Zisu khiah Sabbath Bawipa i
(Matthew 12 :1 -8 ; Mark 2 :23 -28 )
1 Sabbath nia ah Zisu khiah nimden lo songin vak fangin a hnuahlunte in nimden pu khiah hlok ai amahte kut songin nuai ai ei i. 2 Ciafangin Farasi hrekkhatte in, “Ziangman in sabbath nia ai bawn dan lo khiah bawn i si?” ti in ti i. 3 Zisu in, “David le a hnuahlunte khiah rikaam fangin, 4 Pathian inn songah lut ai phungkite siar lo aisu in khai ei dan lo sangreu khiah lang ai ei le a hnuahlunte khai pe hnak thu khiah ningte in siar awng lo i sim?” ti in sawn i. 5 Ciafangin amahte hnenah, “Mi Fapa khiah sabbath nia Bawipa khai i.” ti in rel i.
Zisu in a kut ro lio pa cakruai i
(Matthew 12 :9 -14 ; Mark 3 :1 -6 )
6 Cen a dang sabbath nia ah Zisu khai sanginn songah lut ai thucuk i. Ciata ah a kiahhan lam kut ro lio naitu mi pakhat um i. 7 Farasite le upadi dan cuktu sazate in amah khiah mawhhluk nuam lamin, Zisu in sabbath nia ah cak ruai na ngai maw, ti in Zisu khiah a kungniu in cul i. 8 Ikhalselai Zisu in amahte ruathnak khiah ling sah ai cia kut ro pa hnenah, “Tho tulai mi laiteng ah ding tu.” ti in ruai ai a ni khai ding i. 9 Ciafangin amahte hnenah, “Thu pakhat ning zawt tuh ing. Sabbath nia ah a pha bawn maw a pha lo bawn dan i? Mi nunhnak o maw mi nunhnak rek khiah pha sawn i?” ti in zawt i. 10 Zisu in mi veksen khiah sik ben fangin, cia pa hnenah, “Na kut pharh tu.” ti in ruai i. Ani khai a kut khiah pharh ai a khatta lam bangin cak i. 11 Ikhalselai anite khai thinraw rauh ai Zisu khiah a kontih bangin ti pha i ni ti in sawm tlang i.
Zisu in Hlainih ril i
(Matthew 10 :1 -4 ; Mark 3 :13 -19 )
12 Ciateng in Zisu khiah mual vumah sawngen tuhin feh ai zanvar Pathian hnenah sawngen in um i. 13 Zing khuavar fangin a hnenah a hnuahlunte khiah ko ai, cia songin hlainih ril ai ciate khiah apawstle per tuhin haih i. 14 Ciate khiah Simon (Peter ti in ko i), a nau Andrew, James, John, Philip, Bartholomew, 15 Matthew, Thomas, Alphaeus fa James, Zealot tihnak Simon, 16 James fapa Judas le a zuartu Judas Iskariat te i.
Hmuifu le Rimsuhnak
(Matthew 5 :3 -12 )
17 Zisu khai amahte thawn zu ai zawllai hmunah ding i. Ciata ah a hnuahluntu mi tamngai le Judea ram pumpalah le Jerusalem in le Tyre le Sidon var hiang ai mi tamngai um ai 18 Ciate khiah amah thurelhnak ngai tuh le amahte urhnak khiah cakruai tuhin kawitute i. A pha lo khuavang naite khiah cakruai ai 19 Mi veksenin amah khiah khing tek i. Ziangmanti fangin amah songin power suak ai amahte khiah a veksenin cakruai i. 20 Zisu in a hnuahlunte khiah sik ai, “Ning mi farahte khiah hmui ning fu i. Ziangmanti fangin Pathian ukhnak khiah ningmah ai i. 21 Tunin rikamtu ningte khiah hmui ning fu i. Ziangmanti fangin rong ning kham tuh i. Tunin kap tu ningte khiah hmui ning fu i. Ziangmanti fangin hni tuh i si. 22 Mi Fapa manin mi in ning hua ai amahte pawl in ning hnawt ai zauh ning suam ai ning hming khiah a siava ti in ning lon fangin hmui ning fu i. 23 Cia nia ah lungawi tuu-ih; ang in dawk tuu-ih. Ziangmanti fangin hetih bangin a paate in prawfet te lakah bawn awng i. 24 Ikhalselai ning miliante hnenah rimsuhnak um tu seh. Ziangmanti fangin nunnuamhnak khiah ngah zo i si. 25 Tunin rongkham hiar ai umtu ningte hnenah rimsuhnak um tu seh. Ziangmanti fangin ri ning kam tuh i. Tunin a hni tu ningte hnenah rimsuhnak um tu seh. Ziangmanti fang in ning te in lung ning sia tuhai kap tuh i si. 26 Mi veksen in ning tuar ai ning an fangin, ning hnenah rimsuhnak um tu seh. Ziangmanti fangin hetih bangin a paate in a hman lo prawfette khai bawn awng i.
