1 Cen Bezaleel le Aholiab le Bawipa in fimhnak le linghnak le sanginn ca ai naper dan ling tuhin Bawipa in pehnak mite in Bawipa ruaihnak bangin bawn tuh i.” ti in rel i. 2 Ciafangin Moses in Bezaleel le Aholiab le amahte thin songah Bawipa in fimhnak thawn dim ruaitu naper thiamte le a thinsotu hmuah khiah naper tuhin kawi ruai i. 3 Amahte in Moses hnenin cia sanginn sahnak tuhin Israel mite hluhnak khiah ngah i. Ciamanin anite in zing siar in amahte sianghnak a hlu khiah kawih thliahthlo i. 4 Ciafangin sanginn ca ai napertute khai amahte naper hmun ten in Moses hnenah kawi ai 5 Moses hnenah, “Bawipa ai kin ruaihnak natuan ca in a kulhnak tahin tam sawnin he mite in kawih i.” ti in rel i. 6 Ciamanin Moses in amahte khiah thu pe ai, “Sanginn ca in a hlu ca in aisu pasal le nupuite in zaikhai per ma hang seh.” ti in rel ruai i. Ciatih bangin amahte in zaikhai kawih tuh lo in kham i. 7 Ziangmanti fangin amahte in thilri khiah amahte kulhnak zahin nai ai zolo ah a tam ze in nai i.
8 Ciafangin amahte lakai thil bawn thiamtute in tabernacle khiah pon than haa thawn sa i. Cia pon khiah a pha rauh pu ri le mepian le a num le a san pon thawn tak ai cia pon vumah cherubim zuk thawn cawih i. 9 Cia pon khiah dong kul hluanriat sau ai dong li kau i. Cia ponte a veksenin a saulam le a kaulam khiah a bangvek i. 10 Ciafang in amah in pon pangate khiah hmunkhat in peh ai a dang pangate khai hmunkhat in peh i. 11 Cen cia pon a ning khatlam ah mepian pon kualte khui ai a panihhnak pon ning ah khai ciatih bangin khui i. 12 Cia pon pakhat ah kual sawmnga khui ai a panih hnak cia pon a ning ah kual sawmnga khui i. Cia a kualte in pon pakhat le pakhat khiah peh dun i. 13 Cia ponte khiah tabernacle pakhat cang thai in pon penhnak kilip sawmnga bawn ai cia kilip thawn pon khiah hmunkhat in pen i.
14 Tabernacle khuk tuhin me hmul pon hlaikhat sa i. 15 A saulam dong sawmthum, a kaulam dong li i. Cia pon a hlaikhat in a saulam le a kaulam a bangvek i. 16 Cia pon panga khiah hmunkhat in khui ai parukte khai hmunkhat in khui i. 17 A sumpua ber pon ning ah kual sawmnga khui ai a panihte pon ning ah khai kual sawmnga khui i. 18 Dar thawn kilip sawmnga bawn ai cia kilipte khiah buk pakhat cang tuhin hmunkhat in pen i. 19 Cen buk khukhnak tuhin a san thawn nimhnak tuu cang phaw le betza ramsa hmul khai bawn i.
20 Cen tabernacle ca in lawithing tlep khiah a caang in tung i. 21 Thing tlep khat khiah dong haa sau ai a kaulam khiah dong khat le a hrek i. 22 Pakhat le pakhat peh dun thai in thing tlep khiah a khatlam le a khatlam solh i. Ciatih bangin thing tlep a vekin solh i. 23 Cen Tabernacle hlanglam ca in tlep kul bawn i. 24 Cia thingtlep hnia ah ngun thawn thil munhmun tuh kua sawmli bawn i. Thing tlep pakhat hnia ah ngun ai bawnhnak a munhmun tuh kua panih bawn i. Cen a dang thing tlep hnia ah khai kua panih bawn i. 25 Cen a khattalam a saklam ca in tlep kul bawn ai 26 thil munhmun tuh kua khiah ngun thawn sawmli bawn i. Tlep khat hnia ah panih, cen a dang tlep khat hnia ah panih bawn i. 27 Cen tabernacle le a hnualam nitla hmunlam ah tlep ruk bawn i. 28 Cen a hnualam ai a ning panih ca in tlep nih bawn i. 29 Cia a ning ah a hnialam ai panin a cunglam tian thuah nih in kual pakhat thawn pen i. Ciatih bangin a ning panih in bawn i. 30 Ciamanin thingtlep pariat le ngun thawn bawnhnak a munhmun kua hlairuk um ai thingtlep pakhat hnia ah a munhmun kua panih cen a dang thingtlep hnia ah khai a munhmun kua panih ten um i.
31 Cen a zau tuhin lawithing tlep nga khiah tabernacle khatlam ca in bawn i. 32 Cen a khatlam ca khai tlep nga, cen a hnualam nitla hmun lam ca khai tlep nga bawn i. 33 Cen a laitaber zauhnak lawithing khiah a tunghnak lawithing vumah a khatlam ai panin a khatlam tian zau i. 34 Cia thingtlep te khiah sui thawn khut i. A zauhnak thingte khai sui thawn khut i. A rolh hmun tuh kualte khai sui thawn bawn i.
35 Cen amah in khaandanhnak pon khiah a pha ber pu ri le mepian le a num le a san pon thawn tak ai cherubim zuk thawn cawih i. 36 Cia pon khiah sui khuthnak lawi khuam pali vumah thirhuk thawn tar i. Cia khuamte khiah ngun thawn bawnhnak ham vumah ding ruai i.
37 Thiamtaktu ai takhnak a femniu pu ri le mepian le a num le pon san thawn tabernacle dawngkham berhnak tuh pon bawn i. 38 Cia pon ca in lawithing khuam panga khai bawn ai sui thawn khut i. Cen a thirhuk khai sui thawn bawn i. Cia khuamte ca in a rolh hmun tuh kua panga tu dar thawn bawn i.