Zisu rek tuhin sawm tlaang i
(Matt. 26:1-5 ;Luke 22:1-2 ; John 11:45-53)
1 Ciahnua ni nih fangin passover khelhnak le col tel lo sangreu puai khim i le phungki upate le upadi dan cuktu sazate in Zisu khiah hrokhrawl in pom in rek thill tuhhnak khiah ruat tlaang i. 2 Ziangmanti fangin amahte in, “Puai nia ah i ma seh. Ziangmanti fangin miburpui khiah hnaihnok mawh ruai ngai!” ti in ti i.
Zisu khiah zimhmui pawh i
(Matt. 26:6-13 ; John 12:1-8)
3 Zisu khiah Bethani khua ai Simon tihnak miphar pa inn ah a um teng fangin amah khiah rong ei in to le nupui pakhat khiah a mankhung ngai zihmui alabaster tihnak lungto bel khat dim in kawih ai cia bel khiah khoi ai zihmui khiah Zisu lu ah burh i. 4 Ciafangin ciata ai umtu a hrekkhatte in thinraw kongin, “Ziangman in zihmui khiah a lovang can i ni? 5 Ziangmanti fangin he zihmui heh tangka zathum zo lo in zuar selai cia tangka khiah mi farahte pe thai napui i.” ti in rel tlaang i. Ciamanin cia nuu khiah hau i. 6 Ikhalselai Zisu in amahte hnenah, “Amah khiah hau mah ih. Ziangman in amah khiah hnaihnok i si? Amah in i vumah na pha per zo i. 7 Ziangmanti fangin mi farahte khiah ning hnenah um tio i. Ning nuam caang in amahte khiah na pha bawt sah thill i si. Ikhalselai kai tu ning hnenah um tuh tio lo ing. 8 He nuu in a ben tawp in bawn zo i. Amah in i ruang khiah a vui hlanah zihmui pawh cia ham i. 9 Thungai in ning rel ing. He kawspal thupha khiah laipua pumpalah ah tazahaw fangin he nuu ai bawnhnak khai amah hihhnak tuhin rel tuh ve i.” ti in rel i.
Judas in Zisu zuar i
(Matt. 26:14-16 ; Luke 22:3-6)
10 Ciafangin a hnuahlun hlainihte lakai Judas Iskariat khiah phungki upate hnenah Zisu zuar tuh in kawi i. 11 Amahte in cia thu za fangin ang ngai ai amah khiah tangka tham tuhin thukham le Judas khai Zisu zuar thillhnak tuh in ngaisung hnelhno i.
Zisu in Passover khelhnak puai rongei i
(Matt. 26:17-25 ; Luke 22:7-14 ; 21-23 ; John 13:21-30)
12 Col tel lo sangreu puai ni hmasaber nia khelhnak passover rek nia fangin, a hnuahlunte in Zisu hnenah, “Passover khelhnak puai ei tuhin konah bawt sah na daih i?” ti in zawt i. 13 Ciafangin Zisu in a hnuahlun panih khiah hlat ai, “Khua songah feh tuu i lai ti bel phurtu pasaal pakhat tawk tuh i si. Amah khiah hlun tuu-ih. 14 A tlum hmun inn naitu pa hnenah, ‘Saza pa le a hnuahlunte passover khelhnak puai ei hmun tuh mikhual khaan khiah a konah i?’ ti in zawt tu i lai 15 Cia inn naitu pa in a remsa liang inn cungta ai khaan lian ngai ning hmuh tuh i. Ciata ah kin ca in rong lo ralring tuu-ih,” ti in rel i. 16 Ciafangin a hnuahlunte khai feh ai khua songah hleng fangin Zisu relhnak bangin tawk le anite khai passover khelhnak puai ca in ralring i. 17 Zanlam fangin Zisu khai hlainihte thawn kawi i. 18 Amahte khiah rongei laitak fangin Zisu in, “Thungai in ning rel ing. Kaimah thawn ai rongei tu ningte pakhat in i zuar tuh i si.” ti in rel i. 19 Ciafangin anite khai thinhnawm tlaang ngai ai, “Kai i aw ing?” ti in pakhat hnua pakhat in zawt i. 20 Ciafangin Zisu in, “Hlainihte lakah kaimah thawn ai pakan songah a sangreu nim tu pa i. 21 Mi Fapa khiah Lai Cianghlim songai amah thu ngan ciahnak bang in feh i. Ikhalselai mi Fapa zuartu pa khiah rimsu tuh i. Amah khiah te tahlahselai amah ca ah pha sawn napui i.” ti in rel i.
