Job 23

¹ Ciafangin Job in,

² “Tunnia rinah a sia ngai in cam ing.

I hukhnak in i kutte khai com tau lo in mer i.

³ Aw, Amah tawk hmun tuh khiah ling inglai

a to hmun ah kawi tuh napui ing!

⁴ Amah khiah i thu rel tuh napui ing.

I kaa thawn el tuh napui ing.

⁵ Amah ai i sawn tuhhnak khiah ling i nuam i.

I hnenah a relhnak thu khiah ling i nuam napui

⁶ A huthawm lianpui thawn i tawng ni tur im?

I tawng tuh lo i.

Ikhalselai amah in i ling tuh i.

⁷ Ciata ah mi dikcangte in amah thawn thu rel kawm thill tuh i.

Ciafangin i Thukhantu pa kut in kumzangza in i luat ruai tuh i.

⁸ Hmailam ah feh inglai amah khiah ciata ah um lo i.

Hnualamah let inglai, amah khiah hmu thill lo ing.

⁹ Amah in kekeh lamah naper fangin

amah khiah hmu thill lo ing.

Kiahhan lamah her fangin khai

amah khiah hmu thill lo ing.

¹⁰ Ikhalselai amah in i feh hmun lampui khiah i ling sah i.

Amah in i cu ben fangin,

sui bang in i suak tuh i.

¹¹ I ke in a kalsuanhnak khiah a rang ngai in hlun i.

Kaimah in amah lampui khiah hlun ai tlamtler in vak lo ing.

¹² A kaa ai ponghnak thukham khiah hlunlo in um lo ing.

A ponka khiah ronghnak in thupui sawnin ruat ing.

¹³ Ikhalselai amah khiah aisu thawn khai bang lo i.

Aisu in amah khiah thleng ruai thill i?

Amah nuamhnak bangin bawn i.

¹⁴ Ziangmanti fangin i ca ai a dahhnak hmuah khiah amah in i bawn sah i.

Amah thawn cia bang thil tampui um i.

¹⁵ Ciamanin amah hmai ah i lau rauh i.

He khiah ruat fangin amah khiah kih rauh ing.

¹⁶ Ziangmanti fangin,Pathian in i thin khiah nau ruai i.

A Cungnung Pathian khiah kih ngai ing.

¹⁷ Ziangmanti fangin amah in khuathim songin i vawng lio lo i.

Amah in mitsin bang khuathim khiah i hmai in thup lo i.

Job 23