Bawi Zisu le Samarih Nupui thu
1 Zisu in John hnakin hnuahlun tam sawn nai ai tinim i ti in Farasite in za i ti khiah Bawipa in za fangin 2 (Zisu amah ngai ngai in tu tinim lo ai a hnuahlunte ai tinim napui ai) 3 Zisu khai Judea ramin thawn ai Galilee ramah feh i. 4 Ciafangin Zisu khiah Samaria ram songin feh kul i. 5 Ciafang in ani khai Zakuk in a fapa Joseph hnenah pehnak ram hiang ai Saikhar tihnak Samarih te khua ah hleng i. 6 Ciata ah Zakuk cohnak namkum um i. Zisu khai a khualsihnak in cawl manin namkum vumah to ai ciafangin sun nazi hlainih dung i. 7 Ciafangin Samarih nupui pakhat khiah ti cawi tuh in hleng i. Zisu in cia nuu hnenah, “Ding tuh i pe tu.” ti in ngen i. 8 (Zangmanti fangin a hnua hlunte khiah khua songah rong lai tuh in feh sio i.) 9 Ciafangin Samarih nupui in Zisu hnenah, “A kontih ai nang Judah minung in kai Samarih nupui khiah ding tuh i ngen i si?” ti in sawn i. Ziangmanti fangin Judah minungte le Samarih minungte khiah pawldun lo i. 10 Zisu in sawn ai cia nuu hnenah, “Nangmah in Pathian lehsawng ling silai, ‘Ding tuh i pe tu’ ti ai na ngen tu khiah aisu i ti ling silai, nangmah sawnin amah ngen tuh ai amah in a nung mi ti na pe tuh napui i.” ti in ti i. 11 Cia nuu in Zisu hnenah, “Bawipa, nang in ticawihnak tuh zaikhai nai lo i si, cen namkum khai a thuk ngai i. Ciamanin a konin khia a nungmi ti nai tuh i si? 12 Nangmah khiah he namkum kin pe ai a fate le a sumte kawmin he namkum songai ti ding tu kin pa Zakuk tahin lian sawn i sim?” ti in ti i. 13 Zisu in cia nuu khiah sawn ai, “He ti dingtu te in tihal leh tuh i. 14 Ikhalselai i pehnak ti ding tute in zaikom in khai tihaal awng tuh lo i hang. Ikhalselai i pehnak ti khiah a songah kumzangza nunhnak ti suak thliathlo hmun namkum cang tuh i.” ti in ti i. 15 Nupui nuu in Zisu hnenah, “Bawipa, ti i haal tuh nawn lo le ticawi tuh in heta ah kawi kul tuh nawn lo in cia ti i pe tu.” ti in ti i. 16 Zisu in amah hnenah, “Feh tulai, na pa ko tulai heta ah kawi tu.” ti in ti i. 17 Cia nuu in, “Pa nai lo ing.” ti in sawn i. Zisu in amah hnenah, “Pa nai lo ing ti heh na hman i. 18 Ziangmanti fangin pa panga nai awng zo i si. Cen tun ai na naihnak pa khiah na pa i lo i. Cia khiah a hman in rel peu i si.” ti in ti i. 19 Nupui nuu in amah hnenah, “Bawipa, nangmah khiah prawfet i si ti na ling ing. 20 Kin paate in he mual vumah Pathian bia i. Ikhalselai ningte in Jerusalem ian ah Pathian bia tuh i ti i si.” ti in ti i. 21 Zisu in amah hnenah, “Nupui nuu, i sang tu. Pa Pathian khiah he mual vumah le Jerusalem lek ah bia tuh lohnak a cuu hleng i hang. 22 Ningte in ning biahnak ling lo i si. Kinte in kin biahnak ling i ing. Ziangmanti fangin ohnak khiah Judah mi songin hleng tuh i. 23 Ikhalselai Pa Pathian khiah rauhla le thuhman thawn ai biahnak tikcu hleng ai cia tikcu khiah tun i hang. Ziangmanti fangin Pa Pathian in ciabang mite khiah a biatu tuh in sii i. 24 Pathian khiah Ciang Rauhla i. Ciamanin a biatute in rauhla le thuhman thawn bia tuh i.” ti in ti i. 25 Nupui nuu in amah hnenah, “Khrih ti hnak Messiah khiah hleng tuh i, ti ling ing. Cia pa hleng fangin zai hmuahhmuah kin rel tuh sio i.” ti in ti i. 26 Zisu in amah hnenah, “Na pon tu kaimah khiah amah ing.” ti in rel i. 27 Cialak fangin a hnuahlunte hleng ai Zisu in nupui nuu thawn pong manin ngaihsun ur tlang i. Ikhalselai aisu in khai, ‘Zai si i si?’ti in zawt lo ai, ‘Zaimanin he nuu thawn pon dun i si?’ ti in khai zawt lo i. 28 Nupui nuu khai a