Capitti le sangreu ei panhnak
(Matt. 26:26-30 ; Luke 22:15-20)
22 Amahte khiah rongei laitak fangin Zisu in sang reu khiah lang ai sawngen ben fangin cia sangreu khiah khan le amahte khiah pe ai, “Lang tu i lai ei tuu-ih. He khiah i pumpui i.” ti in ti i. 23 Khuat khai lang ai sawngen ben fangin amahte khiah pe ai amahte in ding tlang i. 24 Ciafangin amahte hnen ah, “He khiah mi tampui ca ai luang ruaihnak thukham thar kho ruaitu i thi i. 25 Thungai in ning rel ing. Pathian ukhnak songah capitti thar i ding leh hlan tian capiiti ding tuh nawn lo i hang ing.” ti in rel i. 26 La kamkhat sa ben fangin anite khai Oliv mualtlang ah feh i.
Peter in Zisu el tuh relcia i
(Matt. 26:31-35 ; Luke 22:31-34 ; John 13:36-38)
27 Ciafangin Zisu in amahte hnenah, “Ningte khiah tun zan ah ning veksen in kaimah manin i sangsam tuh i si. Ziangmanti fangin,
‘Tukhal pa rek ngangkhaw tute piak tuh sio i.’ ti in ngan zo i.
28 Ikhalselai i tholeh fangin ning hlanah Galilee ah feh tuh ing.” ti in rel i. 29 Ciafangin Peter in, “Mi veksenin na sangsam khalkhaw kai ngawn na sangsam tuh lo ing.” ti in sawn i. 30 Ciafangin Zisu in, “Thungai in na rel ing. Tun zan rori ah ar velnih khuang hlanah velthum i el tuh i si.” ti in ti i. 31 Ikhalselai Peter in thintak ngai in, “Nangmah thawn thi tuar tuh inglai ciarin in na el tuh lo ing.” ti in ti i. Ciatih bangin a veksen in pong piang i.
Kethsemane ah Zisu sawngen i
(Mate 26:36-46 ; Luke 22:39-46)
32 Ciafangin anite khai Kethsemane tihnak hmunah feh le Zisu in a hnuahlunte hnenah, “Saw i ngen lakin heta ah to tuu-ih.” ti in ruai i. 33 Ciafangin amah thawn Peter le James le John khiah fehpui ai Zisu khai a rauhngai in a thin khiah hnaihnok ai thincawl rauh in um i. 34 Ciafangin amahte hnenah, “Kaimah khiah thi banghma in lung i sia i. Heta in i iang tuu-ih.” ti in rel i. 35 Zisu khai a tlawmniu hmailam ah feh ai, laipua ah bok ai, thill lekhaw a cuu nazi in amah khiah map tuhin sawngen i. 36 Ciafangin Zisu in, “Abba, I Pa, zaizongza khiah nangmah in bawn thill liang i si. He khuat khiah i hnenin lang tu. Ikhalselai i daihhnak bangin i lo in na daihhnak bangin i tu seh.” ti in ti i. 37 Zisu khai kawi fangin amahte khiah mitmu in tawk i. Ciafangin Zisu in Peter hnenah, “Simon, mitmu i sim? Nazi pakhat teng khai ralvil in um ben lo i sim? 38 Sualhnak ning lut lohnak tuhin ralvil in sawngen tuu-ih. Ning thinlung in tu nuam napui ai ning taksa in thanau i.” ti in ti i. 39 Zisu khai feh leh thio ai a ponghnak bang pah in sawngen leh thio i. 40 Let leh thio fangin amahte khiah mitmu in tawk leh thio i. Ziangmanti fangin amahte khiah mitmu sung rauh ai mit khai thak ben tau lo i. Cen a kontih bangin sawn tuh khai ling lo i. 41 Zisu khai a velthumhnak let fangin amahte hnenah, “Mitmu tu hang ih. Com tu hang ih. Tawk zo i hang. Mi Fapa khiah mi sualte kut ah zuarhnak cuu nongniu i hang. 42 Tho tu i lai feh nga sing. I zuartu pa khiah a nong niu ah i hang.” ti in ti i.
Amahte in Zisu pom i
(Mate 26:47-56 ; Luke 22:47-53 ; John 18:2-12)
43 Ciatih ai a pong laitakin, hlainih songai pakhat pa Judas khai, amah thawn mirunpui khiah vangsaupui le tokrolh kawmin phungki upate le mi upate hnenin hleng i. 44 Zisu zuartu pa in amahte khiah, “I thuthnak pa khiah amah i khaw pom tuu i lai a himniu in fehpui tuu-ih.” ti in relcia i. 45 Judas khai hleng fangin Zisu hnenah kawi vut ai, “Rabbi, Rabbi!” ti in ko ai Zisu thut i. 46 Ciafangin amahte in Zisu khiah pom ai fehpui i. 47 A hiang ai dingtu mi pakhat in a vangsau phok ai phungki upa pa hnenum sat le a bil tawng lio in sat sah i. 48 Ciafangin Zisu in amahte hnenah, “Ruko pom tuh bangin i pom tuhin vangsau le tokrolh kawmin kawi i sim? 49 Ning hnenah nisiar in temple songah thu ning cuk ai i pom lo i si. Ikhalselai Lai Cianghlim khiah khim kul tuh i.” ti in ti i. 50 Ciafangin a hnuahlunte khai a veksenin amah khiah zam ai tlan sek i. 51 Ciafangin tlangval pakhat khiah a ruang ah pon lamkhat niu sil kongin Zisu khiah hlun le amahte in cia tlangval khai pom tum fangin, 52 Cia tlangval pa khai a pon khiah zam ai kongkolh in amahte hmunin tlan i.
