Zisu Suahkeh hnak Thu
(Luke 3:23-38)
1 Abraham le David tesin fapar songai Zisu Khrih hin le nam suahkeh hnak san thu khiah hetih bang i: 2 Abraham fapa Aizek; Aizek fapa Zakuk; Zakuk fapa Judah le a u le naute; 3 Judah fapa Pharez le Zarah a nuu khiah Thamar; Pharez fapa Hezron; Hezron fapa Aram; 4 Aram fapa Amminadab; Amminadab fapa Nashon; Nashon fapa Salmon ; 5 Salmon fapa Boaz, Boaz nuu khiah Rahab; Boaz fapa Obed, Obed nuu khiah Ruth; Obed fapa Jesse; 6 Jesse fapa khiah kumpibawi David; kumpibawi David fapa Solomon, a nuu khiah Urias ai nu awng i; 7 Solomon fapa Roboam; Roboam fapa Abia; Abia fapa Asa; 8 Asa fapa Josaphat; Josaphat fapa Joram ; Joram fapa Ozias; 9 Ozias fapa Joatham; Joatham fapa Akhaz; Akhaz fapa Ezekias; 10 Ezekias fapa Manasses; Manasses fapa Amon; Amon fapa Josias; 11 Josias fapa Jekhonias le a unaute, ciateng fangin amahte khiah Babilon ramah phur sio i. 12 Amahte khiah Babilon ah kawih hnua ah Jekhonias fapa Salathiel; Salathiel fapa Zorobabel; 13 Zorobabel fapa Abiud; Abiud fapa Eliakim; Eliakin fapa Azor; 14 Azor fapa Sadoc; Sadoc fapa Achim; Achim fapa Eliud; 15 Eliud fapa Eleazar; Eleazar fapa Matthan; Matthan fapa Zakuk; 16 Zakuk fapa Joseph; Joseph khiah Mary pa i ai Mary songin Khrih ti ai ko hnak Zisu te i. 17 Ciamanin Abraham san ai panin David san tian san hlaili i ai David san ai panin Babilon ah a phur tian khiah san hlaili i; Babilon ah a phur ai panin Khrih tian khiah san hlaili i.
Zisu Khrih tehnak thu
(Luke 2:1-7)
18 Zisu Khrih tehnak thu khiah hetih bangin i. A nuu Mary khiah Joseph thawnin thawlthan dun zo cia hmunkhat in umkhat hlanah Ciang Rauhla thawnin fa lo paai i. 19 Ciafangin in Joseph khai mi dikcang i manin, Mary khiah mi hmai ah hmingsia daih lo manin a thupniu in khek tuhin ngaisung i. 20 Ikhalselai Joseph in ciatih in a ngaisung laitak fangin, Bawipa Pathian vancung mi khiah a mang in hmu ai, vancung mi in Joseph hnenah, “David fapa Joseph, Mary khiah na nu tuhin thincawl mah:ziangman ti fangin, a songai a paaihnak fa khiah Ciang Rauhla ai i. 21 Cen Mary in fapa khiah nai tuh ai, a hming khiah ZISU ti in ko tuh i si:ziangmanti fangin amah in a mi phunpuite khiah amahte sualhnak songin o tuh i,” ti in rel i. 22 Hete hmuah khiah, Pathian in prawfet songin rel awnghnak thu khimhnak tuh ai canghnak i. 23 Hetih bangin prawfet in rel awng i:Fenu niu in naupaai tuh ai, fapa niu in nai tuh ai amahte in a hming khiah Emmanuel ti in ko tuh i. Cia Emmanuel khiah, Pathian kin hmunah um i, ti ca i. 24 Joseph khai a mitmu ai phawk fangin Bawipa Pathian vancung mi ai ruai bangin bawn ai Mary khiah hoi i. Inapui ai a fapa a hmasaber a te hlan hmuah hmunkhat in it kawm lo i:ciafang in a fapa khiah ZISU ti in ko i.