Pathian thu maw misuinung thu
(Matt. 15:1-20)
1 Ciafangin Farasite hrekkhat le Jerusalem ai upadi dan cuktu sazate khai hmunkhat in Zisu hnenah kawi i. 2 Amahte in Zisu hnuahlunte in kut som lo in rong ei hmu fangin amahte lakah sualsi i. 3 Ziangmanti fangin Farasite le Zudah minung hmuahhmuahin a pupate dan hlun in kut som lo in rong ei lo i. 4 Cen dawr in tlung fang khai takhlu hmasa lo in rong ei lo i. Cen cia lo a dang khuat le bel le darbel le cabuai som te bang khai hlun tuh tamngai nai i. 5 Ciafangin Farasite le upadi dan zirhtu sazate in Zisu khiah, “Zaimanin na hnuahlunte in pupa dan hlun lo ai, kut som lo in rong ei i?” ti in zawt i. 6 Ciafangin Zisu in, “Prawfet Isaiah in mihrokhrawl ningmahte thu khiah,
‘He minungte in a karuh in i upat khel i. Ikhalselai amahte thinlung tu i hnenin a hla ngai ai dah i.
7 Amahte ai i bia hnelhno khiah a lovang i. Ziangmanti fangin amahte in Pathian thu cuk lo ai minung thu sawn cuk i.’ ti ai nganhnak khiah a hman ngai i.
8 Ning te in Pathian thu khiah hlun awl ai, pupa thu sawn hehlaw ti in hlun tek i si.” ti in sawn i. 9 Ciafangin Zisu in amahte hnenah, “Ning pupate dan sawn hlun tuhin Pathian thukham eldan lamah thiam ngai si. 10 Ziangmanti fangin Moses, ‘Na nuu le na paa zul tu. A nuu le a paa cam tu khiah rek tu lio ih.’ ti in ti i. 11 Ikhalselai ningte in, ‘Mi pakhat in a nuu le a paa hnenah, “I hnenin ning ngah tuhhnak thil hmuahhmuah Pathian hnenah hlu zo ing ti ca Korban i,” ti lekhaw 12 Cia pa in a nuu le a paa bawm siang lo i si. 13 Ciatih bangin ning hnenah ning hluphnak pupa dan thawn Pathian relhnak thu khiah a lovang cang ruai i si. Cen ningte in cia bang a dang tamngai khai bawn i si.” ti in ti i.
A pha lo khiah thinlung songin suak i
14 Ciafangin Zisu in minung te khiah a veksen in a hnenah ko ai, amahte hnenah, “Ning veksenin i ngai tu i lai ling tek tuu-ih. 15 Sumpua in minung songah lutin cia pa sual ruai thaihnak zaikhai um lo i. Ikhalselai a songai suakhnak te in amah khiah sual ruai i. 16 Khua za tuh ai bil nai te in za tu seh.” ti in ti i. 17 Zisu khai minungte hmun in inn songah lut fangin, a hnuahlunte in, cia santeh hnak thu khiah zai ti ca i, ti in zawt i. 18 Ciafangin Zisu in, “Ningte in khai ling ve lo i sim? Sumpua ai luthnak in minung sual ruai lo i. 19 Ziangmanti fangin cia thil khiah a thin songah lut lo ai a hupui songah lut ai ciata in sumpua ah suak i ti khiah ling lai lo i sim?” ti in sawn i. (Ciatih bangin Zisu in rong hmuahhmuah khiah a ciang i ti larruai i). 20 Ciafangin Zisu in, “Minung songai suakhnak thil in minung sual ruai i. 21 Ziangmanti fangin, minungte thin songin a pha lo ruathnak, mi nu le mi pa thawn sualhnak, nulepa sualhnak, mi rekhnak, 22 rukohnak, mi thil irhnak, sualhnak, mite khiah zawlhnak, huatsuakhnak, mi iksikhnak, mi siathnak, hngalhnak le voihnak te suak i. 23 He a pha lote khiah minung songin suak ai minungte sual ruai i.” ti in rel i.
Sairawfinisian Nupui sanghnak
Matt. 15:21-28)
24 Zisu khai ciata in tho ai, Tyre le Sidon ram hiang ah feh ai, inn songah lut ai, aisu in ling daih napui lo ai amah veve thup thill lo i. 25 Ziangmanti fangin nupui pakhat in fenu niu pakhat nai ai cia fenu niu in a pha lo khuavang nai le cia nupui nuu in Zisu thu za fangin ani khai kawi ai Zisu ke hamah bok i. 26 Cia mi nupui nuu khiah Greek mi Sairawfinisian phun i ai, Zisu in khuavang khiah a fenu songin hnawt sah tuhin ngen i. 27 Ikhalselai Zisu in, “Naupangte rong kham hmasa rih tu seh. Ziangmanti fangin fate rong sut in uico te lon tuh mawi lo i.” ti in ti i. 28 Ikhalselai cia nupui in, “I peu i, Bawipa. Inapui ai cabuai hnia ai uico te rinin naupangte rongtheh ei i.” ti in sawn i. 29 Ciafangin Zisu in, “Hetih bang in na rel manin, nangmah hlanlam lo feh tu. Khuavang khiah na fenu songin suak zo i.” ti in rel i. 30 Cia nuu khai a inn ah hleng fangin, a fenu khiah khuahluan vumah taal in tawk ai khuavang khai a songin lo suak zo i.
Nangong pong thill lo pa cakruai i
31 Ciafangin Zisu khai Tyre le Sidon ramin thawn ai Decapolis ramin Galilee tipui lamah hleng i. 32 Ciafangin mite in Zisu hnenah nangong pa pakhat kawih i. Cia pa khiah pong khai pong thil cuam lo i ai Zisu in cia pa vumah a kut dah tuhin ngen i. 33 Ciafang in Zisu in cia pa khiah miburpui hmunin hmun dangah kawih ai, a zungkawk khiah cia pa bil songah dah ai cil thuih ben fangin cia pa lai tok sah i. 34 Ciafangin ani khai vancung sik ai ha hluanghlo ben fangin cia pa hnenah, “Efata,” ti in ti i. Cia khiah, “Hong tu,” ti ca i. 35 Ciasawng fangin cia pa bil khai hong ai a lai khai naal ai ani khai a ciang ngai in pong i 36 Ciafangin Zisu in, “He thu khiah aisu khai rel mah ih.”ti in amahte khiah kham i. Ikhalselai Zisu in a rauh amam in kham fangin anite in a rauh amam in zaih i. 37 Amahte khiah rel zo lo in ngaihsunur ai, “Amah in zai hmuahhmuah khiah a pha liang in bawn i. Amah in nangongte rin khuaza ruai ai pong thill lo te pong ruai i.” ti in ti i.