Zisu khiah Khaiaphas hnenah kawih i
(Matt. 26:57-68 ; Luke 22:54-55 , 63-71 ; John 18:13-14 , 19-24)
53 Ciafangin amahte in Zisu khiah phungki upa pa hnenah kawih ai ciata ah phungki upa hmuah le upadi dan cuktu sazate le mi upate khiah pumkhawm i. 54 Peter in Zisu khiah a hla ngai in phungki pa tualvan tian hlun i. Ani khai hnenumte kawmin to ai mei ai in um i. 55 Phungki upate le council te in Zisu rek thillhnak tuhin Zisu mawhhluk tu tuh sii napui ai pakhat bang khai tawk lo i. 56 Ziangmanti fangin mi tam ngai in Zisu khiah mawhhluk murhmo napui ai amahte tetti lakah lungkhim tlaang lo i. 57 Ciafangin mi hrekkhat khiah tho ai Zisu khiah hetih bangin thudon tetti khan i: 58 “He pa in, ‘Minung kut ai sahnak he temple bal ngangkhaw ni thum songah kut thawn sa lohnak temple pakhat sa ben tuh ing.’ti in rel khiah za i ing” ti in ti i. 59 Ikhalselai ciatihin rel rinin amahte relhnak khiah khat tho tho lo i. 60 Ciafangin phungki upa pa khai amahte laiteng ah dingai, Zisu hnenah, “Zaikhai sawn tuh lo i sim? Hete ai mawh na hlukhnak khiah zai i pa?” ti in zawt i. 61 Ikhalselai Zisu in pong lo in um ai zaikhai sawn lo i. Ciafangin phungki upa pa in, “Nangmah khiah a Hmuifu Fapa Khrih i sim?” ti in zawt leh thio i. 62 Ciafangin Zisu in, “Ing. Ningte in mi Fapa khiah Power kiahhan lamah to khiah hmu tuh ai vancung mairo thawn hleng khai hmu tuh i lai i si.” ti in sawn i. 63 Ciafangin phungki upa pa khai a thuam khiah zik ai, “Zai tetti kin kul i lai? 64 Kontih bangin ruat pa isi? Amah in Pathian zauhsuam pon ponghnak zazo i si.” ti in ti i. Amahte in, “Amah khiah thi mawi i.” ti in lungkhim tlang i. 65 Ciafangin mi hrekkhat in Zisu khiah cil thuih ai a hrekkhat in a hmai khiah hup sah ai a hmai khiah beng le, “Na beng tu khiah aisu i? Kin rel tu?” ti in ti i. Hnenumte rin amahte kuzapek in amah khiah beng i
Peter in Zisu el i
(Matt. 26:69-75 ; Luke 22:56-62 ; John 18:15-18 , 25-27)
66 Peter khiah tualvan ah um teng fangin, phungki upa pa nupang hnenum pakhat kawi ai, 67 Peter mei aai khiah hmu fangin amah khiah sik ai, “Nangmah khiah Nazareth khua ai Zisu minung i ve i si.” ti in ti i. 68 Ikhalselai Peter in, “Na relhnak na ling sah lo ing.” ti in el i. Peter khai tualvan in tlan ai kawldawng ah um i. 69 Hnenum nupang pakhat in Peter khiah hmu leh thio fangin a hiang ai dingtute hnenah, “He pa khiah amahte minung i.” ti in rel leh thio i. 70 Ikhalselai Peter in el leh thio i. Campuikhat fangin a hiang ai dingtute in Peter hnenah, “Thungai in nangmah khiah amahte minung i si. Ziangmanti fangin nangmah khiah Galilee minung i si, na pon in na larruai i.” ti in ti leh thio i. 71 Ikhalselai Peter khai awrsia pon le thukham thawn, “Ning relhnak he pa khiah ning ling sah lo ing.” ti in ti i. 72 Ciafangin ar velnih hnak khuang i. Ciafangin Peter in Zisu ai relhnak, “Ar velnih khuang hlanah velthum i el tuh i si.” ti ai relhnak khiah hih le ani khai lungsia rauh in kap i.