1 Hetih bangin a kungniu in naper ben fang in, Assiria kumpibawipa Sennacherib khiah Judah ram songah lut i. Amah in neh tuh sio vuah in, a kho ngai ai renhnak khuate khiah tawng tuhin caam i. 2 Hezekiah in Sennacherib hleng hnak le Jerusalem tawng tuhai a tumhnak hmu fang in, 3 a tlangsuak le a raalbawite thawn khua pua ai cirhti khiah kham tuhin thusawm tlaang ai, amahte in amah khiah bawm i. 4 Ciafangin mi tamngai khai ram songai cirh le rawnti kham tuhin hmunkhat in khawm tlaang ai, “Zaimanin Assiria kumpibawite khiah heta ah kawi in ti tamngai tawk tuh i?” ti in ti i. 5 Ciafangin ani khai siarmawti in naper ai khua renhnak sente khiah rol in kho ruai ai a vumah raalvil hmun inn saangte khai sa i. Cen cia sen pua ah a dang sen pakhat sa ai David Khua ai Millo khai rol leh i. Cen raal thilthuam le lum khai a tamngai in bawn i. 6 Cen mite vumah raal bawite khai dah ai amahte khiah khua dawngkham ai mi taihmun ah hmunkhat in khawm ruai ai thinso tuhhnak thu khiah, 7 “Thahat le raalpha in um tuu-ih. Assiria kumpibawi le amah thawn a raalkap tamngai manin lau le thinhnawm in um mah ih. Ziangmanti fangin amah thawn umtu te hnak in kinmah thawn umtute khiah tam sawn i. 8 Amah thawn minung raalkapte um i. Ikhalselai kin te kin bawm tuh le kin tawng sah tuhin, kin hnenah Bawipa kin Pathian um i.” ti in rel i. Ciamanin mite khai Judah kumpibawi Hezekiah thu relhnak manin thinso in um tlaang i.
9 Ciahnua ah Assiria kumpibawipa Sennacherib in a hnenumte khiah Jerusalem Judah kumpibawipa le Jerusalem ai umtu mite hnenah ah hlat ai, (amah le a raalkpate tu a veksenin Lachish tawng tuhin pai i). 10 cia hnenumte in amahte hnenah, “Assiria kumpibawipa Sennacherib in, ‘Aisu rinsan manin, Jerusalem khiah raal in ning kulh napui ai, Jerusalem ah um hlen i si? 11 Hezekiah in, ‘Bawipa kin Pathian in Assiria kut songin kin suah tuh i.’ ti in ning rel ai rian le tihaal in ning thi ruai i lo im? 12 Hezekiah in Bawipa biahmun awlta te le a saanghmun ai raithawihmun innte khiah baal sah sio ai, Judah le Jerusalem mite hnenah, ‘Awlta pakhat vum lek ah rimhmui tai in bia tuh i si.’ ti in ning ruai i lo im? 13 Ram dang mi phun dang te hnenah kaimah le i paa ai bawnhnak khiah ling lo i sim? Ciate pathiante in amahte ram khiah i kut songin luat ruai ben awm? 14 I paa in a veksenin hnawmcanhnak ram dang mite pathian aisu pakhat bangin amahte khiah i kut songin luat ruai ben pa? Ciamanin a kontih in ning Pathian in i kut songin ning luat ruai ben tuh ce i? 15 Ciamanin Hezekiah in ning zawl ma seh. Cen hetih bangin in khai ning so ma seh. Amah khiah sang mah ih. Ziangmanti fangin aisu ram pathian le kumpibawi ramai pathiante in amahte minung khiah i kut song le i paa kut songin luat ruai ben lo i. Ciamanin a kontih in ning Pathian in i kut songin ning luat ruai ben tuh ruaro i?’ ti in ti i.” ti in rel i.
