← Previous 13

Zekharai 14 Zechariah

Next → Malakhai 1

¹ BAWIPA niakhua khiah hleng i hang.

Ning rokhnak thil khiah ning zeem sah tuh sio i.

² Ziangmanti fangin Jerusalem tawng tuhin

Mi phun hmuahhmuah khawm tuh ing.

Jerusalem khua khiah neh tuh lio i.

A inn te khiah roksah tuh sek i.

A nupangte khiah sual sah tuh i.

Khua songai mite a tlamhmat khiah raalte in pom tuh i.

Ikhalselai a taanghnak mite khiah khua songin rek tuh lo i.

³ Ciafangin BAWIPA khai feh tuh ai

He mi phun dangte khiah tawng tuh i.

Raaltawng nia ai tawng bang in amah in tawng tuh i.

⁴ Cia nia ah a ke khiah Jerusalem in nisuak hmun lam ai Oliv Mual vumah ding tuh i.

Oliv Mual khai hmun nih in khan tuh i.

Nisuak hmunlam in nitla hmunlam tian khan tuhai

A karlak ah zawllai lianpui um tuh i.

Cia mual a tlamhmat khiah saklam ah thawn tuh ai

A tlamhmat lam khiah hlanglam ah thawn tuh i.

⁵ Ciafangin mual karlak ai zawllai hmun in tlan tuh i si.

Cia zawllai khiah Azel tian ban tuh i.

Judah kumpibawi Uzziah sanlai ai hlinhlin awng fangin ning tlan awng bang in tlan tuh i si.

Ciafangin i Pathian BAWIPA khiah

A cianghlim mi veksen kawm in hleng tuh i.

⁶ Cia nia ah khuavar um tuh lo i.

Khuavar te khiah ti bang in khal tuh ai a var nai tuh lo i.

⁷ Cia nia khiah BAWIPA in ling ai,

Cia nia ah sun le zan um tuh lo i.

Ikhalselai zanlam fangin khuavar tuh i.

⁸ Cia nia ah nunghnak ti khiah

Jerusalem in luang tuh i.

A tlamhmat khiah nisuak hmunlam ai tipui songah luang tuh i.

A tlamhmat khiah nitla hmunlam ai tipui songah luang tuh i.

Khaal le khuasik cuu ah luang tuh i.

⁹ Ciafangin BAWIPA khiah laivum hmuahhmuah ah Kumpibawi cang tuh i.

Cia nia ah BAWIPA lek khiah BAWIPA i tuh i.

Amah hming lek khiah hming i tuh i.

¹⁰ Kiba ai panin Jerusalem hlanglam ai Rimmon tian cia laipua khiah zawllai tuh i. Jerusalem khiah do tuh ai Benjamin Kawldawngkham ai panin A Hmasaber Kawldawngkham le A Ning Kawldawngkham le Hananel Inn sangpui in kumpibawipa capitti rialhmun tian mite in hluh tuh i. ¹¹ Jerusalem khiah mite in hluh tuhai, zaikom in khai hnawm tuh nawn lo i. Ikhalselai Jerusalem khiah a kho niu in um tuh i.

¹² Jerusalem tawng tu mite hmuahhmuah khiah BAWIPA in he thawn ur ruai tuh i: Amahte ke thawn ding teng in a taksa khiah zan tuh sio i. Amahte mit khiah a mitkua songah zan tuh sio i. Amahte lei khiah amahte kaa songah zan tuh sio i.

¹³ Cia nia ah minungte khiah BAWIPA in a rauh ngai in lau ruai tuh i. Aisu hmuah in a ompui kut khiah pom tuh ai pakhat le pakhat khiah tawng dun tuh i. ¹⁴ Judah mite khai Jerusalem ah tawng tuh i. A hiang cingkim ai mi phun dangte nai hnak sui le ngun le thilthuam khiah a tam ngai in hmunkhat in khawm tuh i. ¹⁵ Ciabang in cia mite buk songai umhnak siphuh le lak le kala-uk le siphuh cikniu te le kawlpaw te khai ur tuh ve i.

¹⁶ Ciafangin Jerusalem tawng tu mi phun hmuahhmuah lakai a taang tu mite khiah kum khat hnua kum khat vancung mite BAWIPA, Kumpibawipa bia tuh in le Tabernacle Puai bawn tuh in kawi tuh i.

¹⁷ Ciafangin Jerusalem ah vancung mite BAWIPA, Kumpibawi bia tuhin kawi lo tu laivum ai mite vumah ruah sii tuh lo i. ¹⁸ Izip mite in kawi hlahlekhaw, amahte vumah ruah sii tuh lo i. Jerusalem ah Tabernacle Puai bawn tuhin kawi lo tu mi phun te khiah BAWIPA in ur ruai bangin, Izip mite khai ur ruai tuh i. ¹⁹ Ciatih bang in Izip mi te le Tabernacle Puai bawn tuh in kawi lo tu mi phun hmuahhmuah khiah cawh tuh i.

²⁰ Cia nia ah siphuh te khawnglawng vumah “BAWIPA HNENAH CIANGHLIM TU SEH” ti in ngan tuh i. BAWIPA inn song ai bel te khiah awlta cabuai hmai ah hlengte thawn bang tuh i. ²¹ Jerusalem le Judah ai bel te khiah “VANCUNG MITE BAWIPA HNENAH CIANGHLIM TU SEH” ti in ngan tuh i. Raithawi tu hmuah in cia bel te khiah lang tuh ai a songah suang tuh i. Cia nia ah vancung mite BAWIPA inn songah Khaanan mi pakhat bang khai um tuh lo i.

← Previous 13

Zekharai 14 Zechariah

Next → Malakhai 1