1 Ciafangin Moses in Ethiopia nupui nu manin Miriam le Aaron in Moses khiah hau i. 2 Amahte in, “Moses song lekin Bawipa in thurel im? Kin songin khai rel ve lo im?”ti in ti i. Cia khiah Bawipa in za i. 3 (Moses khiah laivum mi miangmo lakah a thin nem ber i.) 4 Ciafang cam-malak in Bawipa in Moses le Aaron le Miriam hnenah, “Ning pathum in tawkdunhmun tabernacle ah kawi tuu-ih.”ti in ruai i. Ciamanin anite pathum khai suak i. 5 Ciafangin Bawipa khai mairo pui songin tolh ai tabernacle dawngkham ah ding ai Aaron le Miriam khiah ko ai anite khai a panih in hmai ah suak i. 6 Ciafangin Bawipa in, “I thu ngai tuu-ih. Ning lakah prawfet um lekhaw Bawipa kaimah in cia pa hnenah manglehan rawl songin ling ruai tuh ing. Amah hnenah a mang in pon tuh ing. 7 Ikhalselai i hnenum Moses thawn ciabang i lo i. Amah khiah i inn songah a rinsan tlak mi i. 8 Amah thawn hmaiton in pon dun i ing. Thuthup bangin i lo ai a ciang ngai in pon ing. Cen amah in Bawipa a hmuihmel khiah hmu i. Ilekhaw ziangmanin i hnenum Moses khiah hau ngam i si?”ti in ti i.
9 Ciamanin Bawipa khai amahte lakah thinraw rauh ai ani khai tlan i. 10 Cia mairo khiah tabernacle vumin thawn fangin Miriam khiah miphar cang vut ai vur bangin ngo i. Ciafangin Aaron in Miriam hmunlam ah her le Miriam miphar cang lio khiah hmu i. 11 Ciamanin Aaron in Moses hnenah, 12 “Aw, i bawipa! Amah khiah a nuu songin te fangin a taksa tlamhmat khiah ro lio tu pa bangin Miriam khiah a thi lio mi bangin dah mah.”ti in ti i. 13 Ciamanin Moses in Bawipa hnenah, “Aw Pathian, amah khiah cakruai tu ti in ninghio na ngen ing.,”ti in ti i.
14 Ciafang Bawipa in Moses hnenah, “A paa in amah khiah cil thuih menma rinin ni sarih song zakthi in um tuh lo im? Camp pua ah ni sarih um tu selai ciaben fangin camp songah lut siang leh tuu-ih.”ti in ti i. 15 Ciamanin Miriam khiah ni sarih song camp pua ah dah ai camp songah a lut siang leh hlan hmuah anite in ciata in thawn lo i. 16 Cia hnua fangin anite khai Hazeroth in thawn ai Paran Nelrawn ah caam tlang i.