1 Judah kumpibawipa Josiah fapa Jehoiakim in kumpibawi tuan pan fangin, BAWIPA hnenin Jeremiah hnenah he thu hleng i. 2 “BAWIPA in kaimah hnenah: ‘Rihual le hak bawn tulai, na hawng ah phur tu. 3 Ciafangin cia rihual le hak te khiah kumpibawi Zedekiah hnenah Jerusalem ah hleng tu nalaangte hnenin, Edom kumpibawi le Moab kumpibawi le Ammon mite kumpibawi le Tyre kumpibawi le Sidon kumpibawi hnenah kuat tu. 4 Amahte in a bawite hnenah, “Ning bawite hnenah, Israel Pathian vancung mite BAWIPA in, 5 ‘Kaimah in laipua le minung le laipua ai ramsa te khiah i power lianpui thawn bawn ai i nuamhnak mite hnenah pe ing. 6 Cen tunin he ram hmuahhmuah khiah i hnenum Babilon kumpibawi Nebukhadnezzar na per sah tuhin a kut ah pe zo ing. Cen hampalak ai ramsate khai amah pe zo ing. 7 Ciamanin mi phun hmuah hmuah in Nebukhadnezzar cuu khim hlan lo, Nebukhadnezzar hnenum cang tuh i. Ciaben fangin mi phun tam ngai le kumpibawi tamngai in amah khiah amahte hnenum ah hmang tuh i. 8 Ciafangin Babilon kumpibawi hnenum cang nuam lo tu mi phun le kumpibawi te le Babilon kumpibawipa hak khiah a hawng ah phur nuam lo tu mi phunte khiah kaimah in vangsau le rian le urhnak thawn cawh tuh ai Nebukhadnezzar kut in amahte khiah bo ruai tuh ing. 9 Ciamanin ning prawfet, ning tlahsan thiamte, ning mangman tute, ning polte in ning hnenah, “Babilon kumpibawi hnenum cang tuh lo i si.” ti ai ning relhnak thu khiah ngai mah ih. 10 Ziangmanti fangin amah te in ning ramin a hla ngai ah ning thawn ruai tuhin, thudon prawfet thu ning rel i. Ngai leisikhaw kaimah in ning hnawt tuh sek ai ning rall tuh berh i. 11 Ikhalselai Babilon kumpibawipa hak khiah amahte hawng ah phurtu mi phunte khiah amahte ram ten ah um ruai tuh hlen ing. Amahte in amahte ram khiah vai tuhai amahte ramah um tuh hlen i.’ ti in BAWIPA in ti i.” ti in i rel i.
12 Ciafangin he thute khiah Judah kumpibawi Zedekiah hnenah rel ai, “Babilon kumpibawipa hak khiah na hawng ah phur tulai, amah le a minungte hnenum cang tulai na nung tuh i. 13 Zaimanin nangmah le na minungte khiah Babilon kumpibawipa hnenum cang nuam lote hnenah BAWIPA in relhnak bangin, vangsau le rian le urhnak in thi na nuam i? 14 Ciamanin, ‘Babilon kumpibawipa hnenum cang tuh lo i si.’ ti ai na rel tu prawfette khiah a thu ngai mah. Amahte in thudon prawfet thu na rel i. 15 Ziangmanti fangin BAWIPA in, ‘Amahte khiah ruai lo ing. Ikhalselai kaimah in ningte khiah ning hnawt tuh ai nangmah le he thudon prawfet thu na reltute khiah rall ruai tuh daih lamin, amahte in i hming in thudon prawfet thu rel i.’ ti in ti i.” ti in rel ing.
16 Cen phungkite le he mi veksente hnenah khai kaimah in, “BAWIPA in, ‘Ning prawfette in ning hnenah, “BAWIPA inn ai belte khiah Babilon in zaicam lo ah kawih leh tuh i.” ti in prawfet thu ning relhnak khiah ngai mah ih. Ziangmanti fangin thudon ning rel i. 17 Amahte khiah ngai mah ih. Babilon kumpibawipa na khiah per sah tuu i lai, ning nung tuh i. Zaimanin he khua khiah hnawmcan tuh i? 18 Ikhalselai amahte khiah prawfet ilekhaw, cen BAWIPA relhnak thu khiah amahte hnenah um lekhaw, BAWIPA inn songai le Judah kumpibawipa inn songai le Jerusalem ai belte khiah Babilon ah phur tuh lo in vancung mi BAWIPA hnenah ninghio ngen tu seh.’ ti i.
19 Ziangmanti fangin temple ai khuamte le darbel pui le a lengte le khua songai a taanghnak belte khiah, 20 Babilon kumpibawi Nebukhadnezzar in Judah kumpibawipa Jehoiakim fapa Jekhawniah le Judah ramai le Jerusalem ai mi upate khiah Jerusalem in Babilon ah thawngtla in phur fang in, ciate khiah phur lo in hlum i. 21 BAWIPA inn ai le Judah kumpibawi inn ai le Jerusalem ai belte thu ah, vancung mite BAWIPA Israel mite Pathian in, 22 ‘Ciate khiah kaimah in amahte khiah i fan leh hlanlo a veksenin Babilon ah phur tuh sio i.’ I fan ben fangin amahte khiah tlun leh tuhai he hmunah dah leh tuh ing.’ ti in rel i.” ti in rel ing.