1 Ciafangin Paul khai councilte khiah sik meng ai, “Ulenaute, tunnia tian Pathian hmai ah a dikcang ngai in nung ing.” ti in ti i. 2 Ciafangin phungki Ananias in a hiang ai ding tute khiah Paul khiah a kaa ah vit ruai i. 3 Ciafangin Paul in amah hnenah, “Pathian in na vit tuh i, si ngo in mathnak bangkhang pa. Upadi Dan bang in i thucit tuh in to lawm si ai, a dan lo in i vit ruai i sim?” ti in ti i. 4 Ciafangin a hiang ai ding tute in, “Pathian phungki zauhsuam i sim?” ti in ti i. 5 Ciafangin Paul in, “Amah khiah Phungki upa i ti lo ling lo ing. Ziangmanti fangin, ‘Ning uktute khiah siat tuh lo i si.’ ti in ngan zo i.” 6 Ikhalselai Paul in a hrekkhatte khiah Sadusi te i ai a hrekkhatte khiah Farasi te i ti ling fangin, councilte hnenah, “Ulenaute kaimah khai Farasi ing. Farasi fapa ing. A thite toleh hnak umm manin tunnia ah thucithnak tuar ing.” ti in ti i. 7 Ciath in a pong ben fangin Sadusi te le Farasi te khiah thu el dun ai mizapui khiah hmun nih in khan i. 8 Ziangmanti fangin Sadusi te in toleh hnak sang lo i. Cen vancung mi le rauhla khiah sang lo i. Ikhalselai Farasi te in hete khiah a veksen in sang liang i. 9 Ciafangin ciata ai pumkhawm tute khiah cai murh mo fangin, Farasi pawl song ai upadi dan cuktu saza te hrekkhat khai tho ai a thupui in el ai, “He pa lakah sualhnak hmu lo i ing. Rauhla i hlal le vancung mi in lo pon peu i selai, Pathian tawng pha lo i.” ti in ti i. 10 Ciath in a rauh ngai in thu el dunhnak suak fangin Paul khiah amahte in nuamthaih in hlik mawh dek ngai ti lau manin raalbawipa in raalkapte khiah Paul lang ruai ai barek ah kawih ruai i. 11 Ikhalselai cia zan ah Bawipa khiah Paul hiang ah ding ai, “Thin na man um tu. Ziangmanti fangin Jerusalem ah kai ca in tetti na khan bangin Rome ah khai tetti khan tuh i si.” ti in rel i.
12 Khuavar fangin Judah mite in Paul rek ngah hlan lo ei le ding lo in um tuh in amahte veve thukham dun i. 13 Ciath bangin thukham tute khiah sawm li zo lo i. 14 Ciate khai phungki upate le mi upate hnenah kawi ai, “Paul rek ngah hlan lo zai khai ei tuh lo in thukham dun zo i ing. 15 Ciamanin Paul khiah a lik a lak in thucit tuh bang in ning hnenah kawih tuhin raalbawipa khiah ningte le councilte in rel tu i lai kin in Paul khiah ning hnen hleng hlanah rek tuh lio i ing.” ti in ti i. 16 Ikhalselai Paul famu ai fapa Paul khiah amahte in bawh i ti za fangin ani khai barek ah feh ai Paul rel i. 17 Paul in raalbaute pakhat ko ai, “He tlangval pa khiah raalbawipa hnenah kawih tu. Ziangmanti fangin amah in raalbawipa hnenah than tuh thu nai i.” ti in rel i. 18 Ciamanin cia tlangval pa khiah raalbawipa hnenah kawih ai, “Thawngtla pa Paul in i ko ai he tlangval pa in na than tuh thu nai manin i kawih ruai i.” ti in ti i. 19 Raalbawipa in cia tlangval pa khiah a kut in awh ai a hiang ah kawih ai a thupniu in, “Zai i rel tuh nai i si?” ti in zong i. 20 Tlangval pa in, “Paul khiah a lik a lak in thucit tuh bangin councilte hnenah a thangha ah kawih tuhin Judah mite in na ngen tuh in sawm tlang i. 21 Ikhalselai lo sang mah. Ziangmanti fangin minung sawmli zolo khiah Paul rek ngah hlan lo ei nung sawmli zolo khiah Paul rek ngah hlan lo ei le ding tuh lo in amahte veve cukcam tlang ai le ding tuh nin ralring zo ai, na thukhamhnak na iang.” ti in rel i. 22 Ciamanin raalbawipa in tlangval pa khiah feh ruai ai, “Nang in he thute i rel mah.” ti in tiam i. 23 Ciafangin amah raalbawi panih ko ai, “Tun zan nazi pakua fangin Sisaria ah feh tuhin raalkap zanih le siphuh tu mi raalkap sawm sari le faipui phur mi zanih ralring tu. 24 Cen Paul to tuhin siphuh khai ralring tulai Paul khiah uktu bawi Felix hnenah a him niu in fehpui tu.” ti in thu pe i. 25 Ciafangin hetih bang in lai ngan i: 26 Claudias Lysias in, 27 He pa khiah Judah mite in pom ai rek tuh zo napui i. Ikhalselai amah khiah Roman minung i ti ling manin raalkapte thawn amah khiah luat ruai ing. 28 Amah lakah mawhhlukhnak khiah ling i nuam manin amahte councilte hnenah kawih ing. 29 Ciafangin amahte ai mawhhlukhnak tu amahte dan thawn senghnak lo i ai rek tlak le thawnghla tlak ai mawhhlukhnak zaikhai um lo i. 30 Cen amah khiah Judah mite in bawh i ti i rel manin amah khiah nangmah hnenah na kuat vut ai a mawhhluktute khai na hmai ah amah khiah mawhhluk tuhin thu pe ing.
31 Ciafangin raalkapte in amahte relhnak bangin Paul khiah lang ai zanlai in Antipas ah fehpui i. 32 A thangha fangin siphuh to tu raalkapte khai Paul thawn feh ruai ai amahte tu barek ah let leh i. 33 Ciate khai Sisaria ah hleng fangin cia lai le Paul khiah uktu bawi hnenah pe i. 34 Uktu bawipa in cia lai siar ben fangin Paul khiah a kon ram mi i si ti in zawt i. Silicia ram mi i ti ling fangin, 35 “Na mawhhluk tu te hleng fangin na thu na ngai sah tuh ing.” ti in rel i. Ciafangin Paul khiah Herod thukhan hmun khaan songah um tuh in thu pe i.