Psalms 132

¹ BAWIPA, David le a tuarhnak khiah a veksen in hih sah tu.

² Amah in BAWIPA hnenah thukham ai,

Zakuk ai a Cungnung Pathian hnenah cukcamhnak:

³ “Thungai in i inn khan songah lut tuh lo ing.

Nunnuam in zau tuhin i khuahluan ah khai kawi tuh lo ing.

⁴ I mit te khiah mitmu siang tuh lo ing.

Mitmu khai sung tuh lo ing.

⁵ BAWIPA umhmun tuh i tawk hlan lo le

Zakuk ai a Cungnung Pathian inn i tawk hlan lo mitmu tuh lo ing.”ti in relhnak khiah hih sah tu.

⁶ Efrathah khua songah zazo i ing.

Jaar lo lai ah tawk zo i ing.

⁷ A tabernacle songah lut nga sing.

A keham ah amah khiah bia nga sing.

⁸ Tho tulai na comhmun ah na thahathnak thingkuang thawn kawi tu, Aw BAWIPA.

⁹ Na phungkite khiah dikcanghnak pon silh tu seh.

Na minungte khiah ang in au tu seh.

¹⁰ Na hnenum David ca in, na rilhnak pa khiah hnawl mah.

¹¹ BAWIPA in David hnenah thuhman in thukham zo i. Amah in pilh tuh lo i.

“Na songai na thai khiah kumpibawi cang ruai tuh ing.

¹² Na fate in i thukham khiah hlun in,

I cukhnak i Tettikhanhnak khiah bawn lekhaw,

A fate in khai na kumpibawi tauhhmun ah kumzangza in to tuh i.” ti in kham zo i.

¹³ Ziangmanti fangin BAWIPA in Zion khiah ril zo i.

A umhmun tuhin in a daihhnak i.

¹⁴ Amah in, “He khiah kumzangza ai i comhmun tuh i.

Heta ah um tuh ing. Ziangmanti fangin i daih i.

¹⁵ Zion khiah thilri tam ngai thawn hmuifu bur tuh ing.

A songai mi farahte khiah rong cawm tuh ing.

¹⁶ A phungkite khai ohnak thawn thuam tuh ing.

A minungte in khai ang ngai in au tuh i.

¹⁷ Ciata ah David ki khiah khang ruai tuh ing.

I rilhnak pa ca in mai-inn bawt zo ing.

¹⁸ A raalte khiah zakthihnak thawn thuam tuh ing.

Ikhalselai a ukhnak khiah khaang tuh i.” ti in rel i.

Psalms 132