LAI CIANGHLIM ZANNIAT BAIBAL
← Previous 11

Ecclesiastes 12

Next → Solomon La 1

1 Na tlangval niu lai ai panin,

A pha lo nia hleng hlanah le
Na kumte khai bo dawn manin,
“Hiamhnak nai nawn lo ing.” ti in
na ti hlanah na Bawntu khiah hih tu.

2 Ni le khuavar le hla le arsite

tla ai khuathim hlanah le
Ruahsii ben fangin mairote kaai leh hlanah;

3 Inn kiltu pa thing baikbo nia ah,

Thahat pa khiah a elkawn fangin,
Lungrial te khai a tlawm ze manin com lio fangin,
Cen padinpauk songin sik tute in malria in hmu fangin,

4 Lamceh lam ai dawngkham te khai kham sio fangin,

Lungrial aw khiah a tlawmniu lek pau fangin,
Vaniu ai hnak aw menma in mitmu phawk ruai fangin,
Amahte lasa hnak khiah cawm nawn lo fangin,

5 Amahte in a saang khiah lau ai lamlak ai kihkulhnak khiah lau fangin,

Almon thing khiah par liang fangin,
Khokhuakte in hnaihnok fangin,
Daihhnak khai um nawn lo fangin
na Bawntu khiah hih tu.

6 Cen ngun ri cat hlanah le sui bel khoi hlanah,Tiburhhnak zinzir tanphung khai cirhti ah zun bial hlanah,Namkum ah ticawihnak leng khiah hnawm hlanah,Na Bawntu khiah hih tu.

7 Ciafangin laivut khai a umkel hmunah let leh tuhai,

Rauhla khai a pe tu Pathian hnenah let leh tuh i.

8 Tazahaw saza pa in,

“Thu lovang hmuahhmuah lakai thu lovang.
Zai hmuahhmuah khiah thu lovamg i.”ti i.

9 Ciazolo ah Tazahaw saza pa khiah mifim manin, mite khiah fimhnak cuk thliahthlo i lai. Amah in a thin songin ngaisung ai sii ben fangin proverbte khiah a kungniu in rem i. 10 Tazahaw saza pa in a hmanber ponte khiah sii ai, a nganhnak ponte khiah a dik le a hman pon i.

11 Mifim pa relhnak thu khiahkawlpaw khawnghnak fungkek goad le Tukhal pa ai pehnak a remniu ai khenhnak tluangkhen bang i. 12 Cen i fapa, hete in na tiam tu seh. Ca-uk tamngai bawn khiah a bo nia um lo i. Laisik hnelhno khai pumpui thin rimsu teng tu i.

13 A veksenin a thupui ber khiah rel nga sing:

Pathian khiah kih in a thukham khiah hlun tu.
Ziangmanti fangin cia khiah minung te tavuan veksen i.

14 Ziangmanti fangin Pathian in zai hmuahhmuah na khiah

a thupruk ai bawnhnak a pha le a pha lo tianin thukhan tuh i.
← Previous 11
Ecclesiastes 12
Next → Solomon La 1