Judah fate
1 Judah fapate khiah Perez, Hezron, Kharmi, Hur, le Shobal te i. 2 Shobal fapa Reaiah in Jahath nai ai Jahath in Ahumai le Lahad nai i. Hete khiah Zorath te songkhat i. 3 Hete khiah Etam paa fapate i: Jezreel, Ishma le Idbash; amahte farnu hming khiah Hazelelponi i. 4 Penuel khiah Kedor paa i. Ezer khiah Hushah paa i. Hete khiah Bethlehem paa Efrathah fa upaber Hur fapate i. 5 Tekoa paa Ashur in nu panih Helah le Naarah nai i. 6 Naarah in Ahuzzam, Hepher, Temeni, le Haahashtari cawi i. Hete khiah Naarah fapate i. 7 Helah fapate khiah Zereth, Zohar, le Ethnan i. 8 Koz in Anub, Zobebah, le Harum fapa Aharhel songkhat te nai i.
9 Jabesh khiah a unaute tah in mi nunpha sawn i. A nuu in amah khiah, “Amah khiah te fangin i ur man.” ti ai Jabez bawn i. 10 Ciafangin Jabez in Israel Pathian hnenah, “Nangmah in hmuifu i bur in i ram khiah kau ruai silai, na kut khiah i vumah um in, a pha lo songin i luat ruai tulai urhnak i tuar ruai mah.” ti in sawngen ai Pathian in a ngenhnak bangin pe i.
11 Shuhah nau Khaleb in Mehir nai ai Mehir khiah Eshton paa i. 12 Eshton in Beth-Rapha, Paseah, le Ir-Nahash paa Tehinnah nai i. Hete khiah Rechah mite i.
13 Kenaz fapate khiah Othniel le Seraiah i. Othniel fapate khiah Hathath, 14 le Ophrah naitu Meonothai i. Seraiah in Ke-Harashim paa Joab nai i. Amahte khiah lettamate i. 15 Jephunneh fapa Khaleb fapate khiah Iru, Elah, le Naam i. Elah fapa khiah Kenaz i. 16 Jahaleleel fapate khiah Ziph, Ziphah, Tiria, le Asarel i. 17 Ezrah fapate khiah Jether, Mered, Epher, le Jalon i. Mered nu in Miriam, Shammai, le Eshtemoa paa Ishbah te nai i.
18 (A nu Jehudijah in Kedor paa Jered, Sokhoh paa Heber, le Zanoah paa Jekuthiel nai i.) Cen hete khiah Mered in nu hnak Pharaoh fenu Bithiah fapate i. 19 Naham farnu khiah Hodiah in nu ai cia nuu ai fapate khiah Karmi mi Keilah paate le Maachat mi Eshtemoa paate i. 20 Shimon fapate khiah Amnon, Rinnah, Ben-Hanan, le Tilon te i. Ishi fapate khiah Zoheth le Ben-Zoheth te i. 21 Judah fapa Shelah fapate khiah Lekah paa Er, Mareshah paa Laadah, le ponthan taktu Ashbea inn songkhat te i. 22 Cen Jokim le Chozeba mite le Joash; Moab ramai uktu Saraph le Jashubi-Lethem te khai i. He khiah hlanlai ai khumhnak lai i. 23 Hete khiah bel bawntute i ai, Netaim le Kederah ah umtute i. Amahte khiah ciata ah um ai kumpibawipa na per sah i.
Simeon fate
24 Simeon fapate khiah Nemuel, Jamin, Jarib, Zerah, le Shaul, 25 Shaul fapa Shallum, Shallum fapa Mibsam le a fapa Mishma te i. 26 Mishma fapate khiah a fapa Hamuel, Hamuel fapa Zakkhur, Zakkhur fapa Shimei te i. 27 Shimei in fapa hlairuk le fenu pa tuk nai i. Ikhalselai a naute in fate tam ngai nai lo i. Cen a songkhatte khai Judah te bang in zaai lo i.
28 Amahte khiah Beesheba, Moladah, Hazar Shual, 29 Bilhah, Ezem, Tolad, 30 Bethuel, Hormah, Ziklak, 31 Beth Markcaboth, Hazar Susim, Beth Biri, le Shaaraim ah um i. He khuate khiah David kumpibawi cang hlan hmuah amahte khua i. 32 Cen amahte khua a cikniu te pawl khiah Etam, Ain, Rimmon, Tokhen, le Ashan kawmin khua panga i. 33 Cen he khua pui hiang ai khuate naute khai Baal tian in amahte ai i. Hete khiah amahte umhmun i ai, amahte in a pupa suahkeh hnak thu khiah laisong ah khum i. 34 Meshobab, Jamlech, le Amaziah fapa Joshah; 35 Joel le Joshibiah fapa Jehu, Seraiah fapa, Asiel fapa; 36 Elioenai, Jaakobah, Jeshohaiah, Asaiah, Adiel, Jesimiel, le Benaiah; 37 Shiphi fapa Ziza, Allon fapa, Jedaih fapa, Shimri fapa, Shemaiah fapa- 38 He a hming ai kohnak mite khiah a songkhat songah mi-uktute i ai, a paate songkhat khiah a roh ngai in zaai i.
39 Ciamanin anite khai Kedor khua hiang tian feh ai amahte sumhnam rongei tuh sii in rawn in nisuah hmunlam tian kawi i. 40 Ciafangin amahte in hampa um bial hmun ram tawk ai cia ram khiah kau ngai ai a dap hliang le nunnuam hmun ram i. Ham mite khiah cia ramah um awng i. 41 A hming khumhnak mite khiah Judah kumpibawi Hezekiah uk teng in hleng i. Amahte in Ham mite khiah taih ai ciata ai umtu Meun te khai taih ai tunnia tian in amahte khiah a pumpalah in hnawmcan berh i. Ciata ah amahte sumhnam ca in rong um manin, anite khai cia ram ah um i. 42 Amahte hrekkhat Simeon fate 500 khiah Seir Mual ah kawi i. Amahte konghoitu khiah Ishi fapa Pelatiah, Neariah, Rephaiah, le Uzziel te i. 43 Amahte in a tlan ngah tu a taanghnak Amalek te khiah neh i. Tunnia tian ciata ah amahte khiah um i.