Psalms 88

¹ Aw BAWIPA, i otu Pathian.

Na hmai ah sun le zan kap hnelhno ing.

² I sawngenhnak khiah na hmai ah hleng tu seh.

Na bil thawn i kaphnak khiah i ngai sah tu.

³ Ziangmanti fangin i rauhla khiah rimsu ngai i.

I nunhnak khiah hlan thawn nong tete i.

⁴ Hlankua songah zu tu te camra in i siar zo i.

Kaimah khiah tha nai lo pa,

⁵ A thi te lakah i vai zel,

Na kut songin cem lio manin nangmah in hih leh lohnak,

Hlankua songah vuihnak a rekhnak pa bang ing.

⁶ A thukber khuathim hmun kua songah i zau i si.

⁷ Na thinrawhnak khiah i vumah rit rauh i.

Na tihual veksen thawn i rim zo i si. Selah

⁸ I rualpuite khiah a hla ngai ah i dah sah i si.

Amahte lakah ningdul kul in i bawn zo i si.

Kaimah khiah i khum lio manin suak thill lo ing.

⁹ I rimsuhnak in i mit khai hnawm sek i.

BAWIPA, nisiar in na ko ing.

I kut thawn na zuan ing.

¹⁰ Mithi te ca in ngaihsun urkul bawn nga sim?

Mithi te khiah tho in na cuan tuh im? Selah

¹¹ Na ithnak khiah hlankua songah rel tuh im?

Nangmah khiah rinsan tlak i si.

Cia khiah hnophnak umhmun ah rel tuh im?

¹² Na ngaihsun urkul bawnhnak khiah khuathim songah ling thill tuh im?

Cen na dikcanghnak tang a hai thai ngio ramah hih tuh im?

¹³ Ikhalselai, aw BAWIPA, na hnenah kap ing.

Zing fangin na hnenah sawngen tuh ing.

¹⁴ BAWIPA, zaimanin i rauhla khiah lon i si?

Zaimanin i hmunin na hmai khiah thup lio i si?

¹⁵ Rim i su ze manin i tlangval niu pahin thi tuhin ralring zo ing.

Nangmah khiah na kih rauh manin thin i thip rauh i.

¹⁶ I vumah thin na raw rauh i.

Na kih ze manin na hnenin i khan lio i.

¹⁷ Na thinrawhnak khiah ti bangin sunnivui in i hiang cingkim ah hleng i.

Ti bangin i cuum i.

¹⁸ I ithnak le i rual khiah i hnenin a hla ah dah i si.

I lingtute khiah khuathim lakah dah i si.

Psalms 88