1 Ciafangin amahte uktu Israel Pathian hming in, prawfet Hakkai le Iddo fapa Zekhariah in Judah le Jerusalem ai umtu Judah minungte hnen ah prawfet thu rel i. 2 Ciafangin Shealtiel fapa Zerubbabel le Jozadak fapa Jeshua khai tho ai Jerusalem ai Pathian inn khiah sa pan leh i. Amahte bawmtu in Pathian prawfette khai um i.
3 Ciafang in, Runpui Ralkhat lamai ram uk tu Tettenai le Shethar-Bozenai le a rualpuite khai amahte hnenah kawi ai amahte hnenah, “He inn sa tuh le ben tuh in aisu in thu ning pe i?” ti in zawt i. 4 Cen amahte in, “He inn sa tute hming tang aisu te i?” ti in khai zawt i. 5 Ikhalselai amahte Pathian in Judah mi upate khiah sik manin, Darius hnenah thuthan ai Darius ai lai khirhhnak ngah hlan tian aisu in khai amahte khiah awl ruai lo i.
6 He lai khiah Runpui Ralkhat lamai ram uk tu Tettenai le Shethar-Bozenai le Run Ralkhat ram ai a rualpuite in kumpibawi Darius hnenah kuathnak i. 7 Amahte in kumpibawipa Darius hnenah, “Kumpibawipa Darius hnenah, thinnuam hnak um tu seh! 8 Kin khai Judah ramai a lian ngai Pathian inn ah kawi i ing. Cia inn khiah lungto lian ngaingai le bangkhangte khai thing lian ngaingai thawn sa i. Amahte in a kung niu in sa ai a rang ngai in sa ben taito i. 9 Ciafangin a upate hnenah, ‘He inn sa leh tuhin le ben tuhin aisu in thu ning pe i?’ ti in zawt i ing. 10 Cen nangmah in ling thai in amahte songai a upate hming khai zawt i ing. 11 Amahte in hetih in kin sawn i: ‘Kinte khiah van le laipua uktu Pathian hnenumte i ing. Cen Israel kumpibawi lian ngai pakhat ai he hlan kum tam ngai ai sa awnghnak inn sa leh sal i ing. 12 Kin paate in vancung ai Pathian khiah thinraw ruai manin, Khaldean mi Babilon kumpibawipa Nebukhadnezzar kut ah amahte khiah pe ai amah in he inn khiah hnawmcan ben fangin amahte khiah Babilon ah thiar i. 13 Ikhalselai Babilon kumpibawi Sairas in kum khathnak uk kum ah, kumpibawipa Sairas in he inn khiah sa leh tuhin thu suah i. 14 Nebukhadnezzar in Jerusalem temple songai sui le ngun belte khiah lang ai Babilon temple songah kawihhnak te khiah kumpibawi Sairas in Babilon temple songin lang ai, Shesh-bazzar tihnak uktu bawi pakhat hnenah pe ai, 15 amah hnenah, “He belte khia lang tulai, Jerusalem ai temple songah dah tu. Cen Pathian inn khai a hmuncia ah sa leh tuu-ih.” ti in ti i. 16 Ciafangin he Shesh-bazzar khai kawi ai Jerusalem ai Pathian inn khiah sa pan i. Ciata ai panin he inn khiah sa hnelhno ai tuntian in ben lai lo i.’ ti in kin sawn i. 17 Ciamanin kumpibawi pa in a pha ti in ruat lekhaw, Babilon ai kumpibawite khumhnak ca-uk songah, Jerusalem ah Pathian inn sa leh tuhin kumpibawi Sairas in thu pe na maw ti in sii pha i. Ciafangin kumpibawipa in he thu khiah a nuam bangin kin sawn leh tu seh.” ti in kuat i.