1 Ciafangin Bawipa in Moses hnenah, 2 “Hla hmasaber ni khat nia ah tawkdunhmun tabernacle buk khiah tauh tuh i si. 3 Cia tabernacle songah Tettikhanhnak thingkuang dah tulai khaandanhnak pon thawn cia thingkuang khiah khuk tu lio. 4 Ciaben fangin cabuai le a vumah a thuang niu ai dah tuhhnak thilte tlum tu. Cen mei-inn varhmun khai tlum tulai mei-innte khiah vaar tu. 5 Cen rimhmui taihmun sui awlta khai Tettikhanhnak thingkuang hmai ah dah tulai tabernacle dawngkham berhnak pon khiah zaar tu. 6 Cen tawkdunhmun tabernacle buk dawngkham hmai ah a hlu tai hmun awlta dah tu. 7 Cen dar bel pui khiah tawkdunhmun tabernacle le awlta laklawh ah dah tulai a songah ti thun tu. 8 Cen a hiang cingkim ah tualvan bawn tulai tualvan kawl dawngkham ah a berhnak pon tar tu. 9 Cen nawih tuhhnak thau khiah lang tulai tabernacle le a songai thil hmuah a veksenin nawih tu. Cia tabernacle khiah a belte kawmin cianghlim ruai tulai cianghlim tuh i. 10 Cen a hlu tai hmun awlta le a belte khiah a veksen in thau nawih in awlta khiah cianghlim ruai tuh i si. Ciafangin awlta khiah cianghlim rauh tuh i. 11 Dar bel pui le a tauhhmun khai thau nawih in cianghlim ruai tuh i si. 12 Ciaben fangin Aaron le a fate khiah tawkdunhmun tabernacle dawngkham ah kawih tulai amahte khiah ti thawn takhluh tu. 13 Aaron in i hmai ah phungki naper tuhin Aaron khiah a cianghlim thuam silh in thau nawih in cianghlim ruai tuh i si. 14 Cen a fate khiah pon sau thawn thuam tuh i si. 15 Anite in i hmai ah phungki naper thai in a paa bang in thau nawih tuh i si. Ziangmanti fangin ciatih ai thau nawih manin amahte san songah a catlo in phungki na per tuh i.”ti in ruai i. 16 Ciatih bangin Moses in Bawipa ruaihnak bangin bawn i.
17 Kum nihhnak hla hmasaber ni khat nia fangin cia tabernacle khiah sa ben i. 18 Ciamanin Moses in tabernacle khiah tung ai a munhmun kuate khiah pen ai thingtlepte le thingtlepte vumah zauhnak thingte khiah dah ai a khuamte khiah tung i. 19 Bawipa in Moses ruaihnak bangin Moses in khai tabernacle vumah buk khiah zar ai a buk vumah a khukhnak pon khai zar i. 20 Moses in Tettikhanhnak khiah lang ai tabernacle songah dah ai thingkuang ai a kual songah thingpum khiah rolh ai ngaihharhnak tauhkheng khiah thingkuang vumah dah i. 21 Cia thingkuang khiah tabernacle songah tlum ai khaandanhnak pon khiah zaar ai Tettikhanhnak thingkuang khiah Bawipa ruaihnak bangin a tumce in khan lio i. 22 Cen cabuai khai tabernacle songah tlum ai khaandanhnak pon pua tabernacle saklam ah dah i. 23 Bawipa in Moses ruai bangin Moses in sangreu khiah a tluang niu in Bawipa hmai ah dah i. 24 Mei-inn vaarhmun khiah tabernacle songah kawih ai cabuai hmai tabernacle hlanglam ah dah i. 25 Bawipa in Moses ruai bangin Moses in mei-inn khiah Bawipa mai ah vaar i. 26 Cen sui awlta khiah tawkdunhmun tabernacle songah kawih ai khaandanhnak pon hmai ah dah i. 27 Bawipa ai ruaihnak bangin Moses in cia awlta vumah a rimhmui khiah tai i. 28 Ciaben fang in tabernacle dawngkham ah khaandanhnak pon zar i. 29 Ciaben fangin tawkdunhmun buk songai tabernacle dawngkham hmai ah a hlu taihmun awlta dah ai Bawipa in Moses ruaihnak bang in cia awlta vumah mei thawn taihnak a hlu le rong hlu i. 30 Ciaben fangin dar bel pui khiah tawkdun hmun buk le tabernacle laklawh ah dah ai somhnak tuhin cia bel songah ti thun i. 31 Cia ti thawn Moses le Aaron le a fate in amahte kut le ke khiah som i. 32 Bawipa in Moses ruaihnak bangin anite khai tawkdunhmun buk songah lut ai awlta hnenah kawi fangin a kut le kete khiah som de i. 33 Ciafangin Moses in tabernacle le awlta cingkim ah tualvan sa ai tualvan kawl dawngkham vumah khaandanhnak pon zar i. Ciatih bangin Moses in a naper khiah ben i.
34 Ciafangin cia tawkdunhmun buk khiah meiro in khuk ai Bawipa thangphathnak in tabernacle khiah khuk i. 35 Tawkdunhmun buk khiah meiro in khuk ai tabernacle khiah Bawipa thangphathnak thawn dim manin Moses khai tawkdunhmun buk songah lut thill lo i. 36 Ciamanin Israel mite khai amahte khualsi hmun caang ah tabernacle vumin meiro lang fangin anite khai thawn i. 37 Ikhalselai meiro khiah lang lo fangin anite khai meiro lang hlan lo thawn lo in um hlen i. 38 Ciamanin Israel mite khai amahte khualsi song hmuah Bawipa meiro khiah sun fangin tabernacle vumah um ai zan fangin tabernacle vumah mei khiah meiro songah um ai cia khiah Israel mite in hmu i.