Zisu khiah tholeh i
(Matthew 28 :1 -10 ; Mark 16 :1 -8 ; John 20 :1 -10 )
1 Zarh ni ni hmasaber zingtla niu fangin anite khiah amahte ralring ciahnak zihmui kawm in hlanah kawi ai a dangte khai amahte thawn kawi i. 2 Ciafangin anite in lungto khiah hlan in a tul sa lio in tawk i. 3 Anite khai lut ai Bawi Zisu ruang khiah tawk lo i. 4 Anite khai ciatih in multing in um lak fangin, minung panih khiah thilthuam tleu ngai sil in amahte hiang ah ding i. 5 Anite khai lau ai amahte hmai khiah lai ah ut ai, ciafangin cia mi panihte in amahte hnenah, “Zaimanin a nungte khiah a thite lakah sii i si? 6 Amah khiah heta ah um lo i. Ikhalselai amah khiah tho zo i. Galilee ai a um teng fangin ning rel hnak, 7 ‘Mi Fapa khiah misualte kut ah ap tuh ai thinglamteh vumah tar tuh ai ni thum fangin tholeh tuh i.’ ti khiah hih tuu-ih.” ti in ti i. 8 Ciafangin amahte in Zisu relhnak thu khiah hih i. 9 Anite khai hlan in let ai he thu hmuah khiah hlaikhatte le a veksen hnenah rel i. 10 He thute khiah apawstalte hnenah rel tute khiah Mary Magdalene le Joanna le James nuu le Mary le amahte thawn umtu a dang nupangte i. 11 Ikhalselai ciate relhnak khiah thu lovang tluanthu bang in nam ai amahte in sang lo i. 12 Ciafangin Peter khai tho ai hlan hmun ah dawp le ut ai pon khiah amahte lek in hmu ai ani khai a canghnak thu lakah ngaihsunur kong in tlung i.
Zisu khiah laar i
(Mark 16 :12 -13 )
13 Cia nia ah amahte lakai mi panih khiah Emmaus tihnak khua ah feh ai cia khua khiah Jerusalem in peng sarih tha hla i. 14 Ciate panih khai he a canghnak thute khiah rel kawm hnelhno i. 15 Ciatih ai anite khai thurel kawm hnelhno teng in, Zisu khai anite hnenah nong ai amahte thawn vak khat i. 16 Ikhalselai amahte mit khiah hup sah manin amahte in Zisu i ti khiah ling lo i. 17 Ciafang in Zisu in amahte hnenah, “Ning feh kong le lungsia kong ai ning relhnak thu khiah ziang i pa?” ti in zawt i. 18 A khatta Kleopas tihnak pa in amah hnenah, “Tun songai canghnak thute ling lo tu Jerusalem ah khualzin i aw sim?” ti in sawn i. 19 Ciafangin Zisu in, “Zai thute maw?” ti in sawn i. Amahte in, “Pathian hmai ah le mi hmuahhmuah hmai ah naper lian ngaingai per tu le thu rel tu prawfet Nazareth Zisu thu i. 20 Amah khiah phungki upate in thi tuh in thukhan ai thinglamteh vumah tar i. 21 Ikhalselai amah khiah Israel luangtlantu tuh i napui i ti in sang cop i ing. Ciahlai ah, tunnia khiah hete bawn khelleh nithumhnak i. 22 Cen kin lakai nupangte in khai ngaihsun kin ur ruai i. Ziangmanti fangin amahte khiah tun ninghla khuahma ngai in hlanah feh ai, 23 A ruang khiah tawk lo fangin anite khai tlung ai amah khiah nung zo i ti in vancung mite in amahte relhnak thu khiah rel i. 24 Cen kin lak ai mi hrekkhat khai hlan ah feh ai, nupangte relhnak bang in tawk napui ai amah tu hmu lo i.” ti in rel i. 25 Ciafangin amah in amahte hnenah, “Aw mivoite, prawfette relhnak sang lo ai hnuakfualte. 