tibel khiah hlum ai, khua songah feh le, pasalte hnenah, 29 Kawi tu i lai, i bawn awnghnak hmuahhmuah i rel sio tu pa sik tuu-ih. Amah khiah Khrih i lo im?” ti in ti i. 30 Ciafangin anite khai khua songin suak ai Zisu hnenah kawi i. 31 Cialak in a hnuahlunte in Zisu hnenah, “Saza pa, rong ei tu.” ti in ngen i. 32 Ikhalselai Zisu in amahte hnenah, “Ning in i ling sah lohnak ei tuh rong nai ing.” ti in ti i. 33 Ciamanin a hnuahlunte khai pakhat le pakhat khiah, “Aisu in amah ei tuhin rong kawih sah zo i awm?” ti in ti i. 34 Zisu in amahte hnenah, “I rong khiah ziang i ti fangin i hlat tu pa daihhnak bawn tuh le a naper khiah a ben tian ai per tuh khiah i rong i. 35 ‘Rongkhawm hlan hla li um i lai.’ ti mah ih. Sik tuu-ih, ning rel ing, Ning mit in khuahlir tu i lai lo khiah sik tuu-ih. Ziangmanti fangin rongkhawm cuu khiah khim zo i hang. 36 Rongkhawm tu te in hlawhtham ngah tuh ai kumzangza nunhnak thingthai khawm tuh i. Ciamanin a cing tu pa le a khawm tu pa khiah hmunkhat in ang kawm tuh i. 37 Cen ‘Pakhat pa in cing ai, pakhat pa in rongkhawm i.’ ti ai relhnak khiah hman i. 38 Ning vai lo hmunah rong khawm tuhin ning hlat ing. Mi dangte in lovai ai amahte rong khiah ningte in khawm sah i si.” ti in rel i.
39 Ciafangin cia nuu in, “I bawn awnghnak hmuah i rel sio i.” ti in rel man in cia khua ai Samarih mite in Zisu khiah sang i 40 Ciamanin Samarih mite khai Zisu hnenah hleng fangin, amahte thawn um tuhin Zisu khiah ngen ai Zisu khai ciata ah ni nih um i. 41 Ciafangin Zisu relhnak thu manin mi dang a tampui in khai sang ai, 42 Nupui nuu hnenah, “Tun sang i ing. Inapui ai na relhnak manin i lo i. Ikhalselai kinmah rori in amah relhnak za ai thungai in amah khiah laivum Nun Otu Khrih i ti ling i ing.” ti in rel i.
Zisu in uktu bawi fapa cakrruai i
(Matt. 8:5-13 ; Luke 7:1-10)
43 Ni nih hnua fangin Zisu khai ciata in thawn ai Galilee ramah feh i. 44 Ziangmanti fangin amah rori in prawfet khiah amah ram songah upathnak nai lo i ti in tetti khan i. 45 Galilee ram ah a hleng fangin, Jerusalem puai ah a bawnhnak hmu man in Galilee mite in amah khiah caang i. Ziangmanti fangin cia Galilee te khiah cia puai ah lo feh ve i. 46 Ciamanin in Zisu khai ti khiah capittizu ah cang ruai hmun Galilee ram ai Kana ah hleng leh thio i. Ciafangin ciata ah mi bawipa pakhat lo um ai Kapernaum ai umtu a fapa khiah lo ur i. 47 Zisu khiah Judia in suak ai Galilee ramah hleng i ti khiah mi bawipa in za fangin, ani khai Zisu hnenah kawi ai a fapa khiah a thi banghma man in Zisu in a fapa khiah cakruai tuhin kawi tuhin ngen i. 48 Ciafangin Zisu in, “Ningte in ngaihsunurkul le hnikhnaihhnakte khiah hmu hlahleisikhaw, sang tuh lo i si.” ti in ti i. 49 Mi bawipa in amah hnenah, “Bawipa, i fapa thi hlan ah kawi tu.” ti in ti i. 50 Zisu in amah hnenah, “Feh tu, na fapa cak zo i.” ti in ti i. Cia pa khai Zisu relhnak sang ai feh i. 51 Cia pa khai lam lakah a tlung laiteng in a hnenum te in amah khiah caang ai, “Na fapa cak zo i.” ti in rel i. 52 Ciafangin cia pa in a hnenum te khiah zai camcu fangin a fa cak leh i ti in zawt i. Amahte in, “Mi zan nazi pakhat dung fangin a hlawnghnak khiah cak lio i.” ti in rel i. 53 Ciafangin cia pa in a fapa cak camcuu khiah, Zisu in amah hnenah, “Na fapa khiah cak zo i.” ti ai a rel fang in a fapa lo cak lio i ti ling i. Ciafangin ani khai a innkua veksen thawn sang i. 54 He khiah Judea ram in Zisu suak ai Galilee ah hleng fangin ngaihsunurkul bawnhnak a velnih hnak i.