, “Ngun le sui nai lo ing. Ikhalselai i naihnak na pe ing: Nazareth Zisu Khrih hming in tho tu.” ti in ti i. 7 Ciafangin Peter in cia pa khiah a kiahhan kut in lang ai daang le cia pa khai a ke le a titiruh te khiah cak vut ai, 8 Ani khai tho ai ding le vak le amahte kawm in temple songah vak kong le dawk kong le Pathian cuan kongin lut i. 9 Mi veksenin amah khiah lam vak kongin Pathian cuan hmu ai, 10 amah khiah temple ai a Mawi tihnak dawngkham ah a hlu ngen tu pa i ti ling manin cia pa vumah cang hnak manin ngaihsunur le multing in um tlaang i. 11 Ciafangin cakruai liohnak cia thaze pa khai Peter le John kut awh in um fangin mi veksen khai Solomon kawkaa tihnak kawkaa ah amahte hnenah hmunkhat in ngaihsunur kongin dawp tlaang i. 12 Peter in cia khiah hmu fangin amahte hnenah, “Ning Israel mite, zaimanin he manin ngaihsun ning ur i? Cen kin power le kin cianghlimhnak manin he pa khiah lamvak ruai tatluk bangin zaimanin kin sik meng i si? 13 Abraham le Aizek le Zakuk Pathian le kin papuite Pathian in a Fapa Zisu khiah thangphat zo i. Cia Zisu khiah Pilate in hlat tum fangin ningte in Pilate hmai ah Zisu khiah hnawl ai Pilate kutah ap i si. 14 Ikhalselai ningte in a Cianghlim le a Dikcang Pa khiah hnawl ai mi rektu pa sawn ning hnenah hlat ruai ai 15 Nunghnak Bawipa khiah rek i si. Inapui ai Pathian in amah khiah thihhnak in tho ruai leh ai kinte in tettikhan i ing 16 Amah hming le a hming sang manin he pa cakruai khiah ningte in hmu ai ling i si. Zisu hnenai hlenghnak sanghnak in he pa khiah ningte mithmuh in cakruai i. 17 Cen ulenaute, ning uktute bangin ningte in ling lo manin ciatih ai bawn i si ti khiah ling ing. 18 Ikhalselai ciate khiah Khrih in tuar tuh i ti in prawfet veksente kaa songin Pathian in lo hmuh ciahnak bangin khim i hang. 19 Ciamanin ningte in sir tu i lai, ning thin thleng tuu-ih. Ciafangin ning sualhnak ning phiat sah tuh ai Bawipa Pathian hnenin thinlung tharhnak tikcu hleng tuh i. 20 Ciafangin ning hnenah tazahawhnak Zisu Khrih khiah hlat tuh i. 21 Ikhalselai tuntu laivum po khelleh ai panin a cianghlim prawfette kaa song in Pathian in rel awng zo bangin, zai hmuahhmuah a rem ben hlan lo vancung ah um tuh hlen i. 22 Ziangmanti fangin Moses in kin paate hnen ah, “Ning ulenaute hnenah Bawipa ning Pathian in kaimah bang Prawfet pakhat suak ruai tuh i. Ning te in amah relhnak hmuah ngai tuh i si. 23 Cia Prawfet pa relhnak thu ngai lo te khiah mite lakin rek tuh i.” ti in rel zo i. 24 Cen Samuel ai panin prawfet hmuahhmuah le cia nikhuate reltu hmuah in ciatih bangin rel zo i. 25 Ningte khiah cia prawfette fate le Pathian in kin paate thawn ai Abraham hnenah thukhamhnak, ‘Na cii songin laivum mi hmuahhmuah hmuifu bur tuh i.’ ti ai relhnak thukham fate i si. 26 Pathian in a Fapa Zisu tho ruai leh ai ning sualhnak hmun in ning veksenin sir hnak tuh hmuifu ning bur tuhin ningte hnenah hlat hmasa i.” ti in rel i.