1 Ciafang in BAWIPA in, “Feh tulai bel bawntu pa ai bel khiah lang tulai, mi upate a hrekkhat le phungki upate a hrekkhat khai kawih tu. 2 Ciafangin nisuak hmunlam kawldawngkham hiang ai Hinnom Fapa Rawn zawllai ah feh tulai, ciata ah kaimah ai na relhnak thu khiah: 3 ‘Judah kumpibawite le Jerusalem ah umtu mite, BAWIPA thu khiah ngai tuu-ih. Vancung mite BAWIPA, Israel Pathian in, “Heta ah siathnak a lian rauh hleng ruai tuhai a za tu hmuah in a ngaihsun ur in a bil tlo tuh i.
4 Amahte in i zam ai he hmun khiah ram dang bangin dah ai, amahte le a paate le Judah kumpibawite ai ling awng lohnak a dang pathiante hnenah rimhmui tai manin le he hmun khiah mawh nai lote thi thawn dim ruai manin, 5 cen amahte in Baal bia tuhin Baal hnenah a fapate khiah mai in tai in hlu tuhin, i ruat awng lohnak le a ruai awng lohnak i rel awng lohnak a saang hmun khai sa i. 6 Ciamanin BAWIPA in, he hmun khiah Tophet le Hinnom Fapa Rawn zawllai ti in ko tuh nawn lo ai Rek hmun Rawn zawllai ti in ko tuh i. 7 Judah le Jerusalem mite ai he hmunah relhnak thu khai a lovang cang ruai tuh ing. Amahte raalte hmai ah le amahte rek nuamtute in amahte khiah vangsau thawn rek ruai tuh ing. Amahte vuitum khiah van ai vaniute le laivum ai ramsa te rong tuhin pe tuh ing. 8 He khua ah aisu khai um lo in dah tuh ing. Mi zauhsuamhnak khua cang tuh i. A khel tu hmuah in a songai a urhnak hmuahhmuah manin ngaihsun ur in um tuh ai zauhsuam tuh i. 9 Amahte khiah a fapa le a fenu sa te khiah ei ruai tuh ing. Amahte khiah a raalte in kulh manin aisu hmuah in a rualpui sa khiah ei tuh i. Amahte khiah a raalte le a rek nuamtute in thintawp rauhin dah tuhai lungsia rauh in um tuh i.” ti in rel i.’ ti in i ruai i.
10 Ciafangin BAWIPA in, “Nangmah thawn feh tu mite hmai ah cia bel khiah khoi tulai amahte hnenah, 11 ‘BAWIPA in, “Ciatih bangin bel bawntu pa bel khiah khoi ai a khoihnak te khiah bel ah bawn thill lehlo bangin, he khua le he minungte khiah khoi ruai tuh ing. Amahte khiah Tophet ah a vui hmun tuh um lo tianin vui tuh i. 12 Ciatih bangin he hmun le a songai umtu mite khiah Tophet bangin bawn tuh ing. 13 Cen Jerusalem ai innte le Judah kumpibawite inn te khiah Tophet bangin rim ruai tuh i. Ziangmanti fangin amahte in cia innphu vumin vancung ai arsite hnenah rimhmui khiah tai ai, a dang pathiante hnenah ding tuh zu khiah hlu i.’ ti in rel tu.” ti in i ruai i.
14 Ciafangin Jeremiah khai BAWIPA in prawfet thurel ruai hmun Tophet ah feh i. Ani khai BAWIPA inn ai tualvan ah ding ai mi veksen hnenah, 15 “Vancung mite BAWIPA Israel mite Pathian in, ‘Amahte in ungtuang rauh in um ai i thu i ngai nuam lo manin, he khua le khua dang hmuahhmuah hnenah i rel hnak bangin hnophnak hleng ruai tuh ing.’ ti in rel i.” ti in rel i.