1 He thute khiah thin ning hnawm lohnak tuhin ning reicia ing. 2 Amahte in sanginn songin ning hnawt tuh i. Cen ning rek tute in Pathian na per vuah tuhhnak a cuu hleng i hang. 3 Amahte in i Pa le kaimah khiah kin ling lo manin hete khiah ning vumah bawn tuh i. 4 Ikhalselai cia cuu khim fangin he thute khiah kaimah in ning reicia awng i ti ning hih thill thai in he thute ning rel ing. Cen kaimah khiah ningmah thawn um manin a ngom in he thute ning rel awng lo ing. 5 lkhalselai tunin i hlat tu pa hnenah feh tuh ing. Cen ningte in,’ Konah feh tuh i si?” ti in i zawt lo i si. 6 Ikhalselai he thute ning rel manin lung ning sia i. 7 Ikhalselai thuhman ning rel ing. Kaimah feh teu heh ningmah ca ah pha sawn i. Ziangmanti fangin feh teu hlah inglai Bawmtu pa khiah ning hmun ah hleng tuh lo i. Ikhalselai kaimah feh leingkhaw amah khiah ning hnenah ning kuat tuh ing. 8 lkhalselai amah hleng fangin, laivum mite hnenah sualhnak le dikcanghnak le cawhkuanhnak hmuh tuh i. 9 Sualhnak hmuh tuh i. Ziangmanti fangin amahte in i sang lo i. 10 Dikcanghnak hmuh tuh i. Ziang manti fangin kaimah khiah i Pa hnenah feh tuh ai ningte in i hmu tuh nawn lo i si. 11 Cawhkuanhnak hmuh tuh i. Ziangmanti fangin he laivum uktu bawi khiah cawh zo i hang. 12 Thu tampui ning rel tuh nai i lai ing. Ikhalselai ningte in tunin ngai ben lo i hang i si. 13 Ikhalselai thuhman Ciang Rauhla hleng fangin, thuhman hmuahhmuah lamah kong ning hoi tuh i. Ziangmanti fangin amah thu rel tuh lo i. Ikhalselai a zahnak hmuah khiah amah in rel tuh ai a hleng tuh lai thilte khiah ning hmuh tuh i. 14 Amah in kaimah thang i phat tuh i. Amah in i naihhnak khiah lang tuh ai ningte hnenah ning hmuh tuh i. 15 I Pa ai naihnak thil hmuahhmuah khiah kaimah ai i. Ciamanin i naihhnak hmuah amah in lang tuh ai ning hmuh tuh i, ti in ning rel ing. 16 I Pa hnen kawi tuh ing. Ciamanin zaicam lo niu fangin ning te in i hmu tuh lo i hang i si. Cen zaicam lo niu fangin i hmu leh tuh thio i si.” ti in rel i. 17 Ciafangin a hnuahlunte hrekkhat in, “ ‘I Pa hnenah kawi tuh ing. Ciamanin zaicam lo niu fangin i hmu tuh lo i hang i si. Cen zaicam lo niu fangin i hmu leh tuh thio i si.” ti ai kin relhnak tu ziang i pa?” ti in ti i. 18 Ciamanin amahte in, ‘Zaicam lo niu’ tihnak tu ziang i pa? A rel hnak ling sah lo i ing.” ti in ti i. 19 Zisu in amahte in thu zawt nuam i ti ling manin, amahte hnenah, “Kaimah in, ‘Zaicam lo niu fangin i hmu tuh lo i si. Cen zaicam lo niu fangin i hmu leh tuh thio i si’ tihnak khiah ningmah tlangtlang zawt dun i sim? 20 Thungai, thungai in ning rel ing, Ningte in lungsia in kap tuhai laivum mite tu ang tuh i. Thin ning hnawm tuh napui ai ning thinhnawm hnak khiah anghnak ah cang tuh i. 21 Nupui nuu khiah naukai fangin thinhnawm i. Ziangmanti fangin a cuu khim i hang. Ikhalselai a nau te fangin, laivum ah nau te manin ang ai a urhnak khiah hih lehlo i. 22 “Cen tunin ningte khai lung ning sia i. Ikhalselai ning hmu leh tuh ing. Ciafangin ning ang tuh ai aisu in khai ning anghnak khiah ning lang sah tuh lo i. 23 Cia nia ah ningte in zaikhai i ngen tuh lo i si. Thungai, thungai in ning rel ing, I hming in ning ngen hnak hmuah i Pa in ning pe tuh i. 24 Tuntian tu i hming in zaikhai ngen awng lo i si. Ning ang hnak khiah dim thilhnak tuhin ngen tu i lai ngah tuh i si. 25 “He thute khiah thuthim thawn ning rel ing. Ikhalselai thuthim in ning rel tuh lo ai i Pa khiah a ciang ngai in ning hmuh tuhhnak cuu hleng i hang. 26 Cia nia ah i hming in ngen tuh i si. Cen i Pa hnenah ning ngen sah tuh ing ning ti lo ing. 27 Ziangmanti fangin ningte in i it ai Pathian hnenin hleng mg ti sang manin i Pa in ning it i. 28 I Pa hnenin kawi ai laivum ah hleng ing. Cen laivum khiah hlum tuh ai i Pa hnenah feh leh tuh thio ing.”ti in rel i. 29 A hnuahlunte in amah hnenah, “Tunin a ciang ngai in thu rel ai thuthimhnak thawn thu rel lo i hang si. 30 Cen nangmah in zai hmuahhmuah ling liang ai aisu in khai thu na zawt kul lo khai ling i ing. Ciate in nangmah khiah Pathian hnenin hleng i si ti khiah sang i ing.” ti in ti i. 31 Zisu in amahte hnenah, “Sang aw hang i sim? 32 Sik tuu-ih, Ningte khiah ningmah hlanlam nuamhmun cang ah ning piak tuh sio ai kaimah lek in i hlum tuhhnak cuu hleng i hang. Ikhalselai kaimah lekin um tuh lo ing. Ziangmanti fangin i Pa khiah kaimah thawn um i. 33 Ningte in i songin thinnuam hnak ning nai thillhnak tuhin he thute ning rel ing. Laivum ah rimsu harsa nai tuh i si. Ikhalselai ang tuu-ih. Laivum khiah neh zo ing.” ti in ti i.