1 Ciafangin Bawipa in Moses khiah tawkdunhmun tabernacle songin ko ai, 2 “Israel mite hnen ah hetih in rel tu: ‘Bawipa hnenah a hlu ning kawih fangin, kawlpaw i hlahle tuu le mete kawih tuu-ih. 3 Mei ai tai tuhin kawlpaw hlu lekhaw maa nai lo kawlpaw cang i tuh ai tawkdunhmun buk dawngkham ah hlu tu selai Bawipa in saang sah tuh i. 4 Ciaben fangin mei thawn tai ai hlu tuhhnak a hlu vumah a kut khiah dah tu selai amah ca in a sualhnak tlanhnak tuh in saang sah tuh i. 5 Ciafangin amah in cia kawlpaw cang khiah Bawipa hmai ah ro tu selai Aaron fate phungkite in a thi khiah kawih tuh ai tawkdunhmun tabernacle dawngkham hiang ai awlta hiang cingkim khiah phiah tu seh. 6 Cen mei ai tai in hlu tuhhnak kawlpaw a phaw khiah hawk tu selai a cikniu niu in cem tu sio seh. 7 Phungki Aaron fate in awlta vumah mei sem tu selai cia mei vumah thing tih tu seh. 8 Ciaben fangin Aaron fate phungkite in cia kawlpaw sa le a lu le a thau khiah cia awlta vumai mei vumai thing vumah haih tu seh. 9 Cen Aaron in a rilte le a kete khiah ti thawn som tu seh. Ciafang in phungki pa in ciate khiah awlta vumah a veksenin mei thawn taihnak a hlu bangin tai tuh i. Cia khiah mei thawn taihnak a hlu i ai Bawipa hnenah a rimhmui a hlu i.
10 Cen mei thawn tai tuhin a hlu khiah tuu le me i lekhaw a maa nai lo tuu cang i hlahle me cang i tu seh. 11 Cia a hlu khiah Bawipa hmai ah tabernacle saklam ah rek tu selai Aaron fate phungkite in a thi khiah awlta hiang cingkim ah phiah tu seh. 12 Ciaben fangin amah in a sa khiah a lu le a thau kawmin a cikniu niu in cem tu sio selai phungki pa in awlta vumai mei vumai thing vumah zau tu seh. 13 A ril le a kete tu ti thawn som tu selai awlta vumah taihnak a hlu i ai Bawipa hnenah kawih in mei thawn tai tu seh. Cia khiah mei thawn Bawipa hnenah rimhmui a hlu i.
14 Cen mei thawn tai tuhin a hlu hnak khiah vaniute i lekhaw, khuro i hlahle laileng khiah kawih tu selai 15 Phungki pa in awlta hnenah kawih tu selai a lu khiah cem tu lio selai awlta vumah mei in tai tu seh. A thi tu awlta hiangah zung ruai tu sio seh. 16 Cen a hu le a ko te tu awlta hiang a ziatlam ai vutkuang dah hmunah lon tu seh. 17 Ciafangin a ko laiteng in hlik tu seh. Ikhalselai khan lio ma seh. Ciafangin phungki pa in awlta vumai thing vumah tai tu seh. Cia khiah mei thawn taihnak a hlu i ai Bawipa hnen ah a rimhmui a hlu i.