Tinimtu John naper panhnak
(Matt. 3:1 -12 ; Mark 1 :1 -8 ; John 1 :19 -28 )
1 Tiberius Sizar ukhnak a kum hlainga hnak khimhnak kum ah Pontius Pilate khiah Judea ramuk tu i ai Herod in Galilee ram uk ai a nau Phillip in Iturea le Trachonitis ram uk ai Lysanias in Abilene ram uk i. 2 Cen Annas le Khaiaphas khai phungki upate i ai Pathian thu khiah Zekhariah fapa John hnenah hampalakah hleng i. 3 John khai Jordan run hiang ai ram hmuahhmuah ah feh ai sualhlathnak ngah tuhin sualsir in tinim tuhhnak thu khiah tazahaw i. 4 Cia khiah prawfet Isaiah cauk songah khum ciahnak,
“Hampalak in aw pakhat khiah,
‘Bawipa Pathian lam khiah rem tuu-ih.
A khung khiah caang ruai tuu-ih.|
5 Rawn thuk te khiah dim ruai tuh i.
Mual le tlaang te khiah zawllai ruai tuh i.
A konkaw lampui te khiah cang ruai tuh i.
Lam ruh te khiah maam ruai tuh i.
6 Cen mi hmuahhmuah in Pathian
luangtlanhnak khiah hmu tuh i.’ ti ai au
hnak aw i.”ti ai nganhnak bang in i.
7 Ciafangin a hnenah tinim tuhin kawitu miburpui hnenah, “Aw a ru nai rul phun pawl! Aisu in a hleng tuhhnak cawhkuan hmunin tlan tuhin ning relcia i pa? 8 Ciamanin ning sualsir hnak thawn a phutua nuncan thingthai khiah kawih tuu-ih. Cen “Abraham khiah kin paa i.” ti in ning thinlung in ruat mah ih. Ziangmanti fangin, ning rel ing, Pathian in he lungto te khiah Abraham fate cang ruai thill i. 9 Cen tunin haihpui khai thingham ah zau zo i. Ciamanin thingthai pha thai lo tu thingte khiah vawng tuhai mei songah tih tuh i.” ti in rel i. 10 Ciafangin cia mite in, “Ilekhaw, ziang bawn nga ing?” ti in zawt i. 11 John in, “Angki panih nai te in a nai lote khiah pe tu seh. Rong nai te in a nai lote khiah pe tu seh.” ti in rel i. 12 Ciafangin siahkhuai dong tute khai tinim tuhin kawi ai, “Saza pa, zai bawn nga ing?” ti in zawt i. 13 Ciafangin John in, “Ning ruaihnak tah tamin siahkhuai lang mah ih.” ti in rel i. 14 Raalkhapte in khai ciatih bangin, “Zai bawn nga ing?” ti in zawt ai John in, “Aisu paisa khiah a lovang in lang sah mah ih. Aisu khai a lovang in mawhhluk mah ih. Cen na hlahkha thawn lungkhim tu.” ti in rel i. 15 Cia mite in John khiah Khrih i ni maw i lo i ni? ti in umm kongin amahte thin songin ruat teng fangin, 16 John in amahte khiah, “Kai in ti thawn ti ning nim ing. Ikhalselai kaimah hnak in lian sawn pa khiah hleng zo i hang. Cia pa kedawl ri hawk sah tuh rin i tlak lo i. Amah in Ciang Rauhla le mei thawn ti ning nim tuh i. 17 Amah in a khawdai khiah a kut in sin ai a fangcil hmun khiah a ciang ngai in dah tuh ai a fangmute khiah ben songah khawm tuhai fang kungte khiah a hmit thill lo mei thawn tai tuh i.” ti in rel i. 18 Cen John in thu tamngai thawn mite thinso ruai ai amahte hnenah kawspal thupha khiah tazahaw i. 19 Ikhalselai uktubawi Herod khiah a nau Philip nu Herodias manin le a dang a pha lo tamngai bawn manin John in Herod khiah hau le, 20 Ciate manin Herod in John khiah thawnghla i.
John in Zisu tinim i
(Matthew 3 :13 -17 ; Mark 1 :9 -11 )
21 Mi veksen khiah tinim ben fangin, Zisu khai ti nim ve ai Zisu in sawngen laiteng in vancung khiah hong ai, 22 Ciang Rauhla khiah khuro pum bangin Zisu vumah tolh ai vancung in aw pakhat khiah, “Nangmah khiah i ithnak Fapa i si. Na lakah lung i khim ngai i.” ti in hleng i.
Zisu suahkehhnak thu
(Matthew 1 :1 -17 )
23 Zisu vkhiah kum sawm thum tluk fangin Pathian na per pan i. Amah khiah Joseph fapa ti ai vuahhnak i. Joseph khiah Heli fapa, 24 Heli khiah Matthat fapa, Matthat khiah Levi fapa, Levi khiah Melkhi fapa, Melkhi khiah Janna fapa, Janna khiah Joseph fapa, 25 Joseph khiah Mattathias fapa, Mattathias khiah Naum fapa, Naum khiah Esli fapa, Esli khiah Nakke fapa, 26 Nakke khiah Maath fapa, Maath khiah Joseph fapa, Joseph khiah Judah fapa, 27 Judah khiah Rhesa fapa, Rhesa khiah Zorobabel fapa, Zorobabel khiah Shealtiel fapa, Shealtiel khiah Neri fapa, 28 Neri khiah Melkhi fapa, Melkhi khiah Addi fapa, Addi khiah Khosam fapa, Khosam khiah Elmodam fapa, Elmodam khiah Er fapa, 29 Er khiah Joshua fapa, Joshua khiah Eliezer fapa, Eliezer khiah Jorim fapa, Jorim khiah Matthat fapa, Matthat khiah Levi fapa, 30 Levi khiah Simeon fapa, Simeon khiah Judah fapa, Judah khiah Joseph fapa, Joseph khiah Jonam fapa, Jonam khiah Eliakim fapa, 31 Eliakim khiah Melea fapa, Melea khiah Menna fapa, Menna khiah Mattatha fapa, Mattatha khiah Nathan fapa, Nathan khiah David fapa, 32 David khiah Jesse fapa, Jesse khiah Obed fapa, Obed khiah Boaz fapa, Boaz khiah Salmon fapa, Salmon khiah Nahshon fapa, 33 Nahshon khiah Amminadab fapa, Amminadab khiah Ram fapa, Ram khiah Hezron fapa, Hezron khiah Perez fapa, Perez khiah Judah fapa, 34 Judah khiah Zakuk fapa, Zakuk khiah Aizek fapa, Aizek khiah Abraham fapa, Abraham khiah Terah fapa, Terah khiah Nahor fapa, 35 Nahor khiah Seruk fapa, Seruk khiah Reu fapa, Reu khiah Pelek fapa, Pelek khiah Eber fapa, Eber khiah Shelah fapa, 36 Shelah khiah Khainan fapa, Khainan khiah Arfazat fapa, Arfazat khiah Shem fapa, Shem khiah Noah fapa, Noah khiah Lamek fapa, 37 Lamek khiah Methuselah fapa, Methuselah khiah Enok fapa, Enok khiah Jared fapa, Jared khiah Mahalalel fapa, Mahalalel khiah Kenan fapa, 38 Kenan khiah Enosh fapa, Enosh khiah Seth fapa, Seth khiah Adam fapa, Adam khiah Pathian fapa i.