LAI CIANGHLIM ZANNIAT BAIBAL
← Previous 106

Psalms 107

Next → 108

1 Aw, BAWIPA khiah an tuu-ih.

Ziangmanti fangin amah khiah a pha i!
Ziangmanti fangin a ngaihharhnak khiah kumzangza in bo nia um lo i.

2 BAWIPA ai luangtlanhnak mite,

A raalte kut songai luangtlanhnak mite

3 Ram dang dang ai a khawmhnak mite

Ni suah hmun lam le ni tla hmun ram lam ai le
Sak lam le hlang lam ai a tlanhnak mite in ciatih bangin rel tu seh.

4 Amahte khiah zaikhai um lo hmun nelrawn songah vak tlang i.

Umhmun tuh khua tawk lo i.

5 Rikam le tihaal in amahte khiah baang rauh i.

6 Ciafangin anite khai rimsu ze fangin BAWIPA hnenah kap ai,

BAWIPA in amahte khiah luat ruai i.

7 Ciafangin amahte khiah umhmun khua ah kawih tuhin, a hman lampui in fehpui i.

8 Aw, mite in BAWIPA khiah a pha manin an hal selai!

Minung fate hnenah ngaihsun urkul a perhnak manin an hal selai!

9 Ziangmanti fangin tihaal te khiah lawm ruai ai

Rikam te khiah rong ur thawn kham ruai i.

10 Khuathim lakai to tute le, thihhnak hla hnia ah totute,

Thin rimsuhnak le thir tum thawn penhnak te khiah

11 Amahte in Pathian thu khiah el manin

A Sangber Pa thurel hnak khiah nautat manin,

12 Ciamanin amahte khiah mi kuli tuan ruai i.

Amahte khiah tlu fangin khai a bawmtu um nawn lo i.

13 Ciafangin anite khai rimsu ze fangin BAWIPA hnenah kap ai,

BAWIPA in amahte khiah o i.

14 Amahte khiah khuathim songin le thihhnak hla hnia songin suah ai,

amahte penhnak thirri khiah cat sah sio i.

15 Aw, mite in BAWIPA khiah a pha manin an hal selai!

Minung fate hnenah ngaihsun urkul a perhnak manin an hal selai!

16 Ziangmanti fangin amah in dar thawn bawnhnak kawl dawngkham khiah ek sio i.

Thir tumte khai tum nih in cem sio i.

17 Mi hrekkhatte khiah amahte sualhnak manin mivoi cang i.

Amahte sualhnak manin harsahnak anh i.

18 Amahte in rong hmuahhmuah duh bul lo i.

Ciamanin thihhnak dawngkham nong ah thawn i.

19 Ciafangin anite khai rimsu ze fangin BAWIPA hnenah kap ai,

BAWIPA in amahte khiah luat ruai i.

20 Verified text not yet available. 21 Aw, mite in BAWIPA khiah a pha manin an hal selai!

Minung fate hnenah ngaihsun urkul a perhnak manin an hal selai!

22 Amahte in anhnak khiah raithawihnak in hmang tu seh.

A naperhnak khiah ang kong in rel sah tu seh.

23 Timbaw thawn tipui songah feh tute,

Tipui vumah sumpai ai dawr tuah tute in

24 BAWIPA naperhnak khiah hmu ai,

Ti songai a ngaihsun urkul khiah hmu i.

25 Ziangmanti fangin amah in khuahu zuang ruai ai tipui vumah tihual hleng ruai i.

26 Timbawite khiah vancung tian in do ai

Tipui thuk song tianin tlok leh i.

27 Zukham pa bangin khat lam le khat lamah tlu hnelhno i.

Ciafangin amahte in zai bawn tuh khai ling nawn lo i.

28 Ciafangin anite khai rimsu ze fangin BAWIPA hnenah kap ai,

BAWIPA in amahte khiah bawm ruai i.

29 Khuahu khiah dap ruai ai,

Tihualte khai bo ruai i.

30 Khuahute dap manin anite khai ang i.

Ciamanin amah in amahte khiah timbaw comhmunah fehpui i.

31 Aw, mite in BAWIPA khiah a pha manin an hal selai!

Minung fate hnenah ngaihsun urkul a perhnak manin an hal selai!

32 Amahte in amah khiah mite pawl lakah thang ruai tu seh.

Mi upate khawmhmun ah amah khiah cuan tu seh.

33 Amah in runpui khiah nelrawn ah can i.

Cirhti khiah lairo ah cang ruai i.

34 Lai ram pha khai ngaal cang ruai i.

Cia ramai umtu mi sualte manin ciatih in bawn i.

35 Cen amah in nelrawn khiah tikhur cang ruai i.

Lairo khai cirhti ah cang ruai i.

36 Ciata ah khuato in khua sa tuh in

Rikamte khiah cia ramah um ruai i.

37 Amahte in cia ramah rong cing in capit vuandum bawn ai

Rongkhawm cu fangin rong a tam ngai khawm i.

38 Amah in amahte khiah hmuifu bur ai,

amahte khiah a rauh ngai in zaai ruai i.
Cen a kawlpawte khai tlawm ruai lo i.

39 Amahte khiah mite nemhhnak le rimsuhnak le lungsiahnak in amahte minung khiah tlawm ai thin nau in um fangin,

40 A bawite lakah raw ai, amahte khiah lampui um lo hmun nelrawn lakah vak ruai i.

41 Ikhalselai mi farah te khiah do ai harsahnak thawn a hla ah dah i.

Amahte innkua khiah tu run bangin khang ruai i.

42 Mi dikcangte in cia khiah hmu ai ang i.

Misualte a veksenin amahte kaa khiah hup i.

43 A fimtute in he thute khiah hlun tuh i.

Amahte in BAWIPA ithnak khai ling sah tuh i.
← Previous 106
Psalms 107
Next → 108