1 Ciafangin Bawipa in Moses hnenah, 2 “Israel mite hnenah, ‘Nupang in fapaai in pasal niu in nai lekhaw hla siar ai a thi nai fangin ciang lo bangin cia nuu khiah ni sarih song rim tuh i. 3 Ni riat khim fangin a fapa vunpar khiah cem tuh i. 4 Cen ni 33 song a ciang lo in um tuh i. Cen a ciang nia khim hlan lo cia nu in a cianghlim thil khiah khing ma seh. Cen pumkhawm hmunah khai lut ma seh. 5 Cen fenu nai lekhaw hla siar ai thi nai fangin ciang lo bangin ni 14 song rim tuh i. Ciaben fangin ni 66 song rim tuh i. 6 Cen fapa i tu seh fenu i tu seh nai in cia nuu khiah a ciang nia khim fangin phungki hnenah mei ai tai in hlu tuhin tuu faniu kum khat le sualhnak ca ai hlu tuhin laileng niu i hlahle khuro niu khiah tawkdunhmun tabernacle dawngkham ah kawih tu seh. 7 Phungki pa in Bawipa hnenah hlu sah tuh ai a Pathian thawn rem ruai leh tuh i. Ciafangin amah khiah a thi suakhnak lakin ciang tuh i. He khiah fapa le fenu naitu nuu ca dan upadi i. 8 Cia nuu in tuu faniu khiah kawih ben hlahlekhaw khuro panih i hlahle laileng niu panih khiah mei ai tai in hlu tuhin le sualhnak ca in hlu tuhin kawih tu seh. Ciatih in phungki pa in a sualhnak khuk sah tuhai amah khiah ciang tuh i.’ti in rel tu.” ti in ruai i.