1 Sheba kumpibawinu in Solomon fimhnak khiah za fangin, amah khiah thu har ngaingai thawn cu tuhin kawi i. Ani khai Jerusalem ah hnuahlun tamngai le kala-uk kawmin hleng i. Cia kala-ukte in masala le sui tam ngai le a manhar lungto te phur i. Solomon tawk fangin a thin songai umhnak bangin a veksenin zawt i. 2 Ciamanin Solomon in cia nuu zawthnak hmuahhmuah khiah sawn liang i. Kumpibawipa in cia nuu sawn ben lohnak a har ze pakhat khai nai lo i. 3 Sheba kumpibawinu in Solomon fimhnak le a inn sahnak te le, 4 a cabuai vumai a rongte le a hnenumte to dan le a rong suahtute le amahte silhnak thuam le a khuat phurtute le Bawipa inn ah kawi fangin a lut hmunte khiah a veksen in hmu fangin, a mang bangin zai rel tuh khai ling tau lo i. 5 Ciafangin cia nuu in kumpibawipa hnenah, “Na thu le na fimhnak khiah i ramin i za bangin hman peu i. 6 Ikhalselai i mit rori in i hmu hlanah cia thu khiah sang lo ing. Na fimhnak le na thu khiah a hrek rin i rel lo i. Na fimhnak le na lianhnak khiah i zahnak tah in hming thang sawn i. 7 Na hmai ah a catlo in ding ai na fimhnak za tu na minung le na hnenumte khiah hmuifu i! 8 Na lakah lungkhim ai Israel kumpibawi tauhkheng vumah na tauh tu Bawipa na Pathian khiah hmuifu tu seh! Bawipa in Israel khiah kumzangza in it manin, a caang in thukhan in a dikcaang niu in bawn tuhin kumpibawi na cang ruai i.”ti in ti i. 9 Ciafangin kumpibawipa khiah sui talan za le kul le masala tamngai le lungto manhar te khiah pe i. Sheba kumpibawinu in Kumpibawipa Solomon hnenah pehnak bang masala um awng lo i.
10 Hiram hnenumte le Solomon hnenumte in Ophir ai sui tamngai kawih ai, Ophir in almuk thing le lungto manhar tamngai khai kawih i. 11 Kumpibawipa in cia almuk thing thawn Bawipa inn kaipum le a kumpibawipa inn kaipum sa ai lasatute congcing le guitar te khai almuk thing thawn bawn i. He hlanah cia bang khiah Judah ramah hmu awng lo i. 12 Kumpibawipa Solomon in Sheba kumpibawinu daihhnak hmuah le a ngenhnak hmuah khiah cia nuu in kumpibawipa sumhnak tah in tam sawn in sum i. Ciafangin cia nuu khai a hnenumte kawmin a ram ah tlung i.
13 Kum siar in Solomon hnenah hlenghnak sui khiah talan zaruk le sawmruh i. 14 Cia khiah dawr bawntute le thilzuartute kawihhnak sui siar lo i. Arabia kumpibawi te le ramuktute in khai Solomon hnen ah sui le ngun kawih i. 15 Ciafangin Kumpibawipa Solomon in sui thawn lum lian ngaingai zanih bawn ai cia lum pakhat ah sui shekel zaruk hmang i. 16 Cen sui thawn lum zathum khai bawn ai cia lum pakhat ah sui shekel zathum hmang i. Cia lum te khiah kumpibawipa in Lebanon Tuu Inn songah khawi i.
17 Ciazolo ah, vui haa thawn kumpibawi tauhkheng lian pui sa ai sui a cit thawn khuk i. 18 Cia tauhkheng khiah kaipum pum ruk saang ai, kefot hmun khai sui thawn bawn ai tauhkheng thawn peh dun i. A khat lam veve ah ban zau hmun bawn ai, cia hiang ah chintit panih ding i. 19 Cen kaipum pum khat caangah chintit pa nih, panih dah ai a veksenin chintit hlainih um i. He bang tauhkheng khiah aisu kumpibawi dangte ca in bawn awng lo i.
20 Kumpibawi Solomon dinghnak khuat khiah a veksen in sui ai bawnhnak i. Cen Lebanon Tuu Inn songai khuat hmuahhmuah khai sui thawn bawn hnak i. Ngun thawn bawnhnak um lo i. Ziangmanti fangin Solomon sanah ngun tu zaikhai man nai lo i. 21 Ziangmanti fangin kumpibawi pa timbawte khiah Huram hnenumte thawn Tarshish ah feh de i. Kum thum cang fangin he timbawte in sui le ngun le vui haa le zawng le udawng te kawih de i. 22 Ciamanin Kumpibawi Solomon khiah laivum kumpibawi hmuahhmuah hnak in fim ai lian sawn i.
23 Laivum kumpibawi hmuah in Pathian in Solomon thin songah dahhnak fimhnak ngai tuhin Solomon hnenah kawi tuhin sii de i. 24 Ciate in lehsawng kawih ten i. Cia lehsawng te khiah sui le ngun thawn bawnhnak thilri, thilthuam, raal thilthuam, masala, siphuh le lakte khiah kum siar in kawih de i.
25 Cen Solomon in siphuh leng le siphuh inn thawngli le siphuhtotu thawng hlainih nai ai, kumpibawi umhmun Jerusalem ah le siphuh leng dah hmun khua caang ah dah i. 26 Ciatih bangin Solomon khai Runpui ai panin Filistin ram Izip ramri songai kumpibawite khiah uk i. 27 Kumpibawipa in Jerusalem ah ngun khiah lungto bangin zan ruai ai lawithing khiah mualtlang ham ai sikamor zah in tam ruai i. 28 Cen Solomon hnen ah Izip le ram hmuahhmuah songai siphuhte khiah kawih i.
29 Solomon bawnhnak a hmasaber le a hnautaber khiah prawfet Nathan ca-uk songah le Shilo mi Ahijah prawfet thurel hnak songah le prawfet Iddo in Nebat fapa Jeroboam hmuhnak songah khum zo i lo im? 30 Solomon in Jerusalem ah kum sawmli song Israel mite khiah uk i. 31 Ciafangin Solomon khai a paate kawmin mitmu ai a paa David Khua ah vui i. Ciafangin a ca in a fapa Rehoboam in kumpibawi cang i.