1 Kum ruk le hla ruk le ni nga nia ah, Judah upate kawmin i inn songah kin to tlang teng fangin, BAWIPA kut khiah i vumah dah i. 2 Ciafangin BAWIPA el tanhnia lamah khiah mai bang in hmu ing. Cen a el tanvum lam khiah mai ling bangin tleu i. 3 Ciafangin a kut thawn i samtom in i duk i. Ciafangin Ciang Rauhla in van le laipua laklawh ah i daang ai, Jerusalem ai iksikhnak suak ruaitu iksikhnak zuk umhmun a songta tualvan ai saklam kawldawngkham ah i fehpui ai Pathian in i hmu ruai i. 4 Ciata ah Israel mite Pathian thangphathnak khiah zawllai hmunai i hmuhnak Pathian thangphathnak bangin hmu ing.
5 Ciafang in BAWIPA in, “Mi fapa, na mit thawn saklam ah hlir tu.”ti in i ruai i. Ciafangin kai khai saklam ah hlir ai, awlta kawldawngkham saklam ah dawngkham lut hmun ah cia iksikhnak zuk khiah um i. 6 Ciafangin amah in, “Mi fapa, i temple songin a hla ngai ah i tlan ruai tuhin, Israel mite in a ningdulkul ngai zuk bawn khiah hmu aw sim? Sik leh tu thio lai, a rauh amam ai ningdulkul zuk khiah hmu tuh i si.”ti in i ti i.
7 Ciamanin amah in tualvan dawngkham ah i kawih i. Kai khai sik fangin khaan songah kua pakhat hmu ing. 8 Ciafangin amah in, “Mi fapa, khaan songah kua co tu.”ti in i ruai i. Kai khai khaan songah kua co fangin dawngkham pakhat tawk ing. 9 Ciafangin amah in, “Tlum tulai amahte in ciata ah ningdulkul a siava bawnhnak khiah sik tu.”ti in i ruai i. 10 Ciafangin kai khai lut fangin, a bok ai vak pawl nunghing phun caang le ningdulkul ramsate le Israel mite milim zuk hmuahhmuah khiah bangkhang cingkim vum caang ah suaihnak hmu ing. 11 Israel mite upa sawmsarih khai Shaphan fapa Jaazaniah khiah amahte laiteng ah ding in ciate zuk hmai ah ding tlang i. Amahte kut ten in rimhmui khiah tai ai rimhmui khu lian ngai khiah suak i. 12 Ciafangin BAWIPA in, “Mi fapa, Israel mite upate in khuathim lakah amahte milim zuk khaan songah bawn hnak khiah hmu aw hang sim? Ziangmanti fangin amahte in, ‘BAWIPA in kin hmu lo ngawn i. BAWIPA in kin ram khiah kin zam sah zo i.’ti in ti i.”ti in i rel i.
13 Ciafangin BAWIPA in i hnenah, “Her leh tu thio lai amahte in ningdulkul a lian hngehnge bawnhnak khiah hmu tuh i si.”ti in i ti i. 14 Ciamanin amah in BAWIPA inn saklam kawldawngkham ah i kawih i. Ciafangin ciata ah nupuite khiah Tammuz kah in to tlang khiah hmu ai thin i tok rauh i.
15 Ciafangin amah in i hnenah, “Aw mi fapa, he khiah hmu aw sim? Her leh tu thio lai he hnak in ningdulkul lian amam khiah hmu tuh i si.”ti in i ti i. 16 Ciafangin amah in BAWIPA inn ai tualvan songta sawnah i kawih i. BAWIPA temple dawngkham ai awlta le donsuk laklawh ah minung kul hluan nga tluk khiah Bawipa temple khiah zangtak in amahte hmai khiah nisuah hmunlam ah hawi in ni bia hnelhno khiah hmu ing.
17 Ciafangin amah in i hnenah, “Aw mi fapa, he khiah hmu aw sim? Judah mite in he ta ah ningdulkul a bawnhnak khiah thu cik niu ngawn im? Ziangmanti fangin amahte in Israel ram khiah tawngdun hnak thawn dim ruai i. Ciafang in thin i raw ruai tuhin i tok tuhin let leh i. Amahte in thingkak khiah amahte hnar ah dah i. 18 Ciamanin thinraw ngai in bawn tuh ve ing. I mit in zah tuh lo ing. Ning khai hio tuh lo ing. Amahte in i bil songah a cawm ngai in kap rinin, za sah tuh lo ing.”ti in ti i.