16 Ciafangin Sennacherib hnenumte in Israel Bawipa Pathian le A hnenum Hezekiah khiah a tam ngai in zauhsuam i. 17 Cen amah in Israel Bawipa Pathian khiah, “Ram dang pathiante in a minungte khiah i kut songin suah ben lo bangin, Hezekiah Pathian in khai A minungte khiah i kut songin suah ben tuh lo i.” ti in zauhsuam le hau ai laikuat i. 18 Ciafangin amahte in Jerusalem renhnak sen vumai to tu mite khiah lau ruai tuh le thin hnaihnok ruai tuhin le amahte in Jerusalem khiah lang ngah thill thai in, aw cawm ngai thawn Hebru pon in au i. 19 Ciatih bangin amahte in minung kut ai bawnhnak laivum pumpalah ai pathiante bangin, Jerusalem ai Pathian khiah hau i.
20 He thu manin Kumpibawipa Hezekiah le Amoz fapa prawfet Isaiah khai sawngen ai vancung lamah au i. 21 Ciafangin Bawipa in a vancung mi khiah hlat ai, Assiria kumpibawi buk ai raalkapte khiah raalbawite kawmin a veksenin rek sio i. Ciamanin ani khai amah ram ah zakthi kul ngai in tlung leh i. A pathian temple songah lut fangin, a songai suakhnak a fate in ciata ah amah khiah vangsau thawn rek lio i. 22 Ciatih bangin Bawipa in Hezekiah le Jerusalem ai umtute khiah Assiria kumpibawi Sennacherib le mi dangte kut in o ai, amahte khiah nuamhmun caang ah bawm i. 23 Ciafangin mi tamngai in Jerusalem ah Bawipa hnenah le Judah kumpibawi Hezekiah khiah lehsawng sum i. Ciamanin amah khiah ram dang mite in upat rauh i.
24 Ciateng in Hezekiah khai thi banghma in ur ai, Bawipa hnenah sawngen i. Ciafangin Bawipa in Hezekiah khiah hnikhnaihhnak pakhat pe i. 25 Ikhalselai Hezekiah khai a thin puar ai, a hnen ah pehnak ngaihharhnak bangin hlun lo i. Ciamanin Pathian thinraw khiah amah vum le Judah vum le Jerusalem vumah hleng i. 26 Ciafangin Hezekiah khai Jerusalem mite kawmin thinniam in um leh manin amah san ah Pathian thinraw khiah amahte vumah hleng lo i.
27 Hezekiah in thilri tamngai nai ai mi in upat rauh i. Ciamanin amah in tangka le sui le lungvar phun caang le masala le lum le thil mankhung te khawi hmun thingkuang tam ngai nai i. 28 Cen rong le capittizu le thau le sumhnam phun caang le tu ca in innte khai nai i. 29 Ciahlai ah khua tam ngai khai sa ai, kawlpaw le tu khai tam ngai nai i. Ziangmanti fangin Pathian in thilri tam rauh pe i. 30 Hezekiah in Kihon Cunglam ai ti suakhmun khai kham ai David Khua in nitla hmun lamah ti khiah laipua kua songin kawih i. Hezekiah in a bawnhnak hmuahhmuah a khim liang in bawn ben i.
31 Ikhalselai Babylon uktute in a thuthantute khiah Judah ramai ngaihsun urkul canghnak thu zawt tuh in hlat fangin, a thin songai ruathnak ling sah tuhin le cu tuhin Pathian in Hezekiah khiah hlum i.
32 Hezekiah bawnhnak a veksen le a phathnak khiah Amoz fapa Isaiah hmuhnak ca-uk songah le Judah le Israel kumpibawite ca-uk songah khum liang i. 33 Ciatih bangin Hezekiah khai a paate bang in thi ai, David fapate vui hmun a cungta hlan songah vui i. Ciafangin Judah mi le Jerusalem mi veksenin a thi fangin amah khiah upat rauh i. Ciafangin a fapa Manasseh in a ca in kumpibawi cang i.