1 He thu te khiah Judah kumpibawite Uzziah, Jotham, Ahaz le Hezekiah le Israel kumpibawi Jeroboam san ah Beeri fapa Hosea hnenah hleng hnak BAWIPA thu i. 2 BAWIPA in Hosea hnenah thu rel pan fangin, BAWIPA in Hosea hnenah, “Israel ram mite in phatemah tuan manin, phatemah pakhat nu tu lai, phatemah fate nai tu.”ti in rel i. 3 Ciamanin ani khai feh ai Diblaim fenu Komer khiah hoi ai cia nuu khai naupai le fapa niu cawi i.
4 Ciafangin BAWIPA in Hosea hnenah, “A hming khiah Jezreel ti in ko tu. Ziangmanti fangin zaicam lo ah, Jezreel ai thi luang hnak ca in Jehu fate vumah phuzul tuh ing. Ciatih in Israel kumpibawi ram khiah bo ruai tuh ing. 5 Jezreel Rawn Zawllai ah Israel kahpuk khiah kaimah in ek sah nia hleng tuh i lai.”ti in rel i.
6 Cia nuu khai fapai leh thio le fenu niu in te i. Ciafangin Pathian in Hosea hnenah, “A hming khiah Lo-Ruhamah ti in ko tu. Ziangmanti fangin Israel mite khiah sual hlat thai in amahte khiah ngaihhar tuh nawn lo ing. 7 Ikhalselai Judah mite tu ngaihhar tuh ing. Amahte khiah kahpuk le vangsau le raaltawng hnak in le siphuh le siphuh totu te in luat ruai tuh lo ai amahte Pathian BAWIPA in luat ruai tuh i. “ti in rel i.
8 Cia nuu in Lo-Ruhamah khiah hnawi tul awl fangin, ani khai naupai leh thio ai fapa niu in cawi i. 9 Ciafangin Pathian in, “A hming khiah Lo-Ammi ti in ko tu. Ziangmanti fangin ningmah khiah i minung i lo i si. Cen kaimah khai ning Pathian i tuh lo ing.
10 Ikhalselai Israel mite khiah tipui kam ai a teh zo lo a siar zo lo runsiat zah in tam tuh i. Ciafangin, ‘Ningmah khiah i minung i lo i si.’ti ai rel hmun ah, ‘Ningmah khiah a nungmi Pathian fate i si.’ti ai rel nia khiah khim tuh i lai. 11 Ciafangin Israel mite le Judah mite khai hmunkhat in khawm tlang tuh ai, amahte uk tu tuhin mi pakhat khiah ril tuh le cia ram in amahte khiah suak tuh i. Ziangmanti fangin Jezreel niakhua khiah lian tuh ngai i.