1 Ni nga ben fangin phungki upa Ananias khai mi upa hrekkhat le Tertullus tihnak siamahtu pa thawn hleng ai uktubawi hnenah Paul mawhhluk i. 2 Paul khiah ko fangin Tertullus in amah mawhhluk pan ai, “Felix a pha ber, nangmah manin dai niu in um i ing. Cen na ruathiamhnak manin he kin mi phun ca in thil tampui khiah a pha lamah thleng i. 3 Hmuahhmun ah le zaizongza ah lungdamhnak thawn sang i ing. 4 Ikhalselai na cuu ruai nuam lo manin, na ngaihharhnak thawn kin thu a tawite khiah na ngai tuhin na ngen ing. 5 Ziangmanti fangin he pa khiah hnaihnokhnak suak ruai pa i ti hmu i ing. Laivum hmuah ai Judah mite lakah thin hnaihnok ruai ai Nazareth pawl ai lamkai pa i. 6 Temple khai rim ruai tum ai ciafangin amah khiah pom i ing. 7 8 Nangmah in khai amah khiah thucit fangin kin mawhhlukhnak hmuahhmuah khiah a hman i ti ling tuh i.” ti in ti i. 9 Judah mite in khai amah khiah hruai ai hete khiah a hman i ti in ti i. 10 Uktubawi pa in Paul khiah pong ruai fangin Paul in, “Kum tampui song he mi phun te thutantu na cang i ti ling manin i luat hnak thu khiah ang niu in rel tuh ing. 11 Pathian bia tuhin Jerusalem ah feh panin ni hlainih lek a si nai lo i ti nangmah in khai na ling thil i. 12 Cen amahte in temple songah aisu thawn thu el in i hmu awng lo i. Sanginn songah le khua songah mite hnaihnok ruai in khai i hmu awng lo i. 13 Cen tun ai i mawhhlukhnak hete khiah a hman i ti in na hnenah hmuh thil lo i. 14 Ikhalselai he thu khiah na hnenah sang ing: Amahte in pawl dang i ti in ko hnak Lampui bangin kin paate Pathian khiah bia ing. Moses Dan le profet ca-uk songai nganhak hmuah khiah sang ing. 15 Mi dik le mi pha lo te toleh hnak um tuh i ti in amahte in Pathian hnenah ruathnak um bangin kai in khai ruathnak nai ing. 16 Ciamanin Pathian le mite hmai ah thin lung a ciang niu in um tuhin zaizongza ah zuam ing. 17 Kum tampui ben fangin kaimah mi phun hnenah sumpai bawmhnak kawih tuh le hlu pe tuhin Jerusalem ah kawi ing. 18 Cia bawn teng fangin amahte in temple songah i hmu i. Judah dan bangin i ciang zo ai mi zapui thawn i lo ai hnaihnokhnak khai um lo i. 19 Ikhalselai Asia ram ai Judah mite hrekkhat um i. Amahte in i lakah mawhhlukhnak nai lekhaw nangmah hmai ah kawi in i mawhhluk tu i. 20 Aihle, heta ai umtute in council hmai ah i ding fangin i lakah zai sualhnak hmu i ti rel tu seh. 21 Amahte lakah i ding fangin, ‘A thite toleh hnak manin tunnia ah ning hmai ah thucithnak tuar ing.’ ti in aw lian ngai in i rel hnak lek lo khiah.” ti in ti i. 22 Felix in he Lampui thu khiah a pha ngai in ling manin amahte thu khiah sut ai, “Raalbawi Lysias hleng fangin ning thu ning ngai sah tuh ing.” ti in ti i. 23 Ciafangin raalbawi pa khiah Paul kilkhawl tuhin thu pe ai, amah khiah luat bial in um sah ai a lawmte in amah bawm hnak khai kham tuh lo in thu pe i. 24 Ni hrekkhat ben fangin Felix khai a zi Drusilla thawn kawi i. Drusilla khiah Judah mi i. Paul khiah ko ruai ai Khrih Zisu songah sanghnak thu khiah ngai i. 25 Paul in dikcanghnak le mah le mah uktu thiamhnak le kawi tuh thutannak thu khiah rel fangin Felix khai lau ai, “Tunin feh tulai. Cuu ngah fangin na ko leh tuh ing.” ti in ti i. 26 Cia kawmin Paul in tangka i pe tuh i ti in ruat manin a hnenah a tam thei za in ko ai thurel pui i. 27 Ikhalselai kum nih ben fangin Felix ai hmunah Porcius Festus kawi i. Felix in Judah mite lungkim sah nuam manin Paul khiah thawng songah hlat i.