Ning Raalte It tuhhnak
(Matthew 5 :39 -42 )
27 Ikhalselai i ngai tu ningte, ning rel ing: Ning raalte khiah it tuu-ih. Ning huatute vumah a pha bawn tuu-ih. 28 Awrsia thawn ning camtute khiah hmuifu bur tuu-ih. Zauh ning suam tute khiah sawnget tuu-ih. 29 Mi pakhat in ning biang khatlam ning beng lekhaw a khatta lam khai dawh rih tu. Mi pakhat in ning angki saupui ning lang sah lekhaw ning angki songruk lang tuh khiah ha mah ih. 30 Ning ngen tu hmuah pe tuu-ih. Mi pakhat in ning thill ning lang sah lekhaw cia thilte khiah ngen leh mah ih. 31 Cen mite in ning vumah bawt ning daih bangin ningte in khai amahte vumah bawt tu ve ih. 32 Ning it tute lek it le i si zai ning hnempui i? Misualte rinin amahte it tute khiah it ve i. 33 Cen ning hnenah a pha tute hnenah phathnak bawn le i si, zai ning hnempui i? Misualte rinin ciatihin bawn i. 34 Cen rul leh tuh umm kongin mite khiah thil zawn le i si, zai ning hnempui i? Misualte rinin misualte hnenah a veksenin ngah leh tuhin zawn ve i. 35 Ikhalselai ning raalte khiah it tuu-ih. Amahte vumah phathnak bawn tuu-ih. Ngah leh tuh ruat lo in zawn tuu-ih. Ciafangin ning lehsawng khiah lian tuh ai ningte khiah a Saangber fate ning cang tuh i. Ziangmanti fangin amah khiah anhal thai lo te le misia te lakah a nunneem i. 36 Ciaman in ning Pa in mite ngaihhar bangin ningte in khai mite khiah ngaihhar tuu-ih.
Mi dangte thutan sahhnak
(Matthew 7 :1 -5 )
37 Mi thu khiah tan sah malai, mi in khai ning thu khiah ning tan sah tuh ve lo i. Mi khiah mawhhluk malai mi in khai mawh ning hluk tuh ve lo i. Mite sualhnak khiah hlat sah tu i lai mite in khai ning sualhnak ning hlat sah tuh ve i. 38 Pe tu i lai, mi in khai ning pe tuh ve i. A hman in teh ben fangin sawh tuh pek ai, hlin in a leet in mi in ning kaang ah ning bung sah tuh i. Ziangmanti fangin ning tehhnak zaazu thawn ning teh leh tuh i.” ti in rel i. 39 Ciafangin Zisu in he santehhnak khiah amahte hnenah rel leh thio i: “Mitcaw pa in mitcaw pa khiah konghoi thill tur im? A panih in kua songah tlok kawm tuh lo im? 40 Tlawngta pa khiah a saza hnakin upa sawn lo i. Ikhalselai a khimniu ai zirhnak ngahtu tlawngta pa khiah a saza thawn bang tuh i. 41 Ziangman in na unau mit songai mitdawk cikniu khiah hmu lawn si ai na mit songai luangkiang tu ruat lo i si? 42 Cen na mit songai luangkiang khiah hmu hlahlesi, a kontih in na unau hnenah, “Na mit songai mitdawk khiah na khai sah ngang?’ ti tur si? Mi hrokhrawl pa, na mit songai luangkiang khiah khai hmasa tulai ciafangin na unau mit songai mitdawk cikniu khai tuh khiah a ciang ngai in hmu thill tuh i si.
Thingkung le a Thai
(Matthew 7 :17 - 20 )
43 Thingkung pha in a hnawm thai lo i. Cen thingkung hnawm in a pha thai ve lo i. 44 Ziangmanti fangin thingkung te khiah a thai in lin thill i. Mite in hlingkung vumin thaihmin lawih lo i. Cen maimaw kung in capitii khai lawih thill lo i. 45 Thinlung a pha nai tu mi nuncan pha pa songin thil pha suak ai thinlung a sia nai tu mi nuncan pha lo pa songin thil sia suak i. Ziangmanti fangin thinlung song ai a dim ai umhnak bangin a kaa in pong i.
Mifim le Mivoi innsatu Santehhnak
(Matthew 7 :24 -27 )
46 Cen zaimanin, “Bawipa, Bawipa,’ ti in i ko lawnsi ai i relhnak tu bawn lo i si? 47 I hnenah kawi ai i relhnak khiah za ai a bawntu pa khiah aisu thawn bang i ti ning hmuh tuh ing. 48 Cia pa khiah lung vumah a thukngai in co in a hamsa ai inn sa tu pa thawn bang i. Ti lian ai cia inn khiah hor in a rauhngai in seu napui ai hlin ben lo i. Ziangmanti fangin cia inn khiah lung vumah sahnak i. 49 Ikhalselai i thu khiah za napui ai a bawn lo tu pa khiah laipua ah ham nai lo ai innsa tu pa thawn bang i. Cia inn khiah a rauhngai in hor in seu fangin tlu lio i. Ciafangin a inn khiah a vuva in hnawm berh i.” ti in rel i.