Zekharai 13 Zechariah

¹ “Cia nia ah sualhnak le a cianglo te ca in David innkua le Jerusalem ai umtu mite ca in cirhti pakhat hong sah tuh i.

² “Cia nia ah milim zuk te hming khiah cia ram songin hnawt tuh ing. Ciafangin anite in zaikom in khai hih tuh nawn lo i.”ti in vancung mite BAWIPA in rel i. “Cen prawfet te le a cianglo rauhla te khai cia ram in tlan ruai tuh ing. ³ Cen mi pakhat in prawfet thu rel thotho lekhaw a cawi tu a nuu le a paa in cia pa hnenah, ‘Nangmah in BAWIPA hming in thudon rel manin, na thi tu seh.’ti in ti tuh i. Amah in prawfet thu rel fangin, a cawi tu a nuu le a pa in amah khiah dawt tuh i.

⁴ Cia nia ah prawfet pa in a mithla ai hmu hnak prawfet thu rel fangin zakthi tuh i. Amah in mi zawl tuhin sahmul pon khiah sil tuh lo i. ⁵ Ikhalselai amah in, ‘Kaimah khiah prawfet i lo ing. Lovai tu ing. Mi pakhat in i naulai ai panin kawlpaw khal dan i cuk i.’ ti in ti tuh i. ⁶ Ciafangin mi pakhat in amah khiah, ‘Na kut ai hmaihma tu zai i pa?’ ti in zawt tuh i. Ciafangin amah in, ‘I rualpui te inn ah he hmaihma khiah ngah ing.’ti in sawn tuh i.

⁷ “Aw vangsau pui,

i tukhal pa tawng tuh in phawk tu.

I rual pa tawng tuh in phawk tu.” ti in

Vancung mite BAWIPA in rel i.

“Tukhal Pa khiah seu tulai,

Tu te khiah piak tuh sio i.

Ciafangin i kut thawn a cik te khiah tawng tuh ing.

⁸ “Ram songah hmun thum khan hmun khat khiah rek tuhai

Hmun thum khan hmun khat tu a songah hlum tuh i

⁹ Cia hmun thum khan hmun khat te khiah

Mai song ah kawih tuh ing.

Ngun khiah er bangin amahte khiah er tuh ing.

Amahte khiah sui bang in cu tuh ing.

Amahte in i hming ko tuh ai

Amahte khiah sawn tuh ing.

Kaimah in, ‘Hete khiah i minung te i.’ti tuh ing.

Anite in a veksen in,

‘BAWIPA khiah kin Pathian i.’ti tuh i.” ti in rel i.

← Previous 12

Zekharai 13 Zechariah

Next → 14