1 Ciafangin Amah in kaimah khiah a cianghlim khaan ai nisuah hmun lam hoi kawldawngkham ah i kawih leh i. Cia dawngkham khiah a kham cia in um i. 2 Ciafangin BAWIPA in kaimah hnenah, “He dawngkham song in Israel mite BAWIPA Pathian khiah lut zo manin, aisu in he dawngkham songin lut tuh lo in he dawngkham khiah kham in hong tuh lo i. 3 Cen bawipa tu bawipa i manin BAWIPA hmai ah rong ei tuhin dawngkham songah to tu seh. Amah khiah dawngkham kawka songin lut tuh ai ciata pah in suak tuh i.”ti in i rel i.
4 Ciafangin Amah in saklam kawldawngkham lam in temple hmai ah i fehpui i. Kai khai sik le ciafangin BAWIPA thangphathnak in BAWIPA inn khiah dim pek khiah hmu ing. Ciafangin kai khai i hmai ah bok ing. 5 Ciafangin BAWIPA in i hnenah, “Mi fapa, a ciang ngai in cul tu. Kaimah in BAWIPA inn thawn senghnak thu le dan upadi te na relhnak thu khiah a veksenin na mit thawn hmu in na naa thawn za tu. Cen temple songah aisu te tlum tuh te le a cianghlim hmun khaan song ah lut siang lohnak mi te khiah a ciang ngai in cul tu. 6 Cen mi tawng thai cio, Israel mite hnenah, ‘BAWIPA Pathian in, “Aw, Israel mite, ning ningdulkul hnakte khiah a veksen in nai awl nga sing. 7 Thinlung le taksa vunpar cem lo ram dang mite khiah i inn riim ruai tuhin a cianghlim i khaan songah ning kawih ai i rong le thau le thi khiah ning hlu fangin, a ningdulkul ning bawnhnak manin amahte in i thukham khiah hnawmcan i. 8 Cen ningte in a cianghlim i thilri te kilkhawl lo ai, ram dang mite khiah ningmah ca in a cianghlim i khaan khiah kilkhawl ruai i si.”ti in ti i. 9 BAWIPA Pathian in, “Thinlung le taksa vunpar cem lo ram dang mite khiah a cianghlim i khaan songah lut ma seh. Israel mite songai ram dang mite in khai lut ma seh.
10 Cen Israel mite in amahte milim zuk bia in i hmun in lamtler in feh fangin, kai thawn a kang ai umtu Levi mite khiah amahte sualhnak manin tuar tuh i. 11 Ikhalselai amahte khiah a cianghlim i khaan songah temple dawngkham kiltu le temple naper tute ah cang tuh i. Amahte in mai thawn tai hnak a hlu le mite ca ai a hlu te rek tuh ai, mite naper sah tuh in mite hmai ah ding tuh i. 12 Amahte in mite khiah milim zuk bia ruai in Israel mite khiah sual ruai manin, ciamanin kai khai i kut tung in, amahte in amahte sual manin tuar tuh i.”ti in BAWIPA Pathian in ti i. 13 Amahte khiah i na per tuhin i nong ah le a Cianghlim ber Khaan songah phungki bang in kawi tuh lo i. Ikhalselai amahte bawnhnak ningdulkul manin zakthi in um tuh i. 14 Ikhalselai amahte khiah temple le a kulhnak na hmuahhmuah per tuhin temple kilkhawl tu tuhin haih tuh ing.
15 Ikhalselai Israel mite in i hnenin lamtler in um awng fangin, Levi phun Zadok fate phungki te in a cianghlim i khaan khiah kilkhawl manin, amahte in i na per tuhin i nong ah kawih tuh ai a thau le a thi khiah i hnenah hlu tuhin i hmai ah ding tuh i.”ti in BAWIPA Pathian in rel i. 16 Amahte in a cianghlim i khaan songah tlum tuhai i na per tuhin i cabuai hiang ah kawi tuh ai i ruaihnak bangin bawn tuh i. 17 Amahte in a songta tualvan kawldawngkham songah lut fangin, vo thawn takhnak thilthuam sil tuh i.Temple songah le a songta tualvan songah naper teng fangin amahte in sahmul thilthuam sil tuh lo i. 18 Amahte in amahte lu ah vo thawn takhnak lupawng pawng tuh ai vo thawn takhnak bawngbi feng tuh i. Khuahlan suak ruai thai thilthuam khiah sil tuh lo i. 19 Cen a puata tualvan ah mi zapui hnenah kawi leh fangin, amahte naperhnak thilthuam khiah hawk tuh ai, a cianghlim khaan songah hlum tuh ai thilthuam a dang sil tuh i. A cianghlim thilthuam thawn amahte in mi zapui khiah cianghlim ruai ma seh. 20 Amahte in a lu khiah kolh lio in met ma seh. Cen a sam khiah sau ruai ma seh. Ikhalselai amahte sam khiah a comniu in met tu seh. 21 Phungki te in a songta tualvan ah lut fangin capittizu ding tuh lo i. 22 Hmaitong le mi ai ma hnak nupui khiah nu tuh lo i. Ikhalselai Israel fenu le phungki te nu hmaitong lek nu tuh i. 23 Amahte in i minung te khiah a cianghlim le a cianghlim lo khiah cuk tuh i. A ciang le a ciang lo thia thiam thai in zirh tuh i. 24 Mi pakhat le pakhat hau fangin, amahte khiah thukhan tu i tuh i. I thukhan hnak bangin amahte in thukhan tuh i. Ul tuh ai i haih hnak puai ah amahte in i dan upadi le thukham bang in hlun tuh i. I Sabbath te khiah amahte in ul tuh i. 25 Mithi hiang ah kawi in amahte veve khiah riim ruai ma seh. A paa le a nuu le a fapa le a fenu le a u le a nau le pa nai lai lo a farnu ca ian in riim ruai tu seh. 26 Amahte khiah ciang leh fangin, amah ca in ni sarih khiah siar sah tuh i. 27 A cianghlim khaan songah naper tuhin amah khiah kawi leh nia ah, amah in a songta tualvan ah sualhnak ca in hlu tu seh.”ti in BAWIPA Pathian in rel i.
28 Ro thu ah kaimah khiah amahte ro ing. Israel ramah amahte khiah naih hnak zai khai pe tuh lo i si. Kaimah khiah amahte naih hnak ing. 29 Amahte in rongmu a hlu le sualhnak ca ai a hlu le khelh hnak ca ai a hlu te khiah ei tuh i. Israel ram ai a hlu hnak thil hmuahhmuah khiah amahte in ping tuh i. 30 Thing thai a thai hmasaber khiah amahte in ping tuh i. Cen ning ralthawi hnak hmuahhmuah khiah phungki te in ping tuh i. Ning inn ah hmuifu hleng thai in ning rong a hmasaber khiah phungki pa pe tuh i si. 31 Amah thu ai thi hnak le ramsa te ai rekhnak vaniu le sa te khiah phungki te in ei tuh lo i.