26 Khrih in hete khiah tuar in a thangphathnak songah lut tuh lo im?” ti in ti i. 27 Ciafangin Moses ai panin prawfette veksen ai Lai Cianghlim songai amah thawn senghnak thu nganhnak khiah a ciang niu in rel i. 28 Ciafangin anite khai cia khua thawn nong fangin ani khai cia khua kaan tuh bang in feh i. 29 Ikhalselai amahte in amah khiah, “Kin hnenah um tu. Ziangmanti fangin nitla zo ai zanlam i hang.” ti in ruai bel i. Ciafangin ani khai amahte thawn umkhat i. 30 Amahte thawn rongei tuh in to fangin, sangper khiah lang ai sawngen ben fangin khan ai amahte khiah pe i. 31 Ciafangin amahte mit khiah hong sungso ai amah khiah ling i. Ciafangin ani khai a mahte mithmuh in pai lio i. 32 Ciafangin anite khai pakhat le pakhat khiah, “Lam lakah amah in kin pon fangin le Lai Cianghlim kin hong sah fangin kin thin khiah kin songah mei bang in kin kang i ta lo im?” ti in rel i. 33 Ciasawngpah anite khai tho ai Jerusalem ah let le hlainihte le amahte thawn ai umtute khiah tawk ai, 34 “Bawipa khiah tho peu zo ai Simon hnenah lar zo i.” ti in ti i. 35 Ciafangin anite in lam lak ai canghnak thu te le sangper a khan fangin amahte in amah khiah linghnak thu khiah rel i.
A hnuahlunte hnenah Zisu laar i
(Matthew 28 :16 -20 ; Mark 16 :14 -18 ; John 20 :19 -23 ; Acts 1 :6 -8 )
36 Amahte in ciatih ai a rel laitak in Zisu khai amahte laiteng ah ding ai, “Thin nuam tuu-ih.” ti in ti i. 37 Ikhalselai amahte khiah lau rauh ai mi rauhla hmu vuah i. 38 Ciafang in Zisu in amahte hnenah, “Zaimanin thin hnai ning hnok i? Zaimanin ning thin songah sangsamhnak um i? 39 I kut le i kete khiah sik tuu-ih. Kaimah ngaingai ing. I daai tu i lai sik tuu-ih. Ziangmanti fangin ningte in i hmu bang in mi rauhla in taksa le ruh nai lo i.” ti in ti i. 40 Ciatih ai a pong ben fangin a kut le a ke te khiah hmuh i. 41 Anite khai a ang ze le ngaihsunur ze manin sang thill lo fangin, amahte hnenah, “Rong ei tuh nai aw i sim?” ti in zawt i. 42 Ciafangin anite in a em cia nga le khawihnar pe i. 43 Ani in cia khiah lang ai amahte hmai ah ei i. 44 Ciafangin Zisu in amahte hnenah, “Moses thukham songah le prawfette songah le psalms songah nganhnak kai thawn ai senghnak thute khiah khim kul tuh i, ti ai ning thawn in i um lai ning relhnak thu khiah hete i hang.” ti in rel i. 45 Ciafangin amahte in Lai Cianghlim khiah ling thilhnak tuhin amahte lungmu khiah hong sah i. 46 Ciafangin amahte hnenah, “Khrih in tuar tuh ai ni thum fangin tho leh tuh i. 47 Cen sualsirhnak le sualhlathnak khiah Jerusalem ai panin mi phun hmuahhmuah lakah a hming in tazahaw tuh i, ti in ngan zo i. 48 He thute lakah ningte khiah tetti khan tute i si. 49 I Pa ai khamhnak khiah ning hnenah ning kuat ing. Ikhalselai vancung in power thawn ning fun hlan hmuah Jerusalem ah lo um tuu-ih.” ti in rel i.
Zisu van ah kaai i
(Mark 16 :19 -20 ; Acts 1 : 9 -11 )
50 Ciafangin Zisu in amahte khiah Bethani tian fehpui ai ani khai a kutte khiah pharh ai amahte khiah hmuifu bur i. 51 Ciatih ai amahte khiah hmuifu pe laitak in amah khiah amahte thawn khek ai vancung ah phur teu i. 52 Anite in amah khiah sikhu ai ang ngai in Jerusalem ah let leh ai 53 Zomzet in temple songah Pathian khiah an kong le hmuifu pe kong in um